Read Dikateny Iombonana Eto Madagasikara Ohabolana 31 Bible Online

Ohabolana 31 - Dikateny Iombonana Eto Madagasikara bible

Ohabolana 31

¹Izao no torohevitra izay noraisin’i Lemoela mpanjakan’i Masà tamin-dreniny[83]:

²«Inona, anaka, inona no holazaiko anao zanako naterako izay efa nangatahiko am-bavaka?

³Aza omena ny vehivavy ny herinao. Aoka tsy ireo vehivavy manimba mpanjaka no hibaiko ny fitondrantenanao!

⁴Tsy mety amin’ny mpanjaka, ry Lemoela, tsy mety amin’ny mpanjaka na mpifehy ny miboboka divay na toaka.

⁵Fa raha miboboka izany izy, dia hanadino ny fampiharan-dalàna ary hamadika ny zon’ireo olona mahantra.

⁶Aoka izay efa ho faty no homena toaka ary izay fadiranovana no hotoloran-divay;

⁷dia hiboboka izy hanadinoany ny fahoriany ary tsy hahatsiarovany ny fahantrany intsony.

⁸Sokafy ny vavanao hiaro izay tsy afa-miteny sy hiady ho an’ny olona rehetra tsy mana-mpiahy.

⁹Sokafy ny vavanao mba hitsara araka ny marina ary hiady ho an’ny ory sy ny mahantra[84]».

¹⁰Iza no mahita vehivavy mahavatra? Fa ny hasarobidiny dia mihoatra noho ny perla.

¹¹Matoky azy tanteraka ny vadiny, satria tsy mandanilany fananana izy.

¹²Tsy manao ratsy aminy ravehivavy fa manao izay hahasambatra azy kosa mandritra ny andro rehetra iainany.

¹³Mitady volon’ondry sy kiran-drongony izy ary miasa araka ny fahakingan’ny tanany.

¹⁴Tahaka ny sambon’ny mpandranto izy ka mitondra ny haniny avy lavitra.

¹⁵Mifoha mbola maizina izy, ka mikarakara ny sakafon’ny ankohonany sy mitsinjara ny asan’ny mpanompovaviny.

¹⁶Mandinika tsara izy vao mividy saha ary mamboly voaloboka amin’ny tombontsoa azony.

¹⁷Misikina herimpo izy fa tsy mba miraviravy tanana.

¹⁸Tsapany ny fandrosoan’ny raharahany ka tsy maty jiro mandritra ny alina izy.

¹⁹Miasa mamoly volon’ondry ny tanany ary manenona lamba ny rantsan-tanany.

²⁰Manatsotra ny tanany amin’ny ory izy ary malala-tanana amin’ny mahantra.

²¹Tsy ahiany amin’izay oram-panala ny ankohonany, fa voatafy mafana avokoa ny ao an-tranony.

²²Manao firakotra ho an’ny tenany izy; ny fitafiany dia rongony fotsy sy volomparasy.

²³Hajaina ny vadiny rehefa mivory eo am-bavahady ka miara-midinika amin’ireo loholon’ny tanàna.

²⁴Manao akanjo izy ka mivarotra izany; mandafo fehikibo amin’ny mpandranto koa izy.

²⁵Hery sy haja no iravahany; ary tsy mahataitra azy ny hoavy.

²⁶Miteny amim-pahendrena izy ary manoro hevitra amim-pitiavana.

²⁷Manara-maso izay fizotry ny ankohonany izy ka tsy malaina manomana ny sakafo hohaniny.

²⁸Ny zanany miara-miantso azy hoe sambatra, ary ny vadiny midera azy manao hoe:

²⁹«Maro ny vehivavy miseho ho mahavatra, fa manoatra noho izy rehetra ianao.»

³⁰Mamitaka ny bika ary mandalo ny hatsaran-tarehy; fa ny vehivavy manaja ny TOMPO ihany no hoderaina.

³¹Hanomezam-pankasitrahana azy anie ny tombontsoa azony ary hideran’ny besinimaro azy anie ny zava-bitany!