Read Dikateny Iombonana Eto Madagasikara Tononkiran'i Salômôna 4 Bible Online

Tononkiran'i Salômôna 4 - Dikateny Iombonana Eto Madagasikara bible

Tononkiran'i Salômôna 4

¹Tsara tarehy ianao, rahavako; eny, tsara tarehy ianao! Mahafinaritra toa voromahailala ny masonao anatin’ny voalinao; ny volon-dohanao dia toy ny andian’osy midina ny tendrombohitra Gilehada.

²Ny nifinao dia fotsy toa andian’ondrivavy izay efa voahety sy avy nampandroana; samy manana rahavavy kambana ireo, ka tsy misy izay tsy tahaka izany.

³Toa ribà mena ny molotrao; ary mahafatifaty ny vavanao. Menamena toa hasin’ampongabendanitra ireo takolakao anatin’ny voalinao.

⁴Ny vozonao dia toy ny tilikambon’i Davida[13], izay naorina hiendrika boribory; ampinga arivo[14] no mihantona eo, dia ny ampingan’ireo maherifo.

⁵Ny nononao roa dia hoatra zana-gazela, dia gazela kambana vao natera-dreniny ka mirao-bilona eny anivon’ny lisy.

⁶Amin’ny takariva mangatsiatsiaka, rehefa hilentika ny masoandro, dia tapa-kevitra aho ny handeha ho etỳ an-tendrombohitrao mandraraka miora sy ho etỳ an-kavoanao mamerovero zava-manitra[15].

⁷Tsara avokoa ny bikanao, rahavako; eny, tsara tsy misy tomika ianao.

⁸Andao hiaraka amiko, ry fofombadiko; ialao i Libano ka andao hiaraka amiko. Hidina avy eny an-tampon’i Amanà ianao, ary hidina avy eny Senira[16] sy Hermôna. Andosiro ireny fa toeram-pieren’ny liona sy tendrombohitra fiafenan’ny leôparda.

⁹Mambabo ny foko ianao, ry havako fofombadiko; mambabo ny foko ny indray mipimasonao ary na dia ny rojo anankiray eny am-bozonao aza.

¹⁰Mamy tokoa ny safosafonao, ry havako fofombadiko; fy tokoa ny safosafonao, eny, fy mihoatra noho ny divay; ary ny ilomanitrao dia mahasintona ahy mihoatra noho ny zava-manitra hafa rehetra.

¹¹Ny molotrao, ry fofombadiko, dia toa mitsonika hamamiana avy amin’ny vonin-javamaniry. Mamy toa ronono aman-tantely ny teninao; ary ny hanitr’ireo akanjonao dia toy ny an’ireo hazo any Libano.

¹²Zaridaina mifefy tsara hidy ianao, ry havako fofombadiko; zaridaina mifefy tsara hidy ianao sady loharano voaisy tombokase.

¹³Ianao toa sahan’ampongabendanitra izay misy voany matsiro; samy mamerovero ao koa ny kôfera sy ny narda,

¹⁴ny narda sy ny safràna, ny veromanitra sy ny kanelina mbamin’ny hazo manitra rehetra; mandraradrara-pofona eo koa ny miora sy ny aloesy ary ny menaka manitra rehetra.

¹⁵Loharano ao an-jaridaina ianao, dia fantsakana miboiboika ranovelona izay mikoriana avy any Libano.

¹⁶Mifohaza, ry rivotra avy any avaratra; ary avia, ry rivotra avy any atsimo. Mitsofa ao an-jaridainako ianareo, dia handraraka ny zava-manitra eo aminy. Aoka ny malalako hankatỳ an-jaridainany ka hihinana ireo voankazony matsiro.