Read Dikateny Iombonana Eto Madagasikara Kôheleta 11 Bible Online

Kôheleta 11 - Dikateny Iombonana Eto Madagasikara bible

Kôheleta 11

¹Atsipazo eny ambony rano ny mofonao, fa ho hitanao ihany izy indray andro any[32].

²Koa ampiasao amina sehatr’asa maro ny volanao, fa tsy fantatrao mihitsy izay loza mety hitranga eto ambonin’ny tany.

³Na aiza na aiza toerana ianjeran’ny hazo, dia eo amin’izay nianjerany ihany no ijanonany. Raha mavesatra ny rahona, dia handatsaka orana amin’ny tany.

⁴Izay mataho-drivotra na manahy ny oran-ko avy dia tsy mba hamafy na hijinja.

⁵Toy ny tsy ahafantaranao ny fiforonan’ny aina ao an-kibon’ny vehivavy bevohòka no tsy hahatakaranao ny fomba fiasan’Andriamanitra mpanao izao rehetra izao.

⁶Noho izany dia afafazo vao maraina ny voanao ary aza mitsahatra miasa mandra-paharivan’ny andro, fa tsy fantatrao izay ho vanona na ny teo aloha na ny tafara na koa samy ho vanona avokoa izy roa tonta.

⁷Kanto ny fahazavàn’ny andro, ary mahafinaritra ny maso ny fahitana ny masoandro.

⁸Na dia ela velona aza ny olona, dia tokony hifaly amin’ny taona tsirairay omena azy. Nefa aoka hotsarovany fa ho maro ny andro manjombona, satria izay rehetra ho avy dia zava-poana.

⁹Mifalia, ry zatovo, amin’izao fahatanoranao izao; eny, miravoravoa mandritra izany fotoanandro izany. Ataovy izay mahadiavolana ny fonao sy izay mahafinaritra ny masonao. Nefa aoka ho fantatrao fa amin’izany rehetra izany dia hotsarain’Andriamanitra ianao.

¹⁰Halaviro izay mety hampalahelo sy hampaharary, fa ny fahatanorana sy ny hery dia mihelina samy zava-poana.