Read Dikateny Iombonana Eto Madagasikara Ohabolana 28 Bible Online

Ohabolana 28 - Dikateny Iombonana Eto Madagasikara bible

Ohabolana 28

¹Mandositra ny olon-dratsy na dia tsy misy manenjika azy, fa ny olo-marina kosa matoky tena toy ny liona tanora.

²Rehefa mikorontana ny tany, dia maro mpitondra mifanolosolo. Fa manjaka kosa ny filaminana noho ny olona iray manan-tsaina sy mahay.

³Tahaka ny oram-batravatra izay mandrava vokatra ny olon-dozabe[77] izay mampahory ny mahantra.

⁴Izay mahafoy ny lalàna dia mandoka ny olon-dratsy, fa izay mitandrina izany kosa miady aminy.

⁵Ny olon-dratsy tsy mahafantatra ny rariny, fa izay mitady ny TOMPO mahalala ny zava-drehetra.

⁶Aleo ny mahantra mizotra tsy misy tsiny, toy izay ny mpanankarena miolikolika fitondrantena.

⁷Ny zanaka manana fahaiza-manavaka dia mitandrina ny lalànan’ny Tompo; fa izay misakaiza amin’ny naman-dratsy dia manome henatra ny rainy.

⁸Izay mitombo harena amin’ny zana-bola mihoa-pampana dia manangona ho an’izay miantra ny mahantra.

⁹Izay manampin-tsofina tsy hihaino ny lalàna, na ny vavaka ataony aza dia maharikoriko ny Tompo.

¹⁰Izay mitarika ny olo-mahitsy amin’ny lalan-dratsy dia mamarin-tena amin’ny fandrika nataony; fa hahazo hasambarana kosa ny olona tsy misy tsiny.

¹¹Mihevi-tena ho hendry ny mpanankarena, fa hamaky bantsilana azy ny mahantra mahay manavaka.

¹²Rehefa mandresy ny olo-marina, dia ankalazain’ny besinimaro; fa rehefa ny olon-dratsy no mahery, dia ieren’ny olona.

¹³Izay manafina ny fahotany tsy mba hahita fahombiazana, fa izay miaiky izany ka miala aminy no hahazo indrafo.

¹⁴Sambatra ny olona izay manaja ny Tompo mandrakariva, fa izay manamafy ny fony kosa hidiran-doza.

¹⁵Tahaka ny liona mierona sy orsa noana ny olon-dratsy izay manapaka amin’ny vahoaka mahantra.

¹⁶Mampitombo famoretana ny mpanapaka tsy ampy saina; fa ho ela velona kosa izay mankahala fierenana.

¹⁷Handositra hatrany am-pasana ny olona izay enjehin’ny eritreriny noho izy nahafaty olona: aoka tsy hisy hisakana azy!

¹⁸Izay mizotra tsy misy tsiny no ho voavonjy fa izay miolikolika fitondrantena no ho lavo tampoka.

¹⁹Izay miasa ny taniny ho voky hanina, fa izay mamboly hevidravina kosa ho voky fahantrana.

²⁰Ho ampoky ny fitahiana ny olona mahatoky fa tsy hieren-doza kosa ny maika hanan-karena.

²¹Tsy tsara ny mizaha tavan’olona; kanefa na dia sombi-mofo ihany aza dia mety hanotan’ny olona amin’izany.

²²Maika ny hanan-karena ny mpitsiriritra saingy tsy fantany fa ho avy aminy ny fahantrana.

²³Izay mananatra olona dia hahazo sitraka bebe kokoa amin’ny farany noho izay manao teny mandodoka azy.

²⁴Izay mandroba ny rainy sy ny reniny ka manao hoe: «Tsy fahotana izany», dia naman’ny jiolahy.

²⁵Ny olona tia tena loatra no manetsika ady; fa izay matoky ny TOMPO kosa ho tretrika.

²⁶Adala izay mitompo teny fantatra, fa izay mandeha amim-pahendrena no ho voavonjy.

²⁷Izay manome ny mahantra tsy hanan-java-mahory, fa izay mikimpy tsy mijery azy kosa ho rakotra ozona.

²⁸Rehefa mahery ny olon-dratsy, dia ieren’ny olona; fa rehefa ringana kosa ireo, dia ny olo-marina no mitondra.