Read Dikateny Iombonana Eto Madagasikara Fahendrena 4 Bible Online

Fahendrena 4 - Dikateny Iombonana Eto Madagasikara bible

Fahendrena 4

¹Aleo tsy manan-janaka nefa manana hatsaram-panahy, fa tsy ho faty ny fahatsiarovana azy, satria sitrak’Andriamanitra sy ny olona izy.

²Raha velona eo imaso izy, dia alain-tahaka; rehefa tsy eo intsony kosa izy, dia malahelo azy ny olona; any amin’ny mandrakizay izy dia mirenty voasatroboninahitra, satria ny fifaninanana nandreseny no ahazoany valisoa tsy mety simba[17].

³Fa ny taranaky ny tsy mpivavaka kosa, na dia maro aza, dia tsy vanon-ko inona. Toa zana-kazo ratsy izy ka tsy ho latsaka lalina ny fàkany ary tsy hiorina mafy ny fotony;

⁴fa na maniry sampana fotoana fohy aza izy, dia tsy mafy orina ka ho voahozongozon’ny rivotra ary ho voaongotry ny tadio mifofofofo.

⁵Mipika alohan’ny fotoana ny rantsany; manta tsy azo hanina ny voany ka ho very foana, tsy misy ilana azy.

⁶Fa amin’ny andro fitsarana, ireo zaza nateraky ny firaisana voarara dia hijoro ho vavolombelona ny amin’ny faharatsian’ny raiamandreniny.

⁷Fa ny olo-marina kosa, na dia maty alohan’ny fotoana aza, dia hahita fialan-tsasatra.

⁸Natao hohajaina ny fahanterana; kanefa tsy dia ny fahelavelona na ny hamaroan’ny taona iainana no mahatonga ny olona ho mendri-kaja.

⁹Fa ny fahendrena no misolo ny volofotsy ho an’ny olona; ary fiainana tsisy pentina no taom-pahanterana.

¹⁰Fahiny dia nisy lehilahy nahafaly an’Andriamanitra ka tiany. Ary raha niara-belona tamin’ny mpanota izy, dia nafindra an-toeran-kafa[18].

¹¹Nesorina anefa izy mba tsy ho simban’ny ratsy ny sainy ary tsy ho voafitaky ny hafetsena ny fanahiny.

¹²Fa ny fanangolen’ny rendrarendra dia mahatakona ny soatoavina; ary ny fandrebireben’ny faniriana dia mampihozongozona ny saina mahitsy.

¹³Ao anatin’ny fotoana fohy io lehilahy io no tonga amin’ny fahalavorariana ka nahatratra ny fahafenoan’ny ela velona.

¹⁴Sitraky ny Tompo ny fomba fiainany ka izany no nanesorany azy haingana tamin’izao tontolom-paharatsiana izao. Hitan’ny olona izany nefa tsy fantany; ary tsy mba tonga tao an-tsainy izao tarehin-javatra izao[19]:

¹⁵ny fahasoavana sy ny famindrampo dia ho an’ny olom-boafidin’ny Tompo ary mirotsaka an-tsehatra Izy ho fiahiana ny vahoaka voatokana ho Azy[20].

¹⁶Ny fahafatesan’ny olo-marina dia manameloka ny fahaveloman’ny tsy mpivavaka; ary ny tanora tonga faingana amin’ny fahalavorariana dia manameloka ny olon-tsy marina tratra antitra.

¹⁷Hahita ny fiafaran’ny hendry ny tsy mpivavaka, nefa tsy hahafantatra akory ny fikasan’Andriamanitra ny aminy na ny nametrahany azy amin-toerana azo antoka.

¹⁸Hahita izany ireo ka haneso; kanefa mba hihomehy azy kosa ny Tompo.

¹⁹Ho tonga faty tsy misy hajany izy aorian’ny fahafatesany, ka ho afa-baràka mandrakizay any amin’ny toeran’ny maty. Fa hongotan’Andriamanitra hatrany amin’ny fototra iorenany izy ary havariny mitsingoloka sady tsy hanan-kalahatra akory; ka ho ringana hatramin’ny farany izy ary ho azom-pahoriana mafy, ka tsy hisy hahatsiaro azy intsony.

²⁰Amin-tahotra no hanatonan’ireo tsy mpivavaka rehefa hampamoahin’Andriamanitra azy ny amin’ny fahotana vitany; ka hitsangana hiampanga azy ny helony.