Read Dikateny Iombonana Eto Madagasikara Kôheleta 12 Bible Online

Kôheleta 12 - Dikateny Iombonana Eto Madagasikara bible

Kôheleta 12

¹Aza hadino Ilay nahary anao amin’ny androm-pahatanoranao[33]. Tsarovy Izy dieny tsy mbola tonga ny androm-pahosanao ary tsy mbola mihatra ny taona izay hitenenanao hoe: «Mankaleo ahy ny miaina.»

²Amin’ny androm-pahosanao manko dia hihamatroka ny fahazavan’ny masoandro, hanjavozavo ny volana aman-kintana, ary hivangongo ny rahona mitondra orana.

³Amin’izay ny sandry aman-tanana fiarovanao tena dia hipararetra; ny ranjonao nijaridina dia hikolepaka; ny nifinao efa nihavitsy loatra dia tsy hahahota sakafo intsony; ary hihapahina ny masonao ka tsy hahita tsara intsony.

⁴Amin’ny androm-pahosanao koa dia hikombona ny molotrao satria hihareraka ny vodivazanao mihomokomoka ao anaty vavanao; ary ho donto ny sofinao, ka tsy ho tandrinao ny fikalom-boron-kely ary halefaka aminao avokoa ny feon’ny mpihira.

⁵Amin’izay koa dia hatahotra ny hiani-piakarana ianao ary ho be fanahiana rehefa mamindra; ny volon-dohanao hihafotsy toy ny voninkazo mamony fotsy; tsy ho mailaka fihetsika toy ny valala intsony ianao; ary tsy hahitanao tsirony intsony ny voan-tsiperifery[34]. Isika olombelona tsy maintsy mankany amin’ny fonenana mandrakizay, ary ny mpisaona antsika kosa efa mihaodihaody eny an-dalambe.

⁶Dia ho tapaka ny kofehim-bolafotsin’ny fiainana; ho montsamontsana ny tavoara volamena; eny am-pantsakana no ho vaky ny siny; ho latsaka an-davaka famorian-drano ny fanovozana bolaky[35].

⁷Amin’izay no hiverina ho vovoka amin’ny tany nakana azy fahiny ny vatantsika fa ny fofonaina kosa hiverina amin’Andriamanitra Izay nanome antsika izany.

⁸Zava-poana ny zava-drehetra, hoy i Kôheleta; eny, zava-poana dia zava-poana izany.

⁹Ho fanampin’izany, tsy nitsahatra nampianatra ny olona ny zavatra fantany i Kôheleta satria hendry izy. Namorona ohabolana maro izy rehefa avy nandinika sy nandanjalanja.

¹⁰Fa niezaka ny hilazalaza ny zava-misy tamim-pahamarinana i Kôheleta no nanao izay hahitana teny mahaliana koa.

¹¹Ny tenin’ny hendry dia manindrontsindrom-panahy tahaka ny fanjaitra; ary ireo mpanangona azy dia mamefy soritra tahaka ny tsatomarika. Fanomezana avy amin’ilay hany mpitarika[36] avokoa ireny.

¹²Fanampin’izany koa, anaka, dia minoa anatra ianao. Fa tsy mba voafetra ny isan’ny boky azo soratana, ary mandrera-tena ny manokana fotoana maro hianarana.

¹³Ary izao no fehin-teny momba izay rehetra voalaza: hajao Andriamanitra ary tandremo ny didiny, satria izany no andraikitry ny olona tsirairay.

¹⁴Fa hotsarain’Andriamanitra avokoa ny zavatra atao, dia ny amin’izay rehetra fonosiny na tsara izany na ratsy.