Read Dikateny Iombonana Eto Madagasikara Ohabolana 22 Bible Online

Ohabolana 22 - Dikateny Iombonana Eto Madagasikara bible

Ohabolana 22

¹Aleo laza tsara toy izay harem-be; ary aleo mahazo sitraka amin’olona toy izay mahazo volamena sy volafotsy.

²Izao no iombonan’ny mpanankarena sy ny mahantra: samy nataon’ny TOMPO izy roa.

³Mahatsinjo ny loza ny malina ka miery; fa ny kely saina kosa mandroso ka voa.

⁴Ny vokatry ny fanetren-tena sy ny fanajana ny TOMPO dia harena sy voninahitra ary fiainana.

⁵Feno tsilo sy fandrika ny lalan’ny ratsy fanahy; koa izay te hiaro ny ainy dia manalavitra izany.

⁶Vao manomboka fiainana, dia omeo fizàrana tsara ny zaza; fa na rehefa antitra aza izy, dia tsy hiala amin’izany.

⁷Ny mpanankarena manapaka ny mahantra, ary izay misambotra dia andevon’ny mpampisambotra.

⁸Izay mamafy tsy fahamarinana dia hijinja fahoriana, fa ho levona ny fitaovam-pamoretany.

⁹Hotahîna izay manana fijery mangoraka, satria mizara ny haniny amin’ny mahantra izy.

¹⁰Roahy ny mpaniratsira fa hitsahatra ny fifandirana, ary hifarana koa na ny ady na ny fanalam-baràka.

¹¹Izay te ho sakaizan’ny mpanjaka dia handala eritreritra madio sy fiteny mahatehotia.

¹²Ny TOMPO miahy sy miaro ny tena fahalalana, fa mamaky bantsilana kosa ireo tenin’ny mpamadika.

¹³Hoy ny kamo hoe: «Misy liona ao ivelany ao; ka mety ho fatiny aho, raha eny an-dalambe.»

¹⁴Tevana lalina ny tenin’ny vehivavy vadin’olona, ka izay voaozon’ny TOMPO no hianjera ao[59].

¹⁵Latsa-paka ao am-pon’ny zaza ny hadalana, ka tsorakazom-pamaizana no hanongotra izany aminy.

¹⁶Izay mampahory ny mahantra dia mampahazo tombontsoa azy; izay manome ny mpanankarena dia mihamahantra[60].

¹⁷Atongilano ny sofinao ka henoy ny tenin’ny hendry ary aoka hotandremanao ny traikefa ananany.

¹⁸Ho hafinaretanao ny fitahirizana izany ao am-po; ary aoka izy tsy hiala eo amin’ny molotrao.

¹⁹Ny hanananao fitokiana ny TOMPO no ampahafantarako izany aminao anio.

²⁰Ho anao no nanoratako anatra telopolo izay feno torohevitra sy traikefa,

²¹mba hahafantaranao fa mitombina ireo fampianarana azo antoka ireo sy hanaovanao koa tatitra azo antoka amin’izay olona naniraka anao.

²²Aza manendaka ny mahantra, noho izy mahantra; ary aza mampahory tsy mana-mpiahy amin’ny fitsarana.

²³fa ny TOMPO hiaro azy amin’ny adiny, ka hipaoka ny ain’ireo nipaoka ny fananany.

²⁴Aza mety ho sakaizan’ny olona mora tezitra ary aza miaraka amin’ny olona saro-po,

²⁵fandrao hianatra ny fanaony ianao ka ho voasingotra hatramin’ny ainao.

²⁶Aza mety mandray tanan’olon-kafa ianao ho mariky ny fiantohanao trosan’ny namanao;

²⁷fa raha tsy manan-kaloa ianao, dia halaina mbamin’ny farafara fandrianao[61].

²⁸Aza mba mamindra ny baorina tranainy izay napetraky ny razanao ho faritry ny saha.

²⁹Jereo io olona manao tsara ny asany io: ho afa-miasa eo anatrehan’ny mpanjaka izy toy izay ho mpiasa tsy misy mpahalala.