Read Dikateny Iombonana Eto Madagasikara Kôheleta 1 Bible Online

Kôheleta 1 - Dikateny Iombonana Eto Madagasikara bible

Kôheleta 1

¹Izao no tenin’i Kôheleta, zanakalahin’i Davida sady mpanjaka tao Jerosalema[1].

²Hoy i Kôheleta hoe: «Zava-poana dia zava-poana izao rehetra izao, eny, zava-poana ny zava-drehetra.»

³Miasa mafy ny olona etỳ ambonin’ny tany, nefa tsy misy voka-tsoa azony amin’izany.

⁴Lasa ny taranaka iray, dia tonga ny iray hafa mandimby azy; nefa izao tontolo izao mbola maharitra hatrany.

⁵Miposaka ny masoandro, milentika ny masoandro, ary maika erỳ hiverina any amin’izay niaingany.

⁶Mbetika ny rivotra mitsoka mianatsimo, mbetika mitsoka mianavaratra. Mitsoka ny rivotra dia mitambolina ary mamerina ny fihodinany indray.

⁷Mivarina any an-dranomasina ny ony rehetra, nefa tsy mety feno ny ranomasina, na dia tsy an-kiato aza no ivarinan’ny ony amin’izany toerana izany.

⁸Tsy misy mihitsy afaka hilaza hoe hatraiza izany fitamberimberenan’ny zava-drehetra izany: fa ny maso tsy mba monai-mijery ary ny sofina tsy mba leon’ny mihaino.

⁹Izay efa teo ihany no mbola ho tonga indray, ary izay efa natao ihany no mbola hatao indray. Fa tsy misy zava-baovao akory izay rehetra mitranga etỳ ambonin’ny tany.

¹⁰Raha misy zavatra lazaina hoe: «Jereo fa zava-baovao ity!», dia izay efa nisy ela talohantsika ihany izany.

¹¹Fa nohadinointsika kosa ireo razantsika fahagola. Ary ireo olona handimby antsika koa dia tsy hotsarovan’izay handimby azy.

¹²Izaho Kôheleta dia nanjaka teo amin’ny vahoakan’i Israely tao Jerosalema.

¹³Tsy niroa fo tokoa aho nikaroka sy namantatra amim-pahendrena ny zava-drehetra atao etỳ ambonin’ny tany. Asa mafy ampanaovin’Andriamanitra ny olona izany.

¹⁴Efa hitako ny zava-drehetra atao etỳ ambonin’ny tany, fa zava-poana sy manenji-drivotra ihany izany rehetra izany.

¹⁵Satria izay mibiloka dia tsy azo ahitsy intsony; ary ny tsy misy tsy azo isaina.

¹⁶Hoy aho anakampoko: «Indro aho fa nahangom-pahendrena mihoatra noho ireo mpanjaka rehetra nodimbiasako teto Jerosalema.» Ary nanankarem-pahendrena amam-pahalalana momba ny fiainana aho.

¹⁷Tsy niroa fo aho hahay manavaka ny fahendrena sy ny hadalana, ary koa manavaka ny fahalalana sy ny fahaverezan-tsaina. Tsapako fa ny manenji-drivotra ihany koa izany.

¹⁸Fa arakaraka ny mahabe fahendrena no mahabe fahasahiranana; ary izay mitombo fahalalana, dia mitombo fahoriana.