Read Dikateny Iombonana Eto Madagasikara Bena-Siràka 10 Bible Online

Bena-Siràka 10 - Dikateny Iombonana Eto Madagasikara bible

Bena-Siràka 10

¹Ny fitondram-panjakana Ny mpifehy hendry dia hananatra ny vahoakany, ka hirindra ny fitondrany noho izy mahira-tsaina.

²Araka ny toetry ny mpifehy vahoaka no ho toetry ny mpandraharahany; araka ny toetry ny mpitondra tanàna ihany no ho toetry ny mponina rehetra ao aminy.

³Ny mpanjaka tsy nanam-panabeazana no hahavery ny vahoakany; ny fahiratan-tsain’ireo andriana no hampiorina mafy ny tanàna[82].

⁴Ny fahefana hitondra ny tany dia eo am-pelatanan’ny Tompo, ka amin’ny fotoanandro mety no hananganany olona sahaza izany[83].

⁵Ny fahombiazan’ny olona dia eo am-pelatanan’ny Tompo, ka Izy no hametraka ny voninahiny eo amin’ny tenan’ny mpahay lalàna. Fiavonavonana sy herisetra

⁶Na inona na inona tsy rariny natao taminao, dia aza mitahiry lolom-po amin’ny namanao; ary aza manao na inona na inona ianao, raha mbola entanin’ny fo mandroatra[84].

⁷Ny fiavonavonana dia zavatra ankahalaina na amin’Andriamanitra na amin’olombelona; ary eo anatrehan’izy roa tonta dia fahadisoana ny tsy rariny.

⁸Ny ifindran’ny fiandrianam-panjakana avy amin’ny firenena iray ho amin’ny firenen-kafa dia noho ny tsy rariny sy ny herisetra ary koa noho ny fitiavan-karena[85].

⁹Vovoka sy lavenona ihany ny olombelona; koa nahoana no miavonavona izy, kanefa dieny mbola fahavelony aza no fahalovana sahady ny tsinainy?

¹⁰Aretina tsy maharitra ela akory dia mampilofika ny dokotera; na izay mpanjaka anio aza mbola ho faty rahampitso.

¹¹Rehefa maty ny olona, dia izao no anjarany: ny trambo sy ny bibikely ary ny kankana.

¹²Ny iantombohan’ny fiavonavonan’ny olona dia amin’izay isarahany amin’ny Tompo sy ikomian’ny fony amin’Ilay nanao azy:

¹³ny fahotana manko no fiantombohan’ny fiavonavonana ka izay mikiribiby no hitosahan’ny toetra maharikoriko; izany no nahatonga ny Tompo hampiharihary ny fahorian’ireo ary hamely azy amin’ny faharinganana tanteraka[86].

¹⁴Naongan’ny Tompo ireo mpanapaka, mba tsy ho eo amin’ny sezafiandrianana ka ny olona malemy fanahy no napetrany handimby toerana azy[87].

¹⁵Nofongoran’ny Tompo ireo mpiavonavona ka ny manetry tena no nasolony handimby azy.

¹⁶Noravan’ny Tompo ireo tanin’ny hafa firenena, ka naringany hatramin’ny fototra iorenany.

¹⁷Nongotan’ny Tompo teo amin’ny olona sy naringany ireo; ary nokosehiny ho foana eto an-tany ny fahatsiarovana azy.

¹⁸Tsy mba nataon’Andriamanitra hiavonavona ny olona; tsy natao hisafoaky ny hatezerana ireo natera-behivavy. Ireo mendrika hohajaina

¹⁹Taranak’iza no mendrika hohajaina? Ny taranak’olombelona izay manaja ny Tompo. Taranak’iza no mendrika hotsiratsiraina? Ny taranak’olombelona izay mandika ny didy.

²⁰Hajaina eo amin’ny olom-peheziny ny mpitondra azy; fa hajaina eo imason’ny mpitondra kosa ireo manaja ny Tompo[88].

²²Ny prôzelita sy ny vahiny ary ny mahantra dia ny fanajana ny Tompo no reharehany.

²³Tsy rariny ny maniratsira ny mahira-tsaina nefa mahantra, ary diso toerana ny manome voninahitra ny mpanota[89].

²⁴Ny lehibe sy mpitsara ary manampahefana dia samy omen’ny olona voninahitra; fa tsy misy kosa amin’ireo, na iray aza, lehibe noho ny olona manaja ny Tompo[90].

²⁵Ny mpanompo manam-pahendrena dia hotompoin’olona afaka; ary ny olona manam-pahalalana dia tsy himonjomonjo ny amin’izany. Ny haja sahaza ny tena

²⁶Aza mihambo ho hendry eo am-panaovana ny asanao ary aza be rehaka amin’ny androm-pahasahirananao.

²⁷Tsaratsara kokoa ny olona izay miasa ka manana amby ampy amin’ny zava-drehetra, toy izay ny mirenireny be rehaka nefa tsy manan-kohanina akory[91].

²⁸Anaka, aoka ho amin-kalemem-panahy no hanomezanao voninahitra ny tenanao ary aoka izy hotoloranao ny haja mendrika azy!

²⁹Iza no hankatoa ho marina izay olona manota manimba tena? Ary iza no hanome voninahitra izay olona manala baràka ny fiainany?

³⁰Azo anomezam-boninahitra ny mahantra ny fahaizana ananany; fa ny anomezam-boninahitra mpanankarena dia ny hareny fotsiny ihany.

³¹Izay omem-boninahitra ao anaty fahantrana, dia vao mainka koa hatao izany ao anaty harena; izay alaim-baràka ao anaty harena dia vao mainka koa hatao izany ao anaty fahantrana.