Read Dikateny Iombonana Eto Madagasikara Bena-Siràka 13 Bible Online

Bena-Siràka 13 - Dikateny Iombonana Eto Madagasikara bible

Bena-Siràka 13

¹Tandremo ny mpanankarena miavonavona Izay mikasika godorao madity dia voaloto; ary izay mifanerasera amin’ny mpiavonavona dia zary hanahatahaka azy.

²Aza mibata enta-mavesatra mihoatra noho ny zakanao; toy izany koa, aoka ianao tsy hifanerasera amin’olona mahery na manankarena noho ianao. Tsy afaka hiaraka mihitsy ny vilany tany sy vilany varahina; raha vao mifandona izy roa tonta, dia ho montsana ny vilany tany[108].

³Ny manankarena no manao ny tsy rariny, kanefa izy indray no mandrahondrahona; ny mahantra no iharan’ny tsy rariny sady mbola voatery manao fialàn-tsiny.

⁴Raha ahitany tombon-tsoa ianao; dia hampiasain’ny mpanankarena; fa raha sahirana ianao, dia hariany.

⁵Raha manam-katao ianao, dia hiara-miaina aminao ny mpanankarena; saingy tsy hahoany akory izay hanendaka ny anananao.

⁶Raha misy ilan’ny mpanankarena anao, dia hanangolingoly anao izy, sy hody hitsikitsiky aminao ary hanome fanantenana anao; hanao teny mandodoka anao izy ka hanontany hoe: «Inona no zavatra azoko atao ho anao?»;

⁷kanefa halàny baràka amin’ny fanasam-be ianao, mandra-pahalany harena anao hamaly azy indroa na intelo; ary, amin’ny farany, dia hihomehezany ianao. Avy eo, raha mahita anao izy, dia hanary anao sady handihindihy loha noho ny aminao[109].

⁸Tandremo sao mety hangoleny ianao ka hiharan’ny fietrena noho ny hadalànao[110]. Mbà malina miaraka amin’ny manampahefana

⁹Raha asain’ny manampahefana ianao, dia aza dodona loatra ny hankany, fa vao mainka hanasa anao izy.

¹⁰Aza misosososo hankeo aminy fandrao horoahiny ianao; ary aza mijanona lavitra azy loatra, fandrao hohadinoiny ianao[111].

¹¹Aza mihambo ny hiresaka aminy toy ny mitovy saranga ary aza mitokitoky amin’ny resaka be ataony; fa ny teniny mikararana no hisedrany anao ary ny tsikitsiky ataony no hanombantombanany anao.

¹²Olona tsy manana antra izy ka tsy mahatana ny teninao; ary tsy hotsitsîny aminao na ny famelezana na ny gadra.

¹³Aoka ianao no mailo ary hitandrina fatratra fa lalana mety hianjeranao no andehananao[112]! Mpanankarena sy mahantra

¹⁵Ny zava-mananaina rehetra dia tia izay mitovy aminy, ary ny olona rehetra dia tia izay olona namany.

¹⁶Mifandray araka ny karazany avy ny nofo rehetra, ary mitambatra amin’izay itovizany ny olona[113].

¹⁷Fiombonana inona no mety hisy amin’ny amboadia sy ny ondrikely[114]? Toy izany koa ny amin’ny mpanota manoloana ny olona tia vavaka.

¹⁸Fihavanana inona no mety hisy amin’ny amboahaolo sy ny alika? Ary fihavanana inona no mety hisy amin’ny mpanankarena sy ny mahantra?

¹⁹Ny borikidia any an-taniefitra no firembin’ny liona; toy izany koa ny mahantra no fitsentsitry ny mpanankarena.

²⁰Hàlan’ny mpiavonavona ny fietrena; toy izany koa hàlan’ny mpanankarena ny fahantrana.

²¹Ny mpanankarena izay mangozohozo dia tohanan’ny sakaizany; fa ny malahelo izay solafaka dia ailikilikin’ny sakaizany.

²²Raha ny mpanankarena no mivoana, dia maro no manampy azy; na manao tenin’adala aza izy, dia omen’ny olona rariny. Fa raha ny malahelo no mivoana, dia anomezan-tsiny azy izany; ary raha milaza zavatra mitombina izy, dia tsy raharahaina akory.

²³Raha ny mpanankarena no miteny, dia mangina ny olona rehetra; sady manakoako hatrany amin’ny rahona no iderana ny lahateniny. Fa raha ny mahantra no miteny, dia atao hoe: «Mba iza koa io?»; ary raha sendra mibolisatra izy, dia atosiky ny olona ho lavo[115].

²⁴Tsara ny harena izay tsy laroin’ota; fa ratsy kosa ny fahantrana raha famaizana noho ny ota izany.

²⁵Ny fon’ny olombelona no mamboatra ny endriny, ka mahatonga azy ho tsara na ho ratsy.

²⁶Ny endrika mirana no mariky ny fo sambatra; fa fieritreretana milofo no amoronana ohabolana[116].