Read Dikateny Iombonana Eto Madagasikara Fahendrena 19 Bible Online

Fahendrena 19 - Dikateny Iombonana Eto Madagasikara bible

Fahendrena 19

¹Fa tsy maintsy niharan’ny fahatezeranao tsy misy antra hatramin’ny farany kosa ireo fahavalo, satria fantatrao mialoha, Tompo ô, izay zavatra hataony:

²fantatrao fa rehefa navelany handeha ny vahoakanao sady nododonany hiala faingana, dia hiova hevitra indray izy ka hanenjika azy[113].

³Koa raha tsy afa-tsaona akory izy fa mbola nitomany teo amin’ny fasan’ireo havany maty, dia nandray fanapahan-kevitra adaladala indray izy ka nanenjika ho toy ny mpandositra ireo efa nitalahoany handeha.

⁴Tendry sahaza tsy azo ialana no nanosika azy ho amin’izany fiafarana izany ka nahatonga azy hanadino ny lasa mba ho feno lanja ny famaizana mbola tsy ampy tamin’ny fijaliany taloha.

⁵Fa raha nanohy ny diany mahagaga ny vahoakanao, izy kosa nahita fahafatesana manaitra.

⁶Fa novana indray hifanaraka amin’ny baikonao ny voaary manontolo araka ny karazany avy mba hiarovana ny zanakao amin’ny loza rehetra.

⁷Dia nisy rahona hita nandrakotra ny toby, ary indro tany maina no nitranga teo amin’izay nisy rano; nisy lalana azo naleha teo afovoan’ny Ranomasina Mena ka tonga lemaka maitso mavana ny onja misamboaravoara[114].

⁸Teo no nandalovan’ny vahoakanao iray manontolo, izay narovan’ny tananao sady nanatrika zava-mahagaga sy mahatalanjona.

⁹Niely toy ny soavaly eny an-tanimbilona izy ary nifalihavanja toy ny zanak’ondry teo am-piderana Anao, ry Tompo mpanafaka azy[115].

¹⁰Satria mbola tsaroany ny lasa fony izy nitoetra tany an-tany hafa: fa ny tany, izay mpanome taranaka biby fiompy dia lasa namokatra moka; ary ny ony, izay mpanome trondro, dia namoaka sahona marobe[116].

¹¹Tatỳ aoriana dia tarana-borona vaovao koa no hitan’ny vahoakanao; fa raha nentin-kanoanana iny izy, dia nangataka hanim-py:

¹²koa mba hahafa-po azy, dia nisy papelika marobe niakatra avy any an-dranomasina[117].

¹³Ary nianjera tamin’ny mpanota kosa ny famaizana taorian’ny tselatra sy ny kotro-baratra mafy izay fambara mialoha. Rariny loatra ny fijalian’ireo Ejiptianina noho ny helony satria fankahalana lozantany no nasehony tamin’ny vahiny[118].

¹⁴Marina fa fahiny ny mponin’i Sôdôma dia tsy nety nampiantrano olon-tsy fantatra. Fa ireo kosa nanandevo ny vahiny izay nanao soa taminy[119].

¹⁵Nofaizina ihany iretsy voalohany noho ny fiheverany ireo vahiny ho fahavalo, mainka fa ireto:

¹⁶rehefa avy nandray an-kafaliana ny vahiny manko izy sady niantoka fitovian-jo ho azy, dia nampitambesatra asa an-terivozona taminy tatỳ aoriana[120].

¹⁷Izany no namelezana azy fahajambana, tahaka ny olon’i Sôdôma teo am-baravaran’i Lôta olo-marina[121]: voasaron’ny haizina mikitroka ireto lehilahy ireto no nitsapatsapa nikaroka ny varavaran’ny tranony avy.

¹⁸Na dia samy manana ny feony aza ny tadim-baliha tsirairay avy, dia afaka mirindra kosa hanome feon-kira isan-karazany. Tahaka izany koa no zava-nisy fahizay: nifandrindra amin’ny fomba vaovao ireo singan-javatra. Hita mazava izany, rehefa dinihina ny zava-nitranga tamin’izay;

¹⁹ny biby an-tanety nanjary biby anaty rano, fa ny biby mpilomano nandeha an-tanety[122].

²⁰Vao mainka nirehitra anaty rano ny afo, fa ny rano nanadino ny hamono azy ho faty[123].

²¹Tetsy an-daniny kosa ny lelafo dia tsy nahamay akory ny nofon’ireo biby mareforefo izay nivezivezy teo aminy; ary tsy voaempony koa ilay hanina avy any an-danitra, na dia mitovy amin’ny vongan-dranomandry mora miempo aza[124].

²²Tompo ô, tamin’ny lafiny rehetra no nataonao lehibe sady nomenao voninahitra ny vahokanao. Tsy mba nataonao tsirambina izy, fa novonjenao mandrakariva hatraiza hatraiza.