Read Dikateny Iombonana Eto Madagasikara Bena-Siràka 12 Bible Online

Bena-Siràka 12 - Dikateny Iombonana Eto Madagasikara bible

Bena-Siràka 12

¹Tsy tokony hifandray amin’ny mpaniratsira an’Andriamanitra Raha te hankasitrahina ianao amin’ny soa ataonao, dia mba fantaro izay olona anaovanao azy.

²Manaova soa amin’ny olona tia vavaka, dia hahita valim-pitia ianao, ary na tsy avy amin’ilay olona aza dia avy amin’Ilay Avo Indrindra kosa.

³Tsy mba misy fahasambarana ho an’izay mikiribiby amin’ny ratsy sady tsy mankamamy ny asa fiantrana.

⁴Ny olona tia vavaka no omeo zavatra, ary aza mandray na inona na inona avy amin’ny mpanota.

⁵Manaova soa amin’ny manetry tena ary aza manome ho an’izay tsy mpivavaka; mandava tsy hanome mofo azy velively ianao, fandrao hanjakazakany aminao izany; ka hovaliany ratsy avo roa heny ny soa rehetra vitanao taminy[103].

⁶Fa halan’ny Avo Indrindra koa ny mpanota, ary hampiharany famaizana ny tsy mpivavaka[104].

⁷Ny olona tsara fanahy no omeo zavatra, ary aza mandray na inona na inona avy amin’ny mpanota. Sakaiza tena izy sy sakaiza sandoka

⁸Tsy amin’ny andro fanambinana no hahafantarana ny sakaiza; fa amin’ny andro fahoriana kosa dia tsy miafina ny fahavalo.

⁹Raha ambinina ny olona, malahelo ny fahavalony; fa raha ory kosa izy, na ny sakaizany aza mihataka[105].

¹⁰Aza matoky ny fahavalonao na oviana na oviana; satria toy ny varahina rakotry ny harafesina, toy izany koa no ho endriky ny hasomparany.

¹¹Na mody manetry tena sy manjoko famindra aza izy, dia mitandrema sy miarova tena ianao amin’ny fahavalonao; manoloana azy, dia ho tahaka ny mpandambolambo fitaratra anie ianao ka ho fantatrao fa tsy misy harafesina maraorao intsony ao aminy!

¹²Aza apetraka eo anilanao ny fahavalonao, fandrao aongany ianao, dia alainy ny toeranao; aza apetrakao ho tanan-kavananao izy fandrao tsiriritiny ny toeran misy anao; ka amin’ny farany, nony hahalala ny hamarinan’ny foto-kevitro ianao dia hanana alahelo ama-nenina amin’ny fahatsiarovana ny teniko.

¹³Iza no hangoraka izay mpisafosiaka voakaikitry ny menarana tezainy na izay rehetra manatona ny bibidia?

¹⁴Toy izany koa, iza no hangoraka ny miray petsapetsa amin’ny mpanota ka voarohirohy amin’ny fahotana ataony?

¹⁵Raha mbola miara-dalana aminao ny olon-dratsy, dia tsy mampiseho ny tena toetrany; fa raha mianjera ianao, dia avelany ho eo. Raha mbola tafajoro tsara ianao, dia mijanona mitampify aminao izy; fa vao mibolisatra ianao, dia iny izy no lasa.

¹⁶Ny fahavalo dia malefaka am-bava, nefa ao am-pony dia satriny tokoa ny hamarina anao any an-davaka. Ny ranomaso mitrahotraho amin’ny mason’ny fahavalo, nefa ny handatsa-dra anao no mahaliana azy raha misy fotoana hahazoany manao izany[106].

¹⁷Raha tra-doza ianao, dia hahita azy manoloana anao, ary hody hoe hamonjy anao izy, kanjo hamingana anao;

¹⁸avy eo dia handihindihy loha sy hiteha-tanana izy, tsy hitsaha-mitakoritsidritsika ny aminao, ary hiova endrika ho araka ny maha izy azy[107].