Read Dikateny Iombonana Eto Madagasikara Fahendrena 9 Bible Online

Fahendrena 9 - Dikateny Iombonana Eto Madagasikara bible

Fahendrena 9

¹«Ry Andriamanitry ny razako sady Tompo loharanon’ny famindrampo ô, ny teninao no nanaovanao izao rehetra izao,

²ny Fahendrenao no namboaranao ny olombelona ho Tompon’ny zavaboaarinao rehetra[40]

³ka hifehy an’izao tontolo izao am-pahamasinana sy am-pahamarinana ary hitsara amim-pahitsiana.

⁴Mba omeo ahy ny fahendrena izay miray sezafiandrianana aminao, ary aza esorina tsy ho isan’ny zanakao aho.

⁵Mpanomponao manko aho ary zanaky ny mpanompovavinao[41], olona osa sy fohy andro iainana, tsy ampy fahatakarana ny didy aman-dalàna.

⁶Fa na misy aza olombelona tanteraka, kanefa tsy manana ny fahendrena avy aminao, dia naman’ny tsinontsinona ihany.

⁷Ianao no nifidy ahy ho mpanjakan’ny vahoakanao, ho mpitsaran’ny zanakao lahy sy vavy[42].

⁸Ianao no nandidy ahy hanorina tempoly eo an-tendrombohitrao masina sy alitara ao an-tanàna fonenanao araka ny môdelin’ny tranolay masina izay nomaninao hatramin’ny voalohany[43].

⁹Eo anilanao ny Fahendrena ka mahalala ny asanao; efa teo izy fony nanao izao tontolo izao Ianao[44]. Fantany izay sitraka eo imasonao sy izay mahitsy araka ny didinao.

¹⁰Ampidino avy any an-danitra masina izy; avy any amin’ny seza fiandriananao be voninahitra no aniraho azy hiasa eo anilako ka hahafantarako izay sitrakao.

¹¹Mahay ary mahafantatra ny zava-drehetra izy, ka hitari-dalana ahy amin’ny asako araka ny fahamalinana ary hiaro ahy noho ny voninahiny.

¹²Koa ho sitrakao ny asako, dia hitsara ara-drariny ny vahoakanao aho ary ho mendrika ny seza fiandrianan-draiko.»

¹³«Iza no olombelona afaka hahalala ny sitraponao, Andriamanitra ô? Iza no hahatakatra ny fikasanao, Tompo ô?

¹⁴Raha izahay olombelona mety maty manko dia mihambahamba ny hevitray, tsy azo ianteherana ny eritreritray;

¹⁵satria ny fanahinay vesaran’ny vatanay mety lo, ary ny sainay be herehina dia vizan’ity fonony eto an-tany ity

¹⁶Efa manahirana anay ny maminavina ny zava-misy eto an-tany, ary mananosarotra anay ny mahita ny zavatra antomotra ny tananay; koa iza àry no hahatakatra izay zava-misy any an-danitra?

¹⁷Ary ny sitraponao, Tompo ô, iza no mba nahalala izany, raha tsy nomenao ny Fahendrena sy nanirahanao ny Fanahinao Masina avy any ambony any?

¹⁸Izany no nahavoahitsy lalana ny mponina teto ambonin’ny tany, ka nahalalan’ny olona ny sitrakao sy namonjen’ny Fahendrena azy.»