Read Dikateny Iombonana Eto Madagasikara Ohabolana 3 Bible Online

Ohabolana 3 - Dikateny Iombonana Eto Madagasikara bible

Ohabolana 3

¹Anaka, aza manadino ny fampianarako; ary aoka ho voatandron’ny fonao ny didiko.

²Fa andro lava sy taona maro iainana ka hiadam-pinaritra hatrany no ho vokatr’ireny ho an’ny tenanao:

³Aoka tsy hialanao mihitsy ny fitiavana sy ny toetra mahatoky; kajio toa firavaka fiambozonanao izany, ary soraty ao am-ponao toy ny amin’ny vatofisaka.

⁴Fa hahita sitraka sy fahombiazana ianao eo imason’Andriamanitra sy ny olona.

⁵Matokia ny TOMPO amin’ny fonao manontolo, fa aza miantehitra amin’ny fahakingan-tsainao.

⁶Mieke Azy amin’izay rehetra alehanao, dia hatorony anao ny soritra harahinao.

⁷Aza manao ny tenanao ho hendry, fa hajao ny TOMPO ka ialao ny ratsy[9].

⁸Hanasitranana ny tenanao izany ary hamelombelomana ny taolanao.

⁹Anomezo voninahitra ny TOMPO ireo fanananao sy izay voaloham-bokatrao rehetra.

¹⁰Dia ho feno vary mitafotafo ny sompitrao; ary hihoatra ny barika fanantazanao azy ny divay.

¹¹Anaka, aza hamavoinao ny famaizan’ny TOMPO ary aza tofoka amin’ny fananarany.

¹²Fa izay tian’ny TOMPO no anariny toy ny ataon-dray amin’ny zanany malala[10].

¹³Sambatra izay olona nahita ny fahendrena sy izay olona nahazo ny fahaiza-manavaka.

¹⁴Fa ny fananana azy dia tsara noho ny fananana volafotsy ary ny tombontsoany dia mihoatra noho ny volamena.

¹⁵Sarobidy noho ny voahangy ny fahendrena; ary izay rehetra azo irina dia tsy misy mitovy aminy[11].

¹⁶Mahaela velona ny fahendrena etsy an-kilany ary mampahazo harena sy haja etsy an-daniny.

¹⁷Lalana mahafinaritra ny lalany; ary antoky ny fiadanana ny sakeli-dalany rehetra.

¹⁸Hazon’aina sy fahasambarana ny fahendrena ho an’izay mitana azy sy mifikitra aminy[12].

¹⁹Fahendrena sy fahaiza-manavaka no nanorenan’ny TOMPO ny tany sady nahariany ny lanitra.

²⁰Ny fahaizany no nampiboiboika rano avy any an-kibon-tany lalina any sy mampitosaka orana avy amin’ny rahona[13].

²¹Anaka, ny fahamalinana sy ny fahaiza-mandinika no ifikiro ka imasoy hatrany.

²²Fa ho antoky ny fiainana ho anao izany sady sarobidy toa firavaka fiambozonanao.

²³Handroso amim-pahatokiana ianao ka tsy hosolafa-mamindra.

²⁴Tsy hatahotra ianao rehefa miala sasatra, ary ho tafandry mandry rehefa matory.

²⁵Aza manahy ny fampitahoran’ireo adala na ny famelezan’ny olon-dratsy, raha tonga izany.

²⁶Fa ny TOMPO no ho tokinao ka hiaro ny tongotrao tsy ho voafandrika.

²⁷Aza misalasala manao soa amin’izay mila izany raha azonao atao ihany.

²⁸Aza manao amin’ny namanao hoe: «Miverena fa rahampitso aho manome», raha manan-komena azy izao ianao.

²⁹Aza mikendry hanisy ratsy namana izay mitoetra amin-toky eo anilanao.

³⁰Aza miady tsy amin’antony amin’olona, raha tsy mbola nanisy ratsy anao izy.

³¹Aza mialona ny mpanao an-keriny ary aza misy alain-tahaka ny ataony,

³²satria halan’ny TOMPO ny mpaniasia fa ny olo-marina kosa isakaizany fatratra.

³³Ozonin’ny TOMPO ny tranon’ny olon-dratsy fa ny fonenan’ny olo-marina kosa tahîny.

³⁴Maniratsira izay mpaniratsira Azy Izy nefa kosa manome fahasoavana ny manetry tena[14].

³⁵Haja no anjaran’ny hendry fa henatra kosa ny an’ireo adala.