Read Dikateny Iombonana Eto Madagasikara Ohabolana 23 Bible Online

Ohabolana 23 - Dikateny Iombonana Eto Madagasikara bible

Ohabolana 23

¹Raha miara-misakafo amin’ny manampahefana ianao, dia diniho tsara izay olona eo anoloanao[62].

²Raha toa ka tendan-kanina ianao, dia mba tsindrio ny fahazotoan-komanao.

³Aza mitsiriritra ny hanim-piny fa mety hanina mahavoafitaka izany.

⁴Aza misahirana hangoron-karena ary aza miana-kendry amin’izany.

⁵Tsy ho hitanao akory ny fahalaniany, satria toy ny manana elatra izy ka manidina toa voromahery eny an-danitra.

⁶Aza miara-komana amin’ny kahihitra ary aza mitsiriritra ny hanim-piny;

⁷fa samy hafa ny am-pony sy ny voalazany. Hoy izy aminao: «Mihinàna, misotroa»; nefa ny fony tsy miandany aminao akory.

⁸Haloanao aza izay mba nohaninao ary ho very maina ny teny mamy nataonao.

⁹Aza miteny eo an-tsofin’ny olona adala fa tsy horaharahainy akory ny tenim-pahendrenao.

¹⁰Aza mba mamindra ny baorina tranainy ary aza maka amin’ny tanin’ny kamboty,

¹¹fa mahery tokoa ilay mpiaro azy ka hisahana ny adiny aminao[63].

¹²Afantohy amin’ny fanabeazana ny sainao ary amin’ny tenim-pahalalana ny sofinao.

¹³Aza misalasala manafay ny zanakao, fa tsy ho faty izy akory raha kapohinao.

¹⁴Fa raha mikapoka azy ianao, dia ny fanahiny no ho voavonjinao tsy ho any amin’ny toeran’ny maty.

¹⁵Anaka, raha hendry ny fonao, dia ho faly koa ny foko.

¹⁶Ho tretrika tokoa aho, raha amim-pahitsiana no hitenenanao.

¹⁷Aza mialona ny mpanota, fa manajà ny TOMPO hatrany

¹⁸satria azo antoka fa misy ny hoavy ary tsy ho foana ny fanantenànao.

¹⁹Mihainoa ahy, anaka, ary hendre; ka mizora amin’ny lala-mahitsy.

²⁰Aza mikambana amin’ny mpimamo divay na ny mpiletra hena.

²¹Fa hihamahantra ny mpiboboka sy ny tendan-kanina, satria be torimaso ka hisaringo-boridamba.

²²Mihainoa ny rainao izay niteraka anao; ary aza manamavo ny reninao efa antitra.

²³Manàna toetra mahatoky, ka aza amidy izany; aza amidy koa ny fahendrena sy ny fanabeazana ary ny fahaiza-manavaka.

²⁴Ny ray niteraka olo-marina sy hendry; dia hibita-karavoana sy hifaly aminy;

²⁵omeo ny rainao sy ny reninao izany fifaliana izany; eny, aoka hibita-karavoana ilay reny niteraka anao.

²⁶Anaka, aoka hatoky ahy ny fonao ary aoka ny masonao hifaly amin’ny sori-dalako.

²⁷Fa mampidi-doza toy ny hady lalina ny mpivarotena ary toy ny lava-pantsakana ety ny vehivavy vadin’olona[64];

²⁸manotrika toy ny mpangalatra ireo, ary manamaro ny lehilahy mpanitsakitsa-bady.

²⁹Ho an’iza ny alahelo? Ho an’iza ny nenina? Ho an’iza ny fifandirana? Ho an’iza ny toloko? Ho an’iza ny ratra tsy amin’antony? Ho an’iza ny maso mandroroa?

³⁰Ho an’izay mitaraikiraiky amin’ny divay sy ho an’izay tsy mitsaha-manandrana fisotro mifangaro misy alikaola.

³¹Aza mijery ny divay mena izay manganohano ao anaty kaopy. Hikoriana moramora ao an-tendanao izy,

³²nefa amin’ny farany hanaikitra toy ny bibilava ary hanindrona toy ny menarana misy poizina.

³³Hahita zavatra hafahafa ny masonao; ary resaka mifanjevo no avoakan’ny eritreritrao.

³⁴Hihevi-tena ho any afovoan’ny ranomasina ianao ka ho toy izay mandry eny an-tampon’ny lain-tsambo.

³⁵Dia hoy ianao anakampo hoe: «Nisy nikapoka aho nefa tsy naharary! Nisy nively aho nefa tsy tsaroako akory! Raha vantany vao taitra ange aho, dia hangataka hisotro indray!»