Read Dikateny Iombonana Eto Madagasikara Fahendrena 5 Bible Online

Fahendrena 5 - Dikateny Iombonana Eto Madagasikara bible

Fahendrena 5

¹Amin’izay ny olo-marina dia hijoro amim-pahatokiana fatratra eo anoloan’izay nampahory azy sy nanamavo ny fikelezany aina.

²Koa raha mahita azy fotsiny ireo, dia hangitakitaky ny tahotra, sady ankona hahita azy voavonjy tsy araka ny nanampoizany azy.

³Hanenina be vava ireo ka hifampiteny ary hitoreo amim-pangitaham-po hanao hoe:

⁴«Indro ilay nataontsika fihomehezana fahiny sy lasibatry ny fanarabiantsika. Olona tsy nisaina isika nihevitra ny fiainany ho fahadalana ary ny fahafatesany ho fahafaham-baràka.

⁵Kanjo indro izy ankehitriny fa isan’ireo zanak’Andriamanitra[21] ka manana anjara eo anivon’ny anjely.

⁶Noho izany, isika no naniasia lavitry ny lalam-pahamarinana; tsy mba nanazava antsika ny fahazavàm-pahamarinana ary tsy niposaka tamintsika ny masoandro.

⁷Ny lalan’ny tsy fahamarinana sy ny fahaverezana no nizorantsika hanaranam-po; namakivaky ny taniefitra tsisy lalana, nefa tsy te hahalala ny sori-dalan’ny Tompo.

⁸Inona no soa azontsika tamin’ny avonavontsika sy ny harena izay nireharehantsika?

⁹Nandalo toy ny aloka ireny rehetra ireny, ary mora hadino toy ny hafatra izay ampitain’olona mihazakazaka.

¹⁰Mitety onja mahery ny sambo; kanefa tsy hita ny soritry ny fandalovany na ny mariky ny vatan-tsambo eny anivon-drano.

¹¹Mamakivaky habakabaka ny voro-manidina; kanefa tsy misy hamantarana ny lalan-kizorany, satria kopahiny elatra ny rivo-malefaka ary manezaka mafy izy manavatsava azy; avy eo tsy hita akory ny mariky ny fandalovany.

¹²Ny zana-tsipîka dia alefa amin’izay kendrena; fa rehefa mikatona ny rivotra notriariny, dia tsy fantatra intsony izay lalana narahiny.

¹³Isika koa dia toy ny sambo na ny voro-manidina na ny zana-tsipîka. Fa teraka isika, avy eo dia manjavona; ka tsy mba misy azontsika aseho akory izay mariky ny hatsaram-panahy, fa ny haratsiantsika ihany no nandevona antsika.»

¹⁴Eny, ny fanantenàn’ny tsy mpivavaka dia tahaka ny akofa entin’ny rivotra, na tahaka ny fanala maivana faohin’ny tadio, ho foana toy ny setroka aelin’ny tsio-drivotra izany ary ho levona toy ny fahatsiarovana vahiny izay nihelina indray andro monja.

¹⁵Fa velona mandrakizay kosa ny olo-marina; hanome valisoa azy ny Tompo, ary hiahy azy ilay Avo Indrindra.

¹⁶Avy amin’ny tanan’ny Tompo no handraisany ny fanjakana mamirapiratra sy ny satroboninahitra kanto. Fa ny tanany ankavanana no iarovany azy; ary ny sandriny no anaronany azy toy ny ampinga.

¹⁷Handray ny zotom-pony ho enti-miady Izy ary hampirongo fiadiana ny zava-boaary hamelezana ny fahavalony.

¹⁸Hitafy ny fahamarinana Izy ho akanjo vy fiarovan-tratra, handray ny fitsarana ara-drariny ho satro-by fiarovan-doha,

¹⁹handray ny fahamasinana ho ampinga tsy mety resy,

²⁰ary hampiasa ny fahatezerany tsy azo ifonana ho sabatra maranitra[22]; izao tontolo izao koa dia hiaraka amin’ny Tompo hiady amin’ny adala.

²¹Tahaka ny zana-tsipîka alefa amin’izay ikendrena azy avy amin’ny tsipîka voahenjana mafy no hitsoriahan’ny tselatra avy amin’ny rahona ka hiantefany mahitsy amin’ny tanjona.

²²Hilatsaka mivatravatra ny havandra toy ny vato alefan’ny antsamotady. Hisafoaka ny onjan-dranomasina hamely ireo fahavalon’Andriamanitra; ary hanafotra azy tsisy indrafo ny ony.

²³Hifofofofo hamely azy ny rivo-mahery[23] ka hampihahaka azy toa tadio. Dia hiova ho taniefitra ny tany manontolo noho ny tsy fahamarinany; ary ny ratsy nataon’ireo manampahefana ihany no hampiongana ny sezafiandrianany.