Read Dikateny Iombonana Eto Madagasikara Ohabolana 24 Bible Online

Ohabolana 24 - Dikateny Iombonana Eto Madagasikara bible

Ohabolana 24

¹Aza mitsiriritra ny ratsy fanahy na maniry hiaraka aminy.

²Fa tsy misaina afa-tsy fandravana ny fony, ary tsy miteny afa-tsy faharatsiana ny molony.

³Ilàna fahendrena ny fanorenan-trano, ilàna fahaizana ny hahamafy azy;

⁴ilàna fahalalana ny famenoana azy fanaka soa sy sarobidy ao anatiny.

⁵Aleo hendry toy izay matanjaka; ary aleo manam-pahalalana toy izay mihetraketraka[65].

⁶Tetika voarindra no hitondranao ny ady; ary tolotsaina maro no ahazoam-pandresena.

⁷Avo tsy takatry ny adala ireo tenim-pahendrena, ka tsy mba manoka-bava izy eo am-bavahady[66].

⁸Izay misaintsaina ny hanao ratsy no atao hoe mpanao tetika maizina;

⁹ny tetika ataon’ny adala dia fahotana, ary halan’ny olona ny mpaniratsira.

¹⁰Raha osa amin’ny androm-pahoriana ianao, dia kely dia kely herim-po tokoa!

¹¹Aza misalasala mamonjy ireo voaheloka ho faty kanefa tsy mitombina ny antony amonoana azy.

¹²Raha hoy ianao hoe: «Tsy fantatro izany», dia mahatakatra an-tsaina izany kosa Ilay mahita ny ao am-po tsy miloaka ary mahalala izany Ilay mandinika anao; sady hovaliany araka ny asany avy ny olona[67].

¹³Anaka, mihinàna tantely fa tsara izany; ary ho mamy am-bavanao ny tohony.

¹⁴Aoka ho fantatrao fa toy izany koa ny hatsàran’ny fahendrena ho anao. Koa raha anananao izany, dia hisy ny hoavy handrandrainao ary tsy ho foana ny fanantenànao.

¹⁵Ry ilay olon-dratsy, aza anaovanao otrika eo akaikin’ny tranon’ny olo-marina, ary aza ravanao ny fonenany;

¹⁶satria mety lavo impito ny olo-marina, kanefa tafarina ihany, fa ny olon-dratsy kosa mianjera rehefa injay idiran-doza.

¹⁷Aza mifaly, raha lavo ny fahavalonao; ary aza mibitaka, raha mianjera izy.

¹⁸Fandrao hitan’ny TOMPO amin’ny maso ratsy izany, ka tsy ho tezitra amin’ny fahavalonao intsony Izy.

¹⁹Aza tezitra amin’ny mpanao ratsy ary aza mialona ny olon-dratsy;

²⁰fa tsy mba manana hoavy handrandraina ireo ary ho faty toy ny jiro mitsilopy ny fiainany.

²¹Anaka, manajà ny TOMPO ary koa ny mpanjaka; aza ikambananao ireo mitady hikomy aminy.

²²Fa hanjò azy tampoka ny antambo; ary iza no mahalala izay loza hataon’ny Tompo sy ny mpanjaka aminy?

²³Izao koa dia mbola avy amin’ny hendry: Tsy tsara ny manao fitsarà-mitanila.

²⁴Izay mpitsara manao amin’ny meloka hoe: «Tsy manan-tsiny ianao», dia hozonin’ny vahoaka ary hankahalain’ny firenena.

²⁵Fa izay mpitsara manameloka ny diso kosa dia ho finaritra sy hiantefan’ny laza tsara.

²⁶Porofom-pihavanana tena izy ny valinteny omena am-pahatsorana.

²⁷Vitao aloha ny asanao any ivelany ary ataovy vonon-kamokatra ny saha, vao izay ianao no manangana ny tranonao.

²⁸Aza mety ho vavolombelom-poana hanameloka tsy amin’antony ny namanao; sa ianao ve te hamitaka amin’ny teninao?

²⁹Aza manao hoe: «Hataoko aminy izay nataony tamiko, hovaliako araka ny asany ny olona tsirairay!»

³⁰Nandalovako, indray andro, ny sahan’ny kamo sy ny tanimboaloboky ny tsy ampy saina.

³¹Indro tsilo sy ahidratsy sisa no hitako hatraiza hatraiza; ary ny fefy vato manodidina dia nirodana.

³²Nandinika ny zavatra hitako aho ka nahazo lesona avy aminy:

³³matory kely ianao, rendremana kely, dia mitsotsotra kely manohon-tanana;

³⁴amin’izay anefa dia hamely anao tampoka toy ny mpisodisody ny fahantrana ary toy ny jiolahy ny fahoriana[68].