Read Dikateny Iombonana Eto Madagasikara Fahendrena 7 Bible Online

Fahendrena 7 - Dikateny Iombonana Eto Madagasikara bible

Fahendrena 7

¹Olona mety maty tahaka ny rehetra koa aho[32] ary taranaky ny voalohan’olona izay voavolavola tamin’ny tany[33]. Voasokitra ho nofo tao an-kibon-dreniko aho,

²ka nihamafy tao amin’ny rany nandritra ny folo volana[34]. Ny nipoirako dia ny tsirinain-dehilahy sy ny fahafinaretam-piraisana. izay mahasondrian-torimaso.

³Raha vao teraka ihany koa aho, dia nifoka ny rivotra iaraha-manana; ary latsaka an-tany itoviam-pahoriana aho, ka tahaka ny zazakely rehetra dia tomany no voalohan’antsoko.

⁴Nofonosina lamban-jaza aho sady nokenakenaina fatratra.

⁵Tsy nisy mpanjaka izay nanam-piandohana hafa noho izany teo amin’ny fiainany.

⁶Fa fomba tokana ihany amin’ny olon-drehetra no idirana sy ialana amin’ny fiainana.

⁷Izany no antony nivavahako ka nanomezana ahy fahaiza-manavaka. Niantso aho, dia tonga tamiko ny fanahin’ny Fahendrena[35].

⁸Naleoko izany toy izay ny tehim-panjakana sy ny sezafiandrianana; zava-poana amiko ny harena, raha mitaha aminy.

⁹Tsy nampitoviko taminy ny vatosoa sarobidy indrindra, satria ny volamena manontolo eran-tany dia fasika kely ihany eo anatrehany ary ny volafotsy dia fotaka ihany raha manoloana azy[36].

¹⁰Fa tiako noho ny fahasalamana amam-bika ny Fahendrena; ka tapa-kevitra ny hanana azy ho fahazavana aho, satria tsy mba mety lefy ny famirapirany.

¹¹Raha tonga tamiko ny Fahendrena, dia ny soa rehetra koa no niaraka taminy; harena tsy tambo isaina no teny an-tanany.

¹²Nifaly tamin’ireo soa rehetra ireo aho, satria ny Fahendrena no nitondra azy tamiko; kanefa tsy mbola nahalala aho fa hay izy no renin’izany.

¹³Izay nianarako tamim-pahatsorana taminy dia tsy mba tazoniko ho ahy irery, fa zaraiko amin’ny hafa; ary tsy mba afeniko ny hareny.

¹⁴Rakitra tsy mety ritra ho an’ny olona izy, ka izay mahazo azy dia tonga sakaizan’Andriamanitra fa mankasitraka izay mianatra aminy izy.

¹⁵Homen’Andriamanitra ahy anie ny hiteny araka ny hevitra mitombina ary koa ny hanana fisainana mendrika ny fanomezana noraisiko taminy. Fa Izy no mitarika ny Fahendrena sy manoro lalana ny hendry.

¹⁶Eo ambany fahefàny isika, dia isika sy ny tenintsika ary ny fahatakaran-javatra sy ny haitao isan-karazany.

¹⁷Izy no nanome ahy fahalalana ny tena zava-misy marina. ka nampahafantatra ahy ny firafitry ny tontolo sy ny asan’ireo foto-javatra[37];

¹⁸nampahafantariny ahy ny fizaram-potoana, dia ny fiandohany sy antenantenany ary fiafarany, ny fifandimbiasan’ny fisarahan-taona sy ny fiovan’ny tonontaona,

¹⁹ny fitsingerin’ny taona sy ny toeran’ny kintana,

²⁰ny fomban’ny biby sy ny fihetsiky ny bibidia, ny herin’ny fanahy[38] sy ny fisainan’ny olona, ny karazan-java-maniry samihafa sy ny herim-panasitranan’ny fakany.

²¹Ny zava-miafina sy miharihary dia fantatro avokoa, satria ny Fahendrena mpamorona ny zava-drehetra no nampianatra ahy izany.

²²Fa ao amin’ny Fahendrena dia misy fanahy manan-tsaina sy masina, tokana saingy maro sahanina, kinga sy mihetsiketsika, maninteraka sady tsisy pentina, mazava, tsy miova, sakaizan’ny tsara, mailaka,

²³mahaleotena, manao soa, sakaizan’ny olona, hentitra, mahatoky, heni-pahatoniana, mahefa ny zavatra rehetra, miambina ny zavatra rehetra, ary maninteraka ny fanahy rehetra, na ny manan-tsaina, na ny madio na ny faran’izay kinga indrindra.

²⁴Fa ny Fahendrena dia mailaka kokoa noho izay fihetsehana rehetra, ka mamonto ny zava-drehetra sy maninteraka azy noho ny hadiovany.

²⁵Fofonain’ny herin’Andriamanitra izy, famirapiratana mangarangarana apariaky ny voninahitry ny Tompon’izao rehetra izao, ka tsy tafatsofoky ny zava-maloto.

²⁶Taratry ny fahazavana mandrakizay izy, fitaratra tsisy pentina ahitana ny asan’Andriamanitra, ary koa endriky ny hatsaram-pony.

²⁷Na dia irery aza ny Fahendrena, dia mahefa ny zavatra rehetra; na dia tsy miova koa aza izy, dia manavao ny zavatra rehetra. Mamangy ny fanahin’ny olona masina izy, isaky ny taranaka mifandimby, mba hahatonga ireny ho sakaizan’Andriamanitra sy ho mpaminany;

²⁸satria Andriamanitra tsy mba tia afa-tsy izay mifankazatra amin’ny Fahendrena.

²⁹Fa mamiratra noho ny masoandro izy ary manoatra noho ny kintana isan-karazany. Manan-tombo lavitra izy raha mitaha amin’ny fahazavan’ny andro;

³⁰satria dimbiasan’ny alina izany, fa ny Fahendrena kosa tsy mba resin’ny ratsy.