Read Dikateny Iombonana Eto Madagasikara Ohabolana 7 Bible Online

Ohabolana 7 - Dikateny Iombonana Eto Madagasikara bible

Ohabolana 7

¹Anaka, tandremonao ny teniko ary ataovy raki-tsoa ho anao ny didiko.

²Tandremo ny didiko, dia ho velona ianao; ary tandremo toy ny anakandriamaso ny fampianarako.

³Ataovy toy ny peratra amin’ny rantsan-tananao ireo ary soraty ao am-ponao toy ny amin’ny vatofisaka.

⁴Hevero toy ny anabavinao ny fahendrena ary toy ny havanao ny fahalalana;

⁵ireo no hiaro anao amin’ilay vehivavy mpanitsakitsa-bady dia vehivavy hafa mpanao teny manangoly.

⁶Raha teo am-baravarankelin’ny tranoko aho no mba nitazantazana indray andro,

⁷dia nahita tovolahy maromaro; ary tamin’ireo no nisy anankiray kely saina,

⁸dia tanora maivan-doha izay nandeha tamin’ny lalana akaikin’ny fonenan’izany vehivavy izany ka nizotra nankany an-tranony.

⁹Efa somambisamby ny takariva tamin’izay ary efa manakaiky ny alina sy ny haizina.

¹⁰Indro tamy nitsena azy ilay vehivavy sady nanao fitafin’ny mpivarotena no feno hafetsifetsena ao am-po.

¹¹Sahisahy sady tsy mahatombin-tsiraka izy ka tsy mety tafapetraka ao an-tranony.

¹²Fa mbetika eny an-dalambe, mbetika eny an-kianja no mamitsaka miandriandry izy eny amin’ny zoron-trano rehetra eny.

¹³Dia nisavika ilay tovolahy izy ka nanoroka azy ary nisolantsolana nilaza taminy hoe:

¹⁴«Efa nivoady tamin’Andriamanitra aho fa hanatitra sorom-pihavanana; ary androany no nanefako izany[23].

¹⁵Koa nivoaka ny tranoko hitsena anao aho; te hahalala anao aho, ka dia nahita anao.

¹⁶Ny fandriako efa novelarako firakotra, dia lambam-pandriana avy any Ejipta

¹⁷ka nasiako miora sy alôesy ary kanelina hanamanitra azy.

¹⁸Andeha isika hivoky fitia mandra-paharain’ny andro ka hiara-mankafy ny fahafinaretana vokatr’izany.

¹⁹Fa tsy ao an-trano ny vadiko fa lasa nandeha lavitra.

²⁰Kitapo feno vola no nentiny, ka tsy hiverina izy raha tsy fenomanana indray ny volana.»

²¹Teny mamy no nandreseny lahatra ilay tovolahy ary resaka manodòka nataony no nitaomany azy.

²²Koa nanaraka an-dravehivavy teo no ho eo izy tahaka ny ombilahy entina hovonoina: adala voafatotra toy izany izy no hofaizina

²³mandra-pitsatoky ny zana-tsipîka amin’ny fony; tahaka ny vorona miriotra mankamin’ny harato izy, ka tsy mahalala fa hahafaty azy izany.

²⁴Koa ankehitriny henoinareo aho, rey anaka, ary tandremo tsara ny teny aloaky ny vavako.

²⁵Aoka tsy ho babon’ny vehivavy toy izany ny fonareo, ary aza mania mankany amin’ny sakeli-dalany.

²⁶Fa maro no efa naratrany ka simbany ary tsy tambo isaina ireo rehetra efa matiny.

²⁷Ny tranony no lalana ho amin’ny toeran’ny maty, dia lala-midina any am-ponenan-dRafahafatesana.