Read Dikateny Iombonana Eto Madagasikara Ohabolana 5 Bible Online

Ohabolana 5 - Dikateny Iombonana Eto Madagasikara bible

Ohabolana 5

¹Anaka, tandremonao ny tenim-pahendreko ary anongilano sofina ny tenim-pahalalako,

²mba hitandroanao ny fisainana mazava ary mba hitenenanao amim-pahaizana.

³Eny, mamy toy ny tantely avy amin’ny tohotra ny firesaky ny vehivavy ratsy fitondrantena; ary malama noho ny menaka aza ny fiteniny.

⁴Nefa ny farany mafaitra toy ny hazo mangidy ary mandratra hoatra ny sabatra roa lela.

⁵Fa midina ho amin’ny fahafatesana ny fizotran’izany vehivavy izany; ary miafara any amin’ny toeran’ny maty ny diany[17].

⁶Tsy manaraka ny lalana ho amin’ny fiainana izy fa diso lalana tsy mahafantatra izay alehany.

⁷Koa ankehitriny, anaka, henoinao Aho. Aza miala amin’ny teniko.

⁸Halaviro ny lalanao ny vehivavy toy izany ary aza manakaiky ny tokonam-baravarany,

⁹fandrao homeny ny hafa ny voninahitrao ary ho voagejan’izay lehilahy lozabe ny taonanao.

¹⁰Ka vahiny no hivoky amin’ny fanananao, olon-kafa no hitavana amin’ny vokatry ny asanao;

¹¹dia hitoloko ianao amin’ny farany, rehefa mihaosa ny tenanao ama-nofonao.

¹²Dia iny ianao fa hilaza hoe: «Nahoana re no nankahala famaizana aho sy naniratsira fananarana,

¹³ka tsy nihaino ny tenin’ireo mpanabe ahy ary tsy nanongilan-tsofina tamin’ireo mpampianatra ahy?

¹⁴Efa saiky rembin’ny faharatsiana isan-karazany aho ary saiky voailiky ny fiangonana sy ny fiaraha-monina.»

¹⁵Ny vadinao dia tahaka ny loharano madio sy toy ny fantsakana ho anao; koa misotroa aminy.

¹⁶Fa aza avela hikoriana sy hipariaka eny an-dalambe fotsiny ny ranony.

¹⁷Aoka ho anao samirery izany fa aza ikambanana amin-kafa!

¹⁸Hotahina anie izany loharano madio izany, dia ilay vadinao hatry ny fahatanoranao, ka mifalia aminy mandrakariva.

¹⁹Fa toy ny dieravavy mahatehotia sy toy ny gazela mahafinaritra ny vadinao. Hahafeno haravoana anao anie ny hatsaram-bikany ary hahasambatra anao mandrakariva ny fitiavany!

²⁰Koa nahoana ianao, anaka, no ho raiki-pitia amin’izay vehivavy vadin’olon-kafa ka manolo-tena hanafosafo azy?

²¹Fa izay toetran’ny lehilahy tsirairay dia eo imason’ny TOMPO hatrany ka dinihiny avokoa izay izorany.

²²Ny heloky ny olon-dratsy dia mamandri-tena, ka ny fahotany ihany no maningotra azy.

²³Ho fatin’ny tsy fahaiza-mifehy tena izy, ka ho very noho ny hadalàny mihoa-pampana.