Read Dikateny Iombonana Eto Madagasikara Bena-Siràka 14 Bible Online

Bena-Siràka 14 - Dikateny Iombonana Eto Madagasikara bible

Bena-Siràka 14

¹Sambatra ny olona tsy diso tamin’ny teniny, ary tsy ampahorîn’ny nenina noho ny fahotany[117].

²Sambatra izay tsy mba melohin’ny eritreriny, ary tsy mba diso fanantenana na oviana na oviana. Toetra mahihitra

³Ny harena dia tsy mahasoa ny olona mahidy; ary inona no asan’ny harembe amin’ny mpikafiry?

⁴Izay mpanangona mahihitra ho an’ny tenany dia manangom-pananana ho an’ny hafa; ka olon-kafa no ho velom-pinaritra amin’ny hareny[118].

⁵Amin’iza no mba halemy fanahy izay lozabe amin’ny tenany? Tsy mba hiadana amin’ny harembeny izy.

⁶Tsy misy ratsy noho izay mampahory tena, ary izany no tamby tandrifin’ny haratsiany.

⁷Raha misy soa ataon’ny mahihitra, dia tsy fanahy iniany, ary hihariharian’ny haratsiany aza no iafarany.

⁸Ny manam-pijery be kafiry dia ratsy toetra ka mihodivitra tarehy sy manesoeso ny olona.

⁹Ny fijerin’olona tia harena dia tsy afa-pon’izay anjarany; ary fahidiana mandoza no manamaina ny fanahiny.

¹⁰Mitsitsy hanin-kohanina ny mahihitra ka tsy misy na dia eo amin’ny latabatra fisakafoany aza. Hararaoty tsara ny fiainana

¹¹Anaka, mba karakarao tsara ny tenanao arakaraka izay fanananao; ary manaova sakafo tsara ianao amin’ny fotoana ahafahanao manao izany.

¹²Tsarovy fa tsy ho ela fiavy ny fahafatesana, ary tsy nambara taminao ny tendry izay naraikitry ny toeran’ny maty[119].

¹³Alohan’ny hahafatesanao, dia manaova soa amin’ny sakaizanao; ary atsory ny tananao hanome azy arakaraka izay fanananao.

¹⁴Aza mifady tsy hanao andro firavoravoana, ary aza avela hisy very tantana izay tokony hahazoanao fahafaham-po mitombina[120].

¹⁵Fantatrao tsara fa havelanao ho an’ny hafa ny vokatry ny fahasahirananao ary hozaraina araka izay tendrin’ny antsapaka ny vokatry ny fisasaranao.

¹⁶Sady manomeza no mandraisa, ka ampifalio araka izany ny fonao, fa tsy misy hafinaretana andrandraina any amin’ny toeran’ny maty.

¹⁷Mihatonta toy ny fitafiana ny nofo rehetra, satria ny tendry hatrizay hatrizay dia ny hoe: «Tsy maintsy ho faty tokoa ianao[121]!»

¹⁸Toy ny ravina eo amin’ny hazo midoroboka, misy ny mihintsana, misy ny mitsiry; toy izany koa ny taranaky ny olona nofo aman-dra, misy ny maty, misy ny teraka.

¹⁹Levona no hiafaran’ny asa mety simba rehetra, ary ho lasa miaraka aminy koa izay nanao azy. Fitadiavam-pahendrena

²⁰Sambatra ny olona milofo amin’ny fahendrena sy manazatra saina amin’ny famotopotorana,

²¹ka mieritreritra ao am-pony ny làlam-pahendrena ary mandinidinika ny zava-miafina raketiny:

²²manenjika ny fahendrena toy ny mpihaza izy ary mihendry azy eny amin’ny fandalovany.

²³Eo am-baravarankelin’ny fahendrena no iondrehan’izany olona izany hijery, eo am-baravarambeny no ihainoany,

²⁴eo akaikin’ny tranony no honenany, ao anaty rindriny no anatsatohany tsimaday,

²⁵eo anilany no ananganany tranolay, ka toeram-pahasambarana no honenany.

²⁶Eo ambany fiarovan’ny fahendrena no ametrahan’izany olona izany ny zanany, ary eo ambanin’ny rantsany no ialofany;

²⁷noho ny alokaloky ny fahendrena dia ho voaaro amin’ny hafanana izy ary honina ao anatin’ny voninahiny[122].