Read Dikateny Iombonana Eto Madagasikara Ohabolana 20 Bible Online

Ohabolana 20 - Dikateny Iombonana Eto Madagasikara bible

Ohabolana 20

¹Ny divay mahatonga ho mpaniratsira, ny toaka mahatonga ho mpitabataba, koa izay mimamo amin’izany tsy ho hendry.

²Ny fandrahonan’ny mpanjaka dia mampatahotra toy ny fieron’ny liona; ka izay mampahatezitra azy tandindomin-doza.

³Voninahitry ny olona ny mandositra fifandirana; fa ny adala rehetra kosa no mikiribiby amin’izany.

⁴Tsy mety miasa ny kamo fa ririnina ny andro; nefa hitady izy amin’ny fotoam-pijinjana fa tsy hahita na inona na inona.

⁵Ny hevitra ao ampon’ny olona dia miafina toy ny rano ao an-kibon’ny tany, ka ny manan-tsaina no afaka hanovo aminy.

⁶Maro ny olona samy midera tena ny amin’ny soa vitany; fa sarotra kosa ny mahita izay olona mahatoky marina.

⁷Toetra vanona no izoran’ny olo-marina; ka sambatra izay zanaka handimby azy.

⁸Ny mpanjaka, rehefa mipetraka hanao fitsarana, dia mahita ratsy isan-karazany raha vao mijery.

⁹Iza no afaka hiteny hoe: «Nandio ny foko aho, ka dia voadio ho afaka amin’ny fahotako»?

¹⁰Ny vatomizana sy famarana roa karazana dia zavatra samy halan’ny TOMPO.

¹¹Na ny zaza aza dia fantatra amin’ny ataony raha tsara sy mahitsy ny fitondrantenany.

¹²Ny sofina andrenesana sy ny maso ijerena dia zavatra roa samy nataon’ny TOMPO.

¹³Aza fatra-pitia torimaso fandrao mihamahantra ianao; mifohaza vao maraina kosa dia ho voky hanina ianao.

¹⁴Hoy ny mpividy: «Ratsy! Ratsy!» Kanjo rehefa lasa izy, dia faly nahazo.

¹⁵Ao ny volamena ary betsaka ny perla; fa ny tenim-pahalalana no vatosoa tsy fahita firy.

¹⁶Raha misy olona sahy miantoka trosan’olona vahiny, dia tano ny akanjony ho antoka ny amin’io olon-tsy fantatra io.

¹⁷Mety mamin’ny olona ny hanina nangalarina, nefa fasika no hameno ny vavany amin’ny farany.

¹⁸Ny hevitra tsara no mahatanteraka ny fikasana; ary tetika voarindra no tokony hoenti-miady.

¹⁹Izay mifosa namana dia manambara tsiambaratelo; koa aza mifanerasera amin’ny olona basivava.

²⁰Raha misy manozona ny rainy na ny reniny, dia ho toy ny jiro maty ao anaty haizim-pito ny fiainany.

²¹Izay maika hangoron-karena am-boalohany, dia tsy hotahina any am-parany.

²²Aza manao hoe: «Hamaly ny ratsy natao tamiko aho!» Fa matokia ny TOMPO, dia hamonjy anao Izy.

²³Halan’ny TOMPO ny vatomizana tsy marina; ary tsy tsara ny mizana mandainga[55].

²⁴Ny TOMPO no mampahery ny olona eo amin’ny lalan-kalehany; fa ahoana moa no hahalalan’olombelona ny hombany?

²⁵Zava-doza ho an’ny olona ny mora miteny hoe: «Zavatra voatokako ho an’Andriamanitra ity», na ny mivoady ka avy eo vao mieritreritra[56].

²⁶Ny mpanjaka hendry misivana ny olon-dratsy ka mamela azy hohosen’ny kodiaram-by.

²⁷Ny fanahin’ny olona no jiro omen’ny TOMPO mba hitsilovana ny ao am-po tsy miloaka.

²⁸Fitiavana sy toetra mahatoky no miaro ny mpanjaka; ary fampiharana ny marina[57] no mahamafy orina ny fahefàny.

²⁹Ny fahatanjahana no haingon’ny tanora, ary ny volofotsy no voninahitry ny antitra.

³⁰Ny fery mangirifiry dia mety mahafaka ny haratsiam-panahy, ary ny kapoka mahadio ny ao am-po tsy miloaka.