Read Dikateny Iombonana Eto Madagasikara Ohabolana 9 Bible Online

Ohabolana 9 - Dikateny Iombonana Eto Madagasikara bible

Ohabolana 9

¹Nanangana ny tranony ny Fahendrena[28], rehefa avy nipaika ireo andry fito.

²Novonoiny ireo bibiny, noharoharoiny ny divainy ary namboariny ny latabany.

³Ireo mpanompovaviny no nirahiny eny amin’ny toerana avo indrindra ao an-tanàna mba hiantsoantso izao fanasana izao:

⁴«Ianareo kely saina, mankanesa atỳ». Ireo bado koa dia nampilazany hoe:

⁵«Avia mihinana amin’ny mofoko ary misotro amin’ny divay nomaniko.

⁶Ialao ny hakelezan-tsaina, dia ho velona ianareo! ka mizora amin’ny lalan’ny fahaiza-manavaka.»

⁷Izay mananatra ny mpaniratsira dia hahazo fanarabiana; ary izay manaraka ny olon-dratsy dia ho afa-baràka.

⁸Aza mananatra ny mpaniratsira, fandrao hankahalainy ianao; fa ny hendry no anaro, dia ho tiany ianao.

⁹Manomeza ho an’ny hendry, dia hihahendry izy; ampianaro ny olo-marina, dia hitombo traikefa izy.

¹⁰Ny fanajana ny TOMPO no loharanom-pahendrena[29]. Ny fahalalana Ilay Masina no tena fahaiza-manavaka.

¹¹Eny, izaho Fahendrena no mahamaro ny andronao sy mampahalava ny taona hiainanao[30].

¹²Raha hendry ianao, dia tombontsoa ho anao izany. Fa raha miavonavona kosa ianao, dia ianao ihany no hilanja ny vokany.

¹³Ny Fahadalana[31] dia toy ny vehivavy mpitabataba, kely saina ary tsy manam-pahalalana.

¹⁴Mipetraka amin’ny seza izy eo am-baravaran’ny tranony, eny amin’ny toerana avo ao an-tanàna,

¹⁵mba hiantso ny mpandalo izay mizotra amin’ny alehany avy hoe:

¹⁶«Ianareo kely saina, mankanesa atỳ». Hoy koa izy tamin’ireo bado:

¹⁷«Mamy ny rano nangalarina ary matsiro ny mofo hani-miafina».

¹⁸Tsy fantatr’ireo fa ny maty no ao, ary efa any amin’ny toeran’ny maty no mihitsoka ireo nasain’ny fahadalana.