Read Dikateny Iombonana Eto Madagasikara Tononkiran'i Salômôna 2 Bible Online

Tononkiran'i Salômôna 2 - Dikateny Iombonana Eto Madagasikara bible

Tononkiran'i Salômôna 2

¹Izaho kosa dia voninkazo any amin’ny lemak’i Sarôna ary lisy eny an-dohasaha.

²Toy ny lisy eo anivon’ny tsilo, dia toy izany ity rahavako, eo anivon’ireo zatovovavy.

³Toy ny hazo paoma anankiray eo anivon’ireo hazo anaty saha, dia toy izany ity malalako eo anivon’ireo zatovolahy. Ka mahafinaritra ahy ny mipetraka eo ambany alokalon’io hazo paoma io, sady mamy ao am-bavako ny voany.

⁴Nentiny ho ao amin’ny toerana fisotroan-divay[6] aho ka «Fitiavana» no teny faneva teo amboniko.

⁵«Rosoy ampempam-boaloboka aho hamelombelona aina ahy ary hatanjaho amina paoma aho, fa mararim-pitia.»

⁶Manondana ahy ny sandriny ankavia ary mamihina ahy ny sandriny ankavanana.

⁷«Ry tovovavin’i Jerosalema ô, noho ny amin’ny gazela na ny dieravavy eny an-tsaha[7], dia miangavy mafy anareo aho hoe: Aza tairina na fohazina ilay tiako[8], raha tsy efa sitrapony!»

⁸Injay ny feon’ny malalako! Indro izy fa tamy ka mitsambikimbikina eny an-tendrombohitra ary mifalihavanja eny an-kavoana.

⁹Ny malalako dia mailamailaka toy ny gazela na ny diera tanora; indro izy fa mijanona ao alatranonay, ka manarangarana eo am-baravarankely, zary mitsikilo eo amin’ny makarakara.

¹⁰Dia niteny ny malalako ka nanao tamiko hoe: «Mitsangàna, rahavako; ry ilay tsaratarehiko, ndeha hiaraka amiko.

¹¹Fa efa lasa ny ririnina, nitsahatra sy dify ny orana.

¹²Mamelana amin’ny tany ny voninkazo, tonga ny fotoam-pikalokaloana ka re atỳ amin’ny tanintsika ny feon’ny domohina.

¹³Mihamasaka eny amin’ny aviavy irony voany tanora; ary mamerovero manitra ny voaloboka mamony. Koa mitsangàna, rahavako; ry ilay tsaratarehiko, ndeha hiaraka amiko.

¹⁴E ry voromahailalako mitoetra eny an-tsefatsefa-bato sy miery eny amin’ny hantsana, mba asehoy ahy ny endrikao ary ampandreneso ahy ny feonao, fa mamy ny feonao ary soa ny endrikao.»

¹⁵«Sambory ka omeo anay ny fosa, dia ireo zanaka fosa mpanimba ny tanimboalobokay fa efa mamony izao ny voalobokay.»

¹⁶Ahy ny malalako, ary azy aho. Amin’ny toerana misy lisy no mirao-bilona izy[9].

¹⁷Amin’ny takariva mangatsiatsiaka, rehefa hilentika ny masoandro ka hihamaizina ny andro, dia miverena, ry malalako; ary aoka ianao ho mailamailaka toy ny gazela na ny diera tanora no manketỳ Ambohimisaraka[10].