Read Dikateny Iombonana Eto Madagasikara Ohabolana 6 Bible Online

Ohabolana 6 - Dikateny Iombonana Eto Madagasikara bible

Ohabolana 6

¹Anaka, niantoka trosan’ny namanao ve ianao ka nandray tanan’olon-kafa[18] ho marik’izany?

²Namatotra sy naningotra anao ve ny teny sy fampanantenana voalazanao?

³Raha eny, dia izao no ataovy, anaka, mba hahafaka ny tenanao izay efa mby eo an-tanan’ny namanao: mandehana mitalaho mafy aminy.

⁴Aza miala sasatra mihitsy na matory mandra-panaikin’io namanao io.

⁵Afaho ny tenanao, ka tahafo ny gazela sy ny vorona izay afa-miala amin’ny fandrika nihazonana azy[19].

⁶Mankanesa any amin’ny vitsika, ry ilay kamo[20]. Diniho ny fanaony, ka mba hendre[21].

⁷Tsy manana komandy na mpifehy na mpibaiko izy,

⁸nefa mamory ny haniny raha fahavaratra ary manangona ny sakafony raha fararano.

⁹Fa ianao kosa, ry ilay kamo, mandra-pahoviana no mbola handrianao? Rahoviana ihany ianao vao hifoha?

¹⁰Mbola hatory kely sy ho rendremana kely ianao ary hanohon-tanana kely eo am-pandriana ihany.

¹¹Amin’izay anefa dia hamely anao tampoka toy ny mpisodisody ny fahantrana ary toy ny jiolahy ny fahoriana.

¹²Tsy valahara sady tsy misy ilana azy ny olona mpamafy lainga.

¹³Mipi-maso hamitaka ny hafa izy sady miantso amin’ny tongony no manao famantarana amin’ny rantsan-tanany.

¹⁴Hafetsifetsena no mameno ny fony ka mampihevi-dratsy azy mandrakariva sy mahatonga azy hamafy ady.

¹⁵Izany no hampiavy tampoka ny faharavàny; fa ho potika vetivety tsisy fanafana izy.

¹⁶Misy zavatra enina izay halan’ny TOMPO ka tsy zakany mihitsy, dia ireto: ny fijery miavonavona, ny fiteny mandainga, ny tanana mahafaty olon-tsy manan-tsiny, ny fo mamorona teti-dratsy, ny tongotra dodon-kihazakazaka hanao ratsy, ny vavolombelona mandainga sy manendrikendrika. Fa misy koa zavatra fahafito, dia ny olona mpamafy ady amin’ny rahalahiny.

²⁰Anaka, tandremo ny didin-drainao ary aza lavina ny fampianaran-dreninao.

²¹Araiketo mandrakariva ao am-ponao ireo, ary kajio toa firavaka fiambozonanao.

²²Hitari-dalana anao izy raha mandeha ianao, hiambina anao raha matory ianao ary hanoro hevitra anao raha mifoha ianao.

²³Fa tahaka ny jiro ny didy toy ny fanilo ny fampianarana, ary toy ny sori-dalam-piainana ireo famaizam-panabeazana,

²⁴ka hiaro anao amin’ny vehivavy ratsy fitondrantena sy amin’ny fanangolen’ny vehivavy vadin’olon-kafa[22].

²⁵Aza mitsiriritra ny hatsaran-tarehiny ianao ary aza babon’ny masony mitsipalopalotra.

²⁶Vidin-tapa-mofo no ahazoan-dehilahy ny vehivavy mpivarotena iray; fa mihaza remby lafo vidy kosa ny vehivavy mpanitsakitsa-bady.

²⁷Misy olona mitondra afo amin’ny paosin’akanjony ve ka tsy hirehitra akanjo?

²⁸Misy olona manitsaka vain’afo ve ka tsy ho may tongotra?

²⁹Dia toy izany fa tsy hieren-doza izay mandry amin’ny vadin’ny namany.

³⁰Tsy omen-tsiny akory ny mpangalatra, raha toa ka mandroba hampitony hanoanana.

³¹Fa raha tratra kosa izy, dia hanonitra impito heny ka hanome izay ananany rehetra ao an-tranony.

³²Adala izay lehilahy mangala-badin’olona; manimba tena ny manao izany.

³³Fa hijinja aretina sy fahafaham-baràka izy ka tsy ho afa-kenatra mandrakizay.

³⁴Satria ny fahasaro-piaro dia hampisafoaka ny vadin’izany vehivavy izany; ka tsy hiantra rafilahy izy amin’ny andro hamaliany faty.

³⁵Tsy hanaiky handray onitra izy ary tsy hety hilefitra mihitsy, na dia hotambazana fanomezana be aza.