Read Dikateny Iombonana Eto Madagasikara Fahendrena 3 Bible Online

Fahendrena 3 - Dikateny Iombonana Eto Madagasikara bible

Fahendrena 3

¹Eo an-tanan’Andriamanitra ny fanahin’ny olo-marina ka tsy misy fijaliana hahatratra azy intsony.

²Hoatra ny maty izy eo imason’ireo adala ary tahaka ny loza ny fialàny amin’izao fiainana izao;

³toa fahalevonana ny fanalavirany antsika, kanjo ao amin’ny fiadanan’Andriamanitra izy.

⁴Na dia niharam-pahoriana[9] aza izy eo imason’ny olombelona, dia feno tsy fahafatesana kosa ny fanantenany.

⁵Maivana anefa ny fahoriany raha mitaha amin’ny fahasambaram-be horaisiny[10]. Nozahan’Andriamanitra toetra izy ka hitany fa mendrika Azy;

⁶notsapainy toy ny volamena atao amin’ny memy izy[11] ka sitrany toy ny sorona dorana manontolo natolotra teo amin’ny alitara.

⁷Amin’ny fotoam-pitsaran’Andriamanitra, dia hamirapiratra fatratra izy, ary ho tahaka ny pitik’afo hivoivoy amin’ny bozaka sy handoro azy.

⁸Ireo olo-marina ireo no hitsara ny firenena[12] sy hitondra ny vahoaka; ary hanjaka aminy mandrakizay ny Tompo.

⁹Izay mitoky amin’ny Tompo dia hahafantatra fa azo antoka ny fikasany, izay tsy mivadika aminy no hitoetra eo anilany amim-pitiavana[13] satria fahasoavana sy antra no an’ny voafidiny.

¹⁰Fa ny tsy mpivavaka kosa handray ny famaizana sahaza ny fisainany, noho izy nanivaiva ny olo-marina sy nanalavitra ny Tompo.

¹¹Fa loza no miandry izay manao tsinontsinona ny Fahendrena sy ny fampianarany: foana ny fanantenany, tsy mahasoa ny fisasarany, ary tsy ilaina akory ny asany;

¹²adala ny vadiny, maditra ratsy ny zanany, ary voaozona ny taranany.

¹³Fa sambatra ny vehivavy momba izay tsisy pentina ny fitondrantenany ary tsy mbola nanao firaisana voarara[14]; Fa hahazo ny valisoan’izany izy amin’ny fitsaran’Andriamanitra ny olona.

¹⁴Sambatra koa ny lehilahy tsy miteraka sady tsy mba nanao ratsy tamin’ny tanany ary tsy nisain-dratsy hanohitra ny Tompo; satria ny toetra mahatoky nasehony dia hanomezana azy fanambinana manokana ary hahazoany anjaram-pahafinaretana ao amin’ny fonenan’ny Tompo[15].

¹⁵Fa ny ezaka ho amin’ny hatsaram-panahy dia misy vokatra heni-boninahitra; koa izay mifototra amin’ny Fahendrena dia tsy mba hivaona toetra.

¹⁶Ireo zanaky ny fijangajangana kosa dia tsy hivelatra araka ny tokony ho izy; ary ho foana izay taranaka avy amin’ny firaisana tsy ara-dalàna[16].

¹⁷Fa na dia ela velona aza izy ireny, dia tsy horaharahain’ny olona; ary ny fahanterany hatramin’ny farany dia tsy mba hisy hajany akory.

¹⁸Ary raha malaky maty izy ireny, dia tsy mba hanam-panantenana na fiononana amin’ny andro fitsarana.

¹⁹Fa ny taranaka mpanao ratsy dia mampalahelo ny fiafarany.