Read Dikateny Iombonana Eto Madagasikara Fahendrena 6 Bible Online

Fahendrena 6 - Dikateny Iombonana Eto Madagasikara bible

Fahendrena 6

¹Mihainoa ka mamantara ianareo mpanjaka! Mianara ianareo mpifehy amin’ny tany tontolo.

²Sokafy ny sofinareo, ry mpitondra vahoaka sy mpirehareha amin’ny fifehezana firenena maro[24]:

³Aoka ho fantatrareo fa ny Tompo no nanome anareo ny fitondrana ary Andriamanitra Avo Indrindra no nanome anareo ny fahefana[25]; dia handinika ny asanareo Izy ka hamantatra ny fikasanareo.

⁴Koa raha ianareo mpandraharahan’ny fanjakany tsy mba nitsara araka ny hitsiny na nitandrina ny lalàna na nandeha araka ny sitrapon’Andriamanitra,

⁵dia hitranga tampoka aminareo amin’ny fomba mahatahotra Izy, satria fitsarana tsy azo ivalozana no miandry ireo olona ambony.

⁶Ny madinika dia amindrana fo sy avela heloka fa ho henjana kosa ny hijerena ny manam-pahefana.

⁷Tsy hilefitra na amin’iza na amin’iza ny Tompon’ny olon-drehetra ary tsy hampihontsina Azy izay fahalehibeazana, fa samy noarîny na ny kely na ny lehibe ka mitovy ny fiahiny azy[26].

⁸Saingy famotorana henjana kosa no hataony amin’ny manampahefana.

⁹Koa ianareo mpanjaka no iantefan’ny teniko mba hianaranareo ny fahendrena ka tsy hahasolafaka anareo.

¹⁰Izay mitandrina ny lalàna masina amim-pahamasinana manko no hoekena ho masina; ary izay mety hianatra azy no haharo tena amin’ny andro fitsarana.

¹¹Koa ankamamio sy irio fatratra ny teniko dia hahazo fanabeazana ianareo.

¹²Mamiratra tsy mety matroka ny Fahendrena, ka mora tazan’ny olona tia azy ary mora hitan’izay mitady azy[27].

¹³Mitsena izay maniry azy izy ka miseho aminy voalohany.

¹⁴Izay mifoha maraina hitady azy, tsy ho sahirana fa hahita azy mipetraka eo am-baravarana.

¹⁵Ny fifantohana aminy manko no fahatanteraham-pahendrena; ary izay miari-tory noho ny aminy dia halaky afaka ahiahy.

¹⁶Mivezika etsy sy eroa izy mikatsaka izay mendrika azy; miseho aminy amim-pitiavana eny an-dalam-piainany izy ary manampy azy amin’ny eritreriny rehetra.

¹⁷Ny fiandohan’ny Fahendrena dia ny faniriana marina ny hampianariny[28].

¹⁸Izay maniry hampianariny no tia azy; ny mitia azy no mitandrina ny lalànany; ny mitandro ny lalànany no ahazoana antoka ny tsy fahalovana;

¹⁹ary ny tsy fahalovana no mampanakaiky an’Andriamanitra.

²⁰Noho izany ny faniriana ny Fahendrena no manandratra ny olona ho tena mpanjaka[29].

²¹Koa raha maminareo ny sezafiandriananareo sy ny fahefam-panjakanareo, ry mpanjakan’ny firenena, dia hajao ny Fahendrena fa hanjaka mandrakizay ianareo.

²²Fa inona no atao hoe fahendrena[30] ary inona no niandohany? Hambarako aminareo izany ary hoborahiko aminareo ny zava-miafina Hatomboko hatrany am-piandohany ka haharihariko mazava tsara izay tokony ho fantatra ny aminy; ary tsy hivily hiala amin’ny marina aho.

²³Lavitra ahy ny hiara-dalana amin’ny faniriana hitazon-javatra ho ahy irery fa sady toetra mandevona izany no tsy misy iraisany amin’ny Fahendrena.

²⁴Ny hamaroan’ny hendry kosa dia famonjena ho an’izao tontolo izao; ary ny mpanjaka manan-tsaina[31] dia fanambinana ho an’ny vahoakany.

²⁵Koa meteza hampianarin’ny teniko ianareo, dia hahita tombon-tsoa amin’izany.