Read Dikateny Iombonana Eto Madagasikara Ohabolana 18 Bible Online

Ohabolana 18 - Dikateny Iombonana Eto Madagasikara bible

Ohabolana 18

¹Ny tia tena dia tsy mitady afa-tsy ny tombontsoany; fa mampisafoaka azy rehefa mety fanampiana.

²Tsy mahaliana ny adala izay fahaiza-manavaka, fa ny haneho ny heviny hatrany no sitrany.

³Ny haratsiam-panahy dia mahatonga fanesoana; ary ny toetra manala baràka dia arahin-kenatra.

⁴Ny teny aloaky ny vavan’ny olona dia mety ho lalina toy ny ranomasina sy hamelombelona toy ny ranondriaka, ary mety ho loharanom-pahendrena[52].

⁵Tsy tsara ny miandany amin’ny olon-dratsy mba hahatonga ny marina ho resy amin’ny fitsarana.

⁶Mahatonga fifandirana ny tenin’ny adala, ary miantso kapoka ny zavatra lazainy.

⁷Fandringanan-tena ny lazain’ny adala ary fandrika ho azy ny teny ataony.

⁸Toa hani-matsiro ny tenin’ny mpanendrikendrika, ka any anaty kibo no mikorotsaka.

⁹Izay malaina amin’ny asany dia efa naman’ny mpanimba zavatra.

¹⁰Tilikambo mafy ny anaran’ny TOMPO, ka ny olo-marina miezaka ho ao dia voaaro tokoa;

¹¹ho an’ny mpanankarena kosa dia ny fananany no toa tanàna mafy, ary heveriny ho manda avo miaro azy tokoa izany.

¹²Ny fireharehan’ny olona no mialoha ny faharavàny; fa ny fanetren-tena kosa mialoha ny voninahitra.

¹³Izay mamaly teny tsy henony akory dia hadalana sy henatra ho azy izany.

¹⁴Ny toe-panahy mavitrika dia mandresy ny aretina; fa zovy kosa no hanarina ny toe-panahy kivy?

¹⁵Ny fon’ny manan-tsaina maniry hahazo fahalalana, ary ny olon-kendry liana hihaino izany.

¹⁶Ny fanomezana dia mamoha varavarana ny mpanolotra ary mampiditra azy eo anatrehan’ny lehibe.

¹⁷Amin’ny fitsarana dia izay miteny aloha no toa marina, mandra-piavin’ny ankilany hanohitra ny voalazany.

¹⁸Ny fanontsanan-kodiakely mety mampitsahatra fifandirana ary mamaha olana eo amin’ny samy mahery[53].

¹⁹Sarotra kokoa noho ny mananika manda ny manatona rahalahy tafintohina; ary ny fifandirana dia mafy toy ny hidin-dapa.

²⁰Ny vokatry ny tenin’ny olona no hamelomany tena, eny, ny vokatr’izay lazainy no hivelomany;

²¹ny mahafaty sy mahavelona dia miankina amin’ny teny, ka izay mankamamy miteny no hihinana ny vokany.

²²Izay mahita vady mahita fahasambarana; sady mahazo fanambinana avy amin’ny TOMPO izy.

²³Mitalaholaho ny mahantra, rehefa miteny; fa mihenjana kosa ny mpanankarena, rehefa mamaly.

²⁴Izay maro namana tsy maintsy ho sahirana, nefa misy sakaiza izay mifikitra noho ny mpiray tampo aza.