Read Dikateny Iombonana Eto Madagasikara Ohabolana 21 Bible Online

Ohabolana 21 - Dikateny Iombonana Eto Madagasikara bible

Ohabolana 21

¹Ny fon’ny mpanjaka dia toy ny rano mikoriana izay tarihin’ny tanan’ny TOMPO amin’izay tiany.

²Ny olona mihevitra ny ataony ho mahitsy avokoa; fa ny TOMPO no mitsara ny eritreritra manesika azy.

³Ny fanaovana ny marina sy mahitsy dia sitraky ny TOMPO kokoa noho ny sorona.

⁴Fijery miandranandrana sy fo miavonavona: fahotana avokoa ny fiedinedin’ireo olon-dratsy.

⁵Ny tetikasan’ny olona mazoto no mampanan-karena azy; izay rehetra mikoropaka mihary kosa mihamahantra.

⁶Izay harena azo tamin’ny lainga dia etona mihelina ihany sy fandrika mahafaty.

⁷Ny halozàn’ny olon-dratsy no mamery azy, satria tsy mety manao ny marina ireo.

⁸Miolikolika ny lalan’ny olo-meloka; fa mahitsy kosa ny asan’ny madio fo.

⁹Aleo mitoetra amin’ny efitra kely ao an-tampon-trano toy izay miray trano amin’ny vehivavy liana ady.

¹⁰Ny olon-dratsy maniry hatrany ny hanao ratsy, ka na dia ny sakaizany aza tsy ananany antra,

¹¹Ho hendry ny kely saina raha sazîna ny mpaniratsira; ary hahazo fahalalana ny hendry raha misy mampianatra.

¹²Ny olo-marina[58] manara-maso ny andian’ireo olon-dratsy ka mamarina azy any amin’ny loza.

¹³Izay manampin-tsofina amin’ny fitarainan’ny mahantra dia tsy hisy hihaino rehefa mba mitaraina koa.

¹⁴Ny fanomezana atao mangingina dia mampitony ny fahatezerana, ary ny tolotra omena an-kinafinafina mampitsahatra ny fahavinirana.

¹⁵Fifalian’ny olo-marina ny manao izay rariny; fa zava-mampijaly ny mpanao ratsy kosa izany.

¹⁶Izay mivily miala amin’ny lalam-pahendrena dia ho naman’ny maty tsy ho ela.

¹⁷Izay tia filibàna ho tonga mahantra, ary izay tia divay sy hanim-py tsy mba hanan-karena.

¹⁸Ny olon-dratsy ho avotry ny olo-marina, ary ny mpivadika ho solon’ny olo-mahitsy.

¹⁹Aleo mitoetra any an-taniefitra toy izay manana vehivavy liana ady sy saro-po.

²⁰Misy raki-tsarobidy sy harena sesehena ao amin’ny fonenan’ny hendry; fa ny adala kosa mandanilany foana ny azy.

²¹Izay fatra-pandala fahamarinana sy hatsaram-po no hahita fiainana sy famonjena ary haja.

²²Ny hendry mahanika izay tanana mafy ambina indrindra ka mandrodana ny manda izay ianteheran’ny mponina.

²³Izay mahatandrina ny teny rehetra ataony dia miaro ny tenany tsy hanana ahiahy.

²⁴Izay mirehareha sy miavonavona no atao hoe mpaniratsira; fatra-pianjonanjona izy raha manao zavatra.

²⁵Ny fitsiriritan’ny kamo no hahafaty azy, satria tsy mety miasa ny tanany;

²⁶tontolo andro izy mitsiriritra hatrany, nefa ny olo-marina sady manome no malala-tanana.

²⁷Zava-maharikoriko ny sorona ataon’ireo olon-dratsy, indrindra fa amin-kafetsena no anolorany azy.

²⁸Ho levona ny vavolombelona mandainga; fa ho afa-miteny hatrany kosa izay mitatitra ny henony.

²⁹Miseho ho sahisahy ny olon-dratsy, fa ny olo-mahitsy kosa mampitombina tsara ny toetrany.

³⁰Ny fahendren’olombelona sy ny fahaizana amam-pisainany dia maivana eo anatrehan’ny TOMPO.

³¹Voaomana hiatrika ady ny soavaly, fa ny TOMPO kosa no manome ny fandresena.