Read Dikateny Iombonana Eto Madagasikara Fahendrena 13 Bible Online

Fahendrena 13 - Dikateny Iombonana Eto Madagasikara bible

Fahendrena 13

¹Fahadalana tsotra izao ny an’ny olona rehetra izay minia tsy mahalala an’Andriamanitra. Ny soa hita maso tsy nahafahany nahalala an’Ilay hatrizay ka ho mandrakizay; ary ny fandinihina ireo asany tsy nahafantarany an’Ilay Mpanao azy[72].

²Fa izay nataony ho andriamanitra mpitondra izao tontolo izao dia ny afo, ny rivotra, ny tsio-drivotra, ny antokon-kintana, ny rano mivatravatra na ny masoandro sy ny volana.

³Raha sodokan’ny hatsàran’ireo izy ka nanao azy ho andriamanitra, dia aoka ho fantany fa ny Tompo dia mihoatra lavitra noho ireny; satria Ilay loharanon’ny hatsaran-tarehy no nahary an’ireo zava-boaary ireo.

⁴Ary raha talanjon’ny heriny sy ny fahombiazany izy, dia aoka ho fantany amin’izany fa mahery lavitra Ilay nanao azy.

⁵Fa ny fahalehibeazana sy hatsàran-tarehy ananan’ny zava-boaary dia mampisaina antsika ny Mpahary azy noho ny fifanahafan’izy roa tonta.

⁶Ireo olona ireo, na izany aza, dia tsy azo omen-tsiny be loatra, satria ny fitadiavana an’Andriamanitra sy ny faniriana hahita Azy no mety ho nampivily lalana azy.

⁷Hodidinin’ny asan’Andriamanitra izy ka mandinika azy ireny fatratra; sodokan’ny endrika isehoany izy fa tsara tarehy loatra izay hitany.

⁸Tsy mahafa-tsiny azy tanteraka anefa izany, satria raha nahazo fahalalana ampy

⁹hahafahany maminavina ny fizotran’izao tontolo izao, dia ahoana kosa no tsy nahitany haingana ny Tompon’ireo zavatra dinihiny ireo?

¹⁰Fa mahantra loatra ny olona izay manankina ny fanantenany amin-java-tsy mananaina, dia izay miantso ho andriamanitra ny asan-tanan’olombelona: dia ny volamena sy volafotsy voatefy tam-pikaliana sy maneho sarin-java-mananaina na ny vato tsy ahoan-tsy ahoana saingy voasikotry ny mpahay asan-tanana fahiny[73].

¹¹Indro koa ohatra ny mpikapa hazo iray[74]: Nitsofa hazo mora entina izy; dia hodirany amim-pitandremana izany ka amboariny amim-pahakingana ary amoronany fitaovana fampiasa amin’ny fiainana andavanandro.

¹²Fa ny ambin-kazo kosa dia hataony kitay hahandroan-kanina hivokisany.

¹³Ary ny ambin-kazo iray sisa izay tsy misy ilana azy intsony satria meloka sy feno tonontoniny, dia raisiny sy kapakapainy ho fanalana andro, ary amboariny amim-pahakingana sy fahaizana ka omeny endrik’olombelona

¹⁴na ataony mitovy amin’ny biby ratsy; dia lokoany izany ka hosorany loko mena midorehitra, ary voasarona avokoa ny pentina rehetra taminy.

¹⁵Avy eo dia fonenana sahaza azy no omaniny ka apetrany manolotra amin’ny rindrina ary apetany amin’ny fantsika.

¹⁶Tandremany tsara tsy hianjera izany; fantany manko fa io tapa-kazo io dia tsy mahavonjy tena akory, satria sarin-tsampy mila tohana ihany.

¹⁷Saingy izy rehefa mivavaka ho an’ny fananany na ho an’ny fanambadiany na ho an’ny zanany, dia tsy menatra ny hiteny amin’io zava-tsy mananaina io. Amin’izay tsy manan-kery no angatahany fahasalamana;

¹⁸amin’izay maty no italahoany fiainana; amin’izay tsy mahay na inona na inona no itadiavany fiarovana; ary amin’izay tsy afa-mamindra akory no angatahany ny ho tsara dia.

¹⁹Farany, mba hahatsara ny fivelomany sy hampandroso ny raharaha ataony ary hampahomby ny asan’ny tanany, amin’izay osa tanana indrindra no angatahany fahatanjahana.