Read Dikateny Iombonana Eto Madagasikara Ohabolana 4 Bible Online

Ohabolana 4 - Dikateny Iombonana Eto Madagasikara bible

Ohabolana 4

¹Henoy, rey anaka, ny anatry ny ray ary milofosa hahalala ny fahaiza-manavaka.

²Fa torohevitra mahasoa no omeko anareo; aza mahafoy ny fampianarako.

³Izaho koa mba zanaka mamin-draiko ary malalan-dreniko toy ny lahitokany.

⁴Nampianatra ahy i dada ka nanao tamiko hoe: «Tano mafy ao am-ponao ny teniko; tandremo ny didiko, dia ho velona ianao.

⁵Mahazoa fahendrena sy fahaiza-manavaka; ka aza misy hadinoina na ialana ireo teny aloaky ny vavako.

⁶Aza mahafoy ny fahendrena, dia harovany ianao; tiavo izy, dia hiambina anao.

⁷Ny voalohan-tanjon’ny fahendrena dia izao: mahazoa fahendrena; koa izay rehetra anananao no ahazoy fahaiza-manavaka.

⁸Fenjao ny fahendrena, dia hanandratra anao; eny, ho voninahitrao izy raha fihininao.

⁹Hasiany diadema soa eo an-dohanao ary homeny satroboninahitra marevaka ianao.

¹⁰Henoy ka raiso, anaka, ny teniko; dia ho ela velona ianao[15].

¹¹Hampianariko ny làlam-pahendrena ianao ary hotarihiko amin’ny soritra mahitsy.

¹²Tsy ho voasembantsembana ianao raha mandeha, ary tsy ho tafintohina raha mihazakazaka.

¹³Tano mafy izay nanabeazana anao ka aza avela. Tehirizo izany fa foto-piainanao.

¹⁴Aza mankany amin’ny falehan’ny olon-dratsy ary aza mizotra amin’ny lalan’ny mpanao ratsy.

¹⁵Halaviro fa aza lalovana akory izany, ary ialao ka mizora lavidavitra kokoa.

¹⁶Tsy matory ireny raha tsy efa nanao ratsy ary tsy mahita tory raha tsy efa nanafintohina olona.

¹⁷Fa ny faharatsiana no mofo fihinany isan’andro; ary ny herisetra no divay fisotrony.

¹⁸Ny fitondrantenan’ny olo-marina dia toy ny fahazavan’ny maraina izay mihamazava mandra-pahantoandro ny andro.

¹⁹Fa ny toetran’ny olon-dratsy fanahy kosa toy ny haizim-pito ka tsy fantany akory izay hanafintohina azy.

²⁰Anaka, tandremonao ny teniko ka henoy tsara izay lazaiko.

²¹Imasoy hatrany ireo ary tehirizo ao am-ponao.

²²Fa aina ho an’izay mandray azy tokoa ireo ary fahasalamana ho an’ny tenany manontolo.

²³Tandremo izay eritreretin’ny fonao fa izany no iankinan’ny fiainanao.

²⁴Ambeno tsy hiteny lainga ny vavanao na hilaza fitaka ny molotrao.

²⁵Aoka hifantoka amin’ny olona ny masonao ka hibanjina tsara eo anoloanao.

²⁶Savao lalana ny tongotrao; aoka ho azo antoka avokoa ny famindranao[16].

²⁷Aza mivily miankavanana na miankavia; halaviro ny tongotrao ny ratsy.