Read Dikateny Iombonana Eto Madagasikara Bena-Siràka 15 Bible Online

Bena-Siràka 15 - Dikateny Iombonana Eto Madagasikara bible

Bena-Siràka 15

¹Izay manaja ny Tompo no hanao toy izany; ary ny mpahay lalàna[123] no hahazo fahendrena.

²Toy ny reny hitsena azy ny fahendrena, ary toy ny vady virijiny handray azy,

³ka ny fahazavan-tsaina no toy ny mofo hafahany azy ary ny fahendrena no toy ny rano hampisotroiny azy.

⁴Hiankina amin’ny fahendrena izy ka tsy hilofika ary hiraikitra aminy ka tsy hahazo henatra.

⁵Ny fahendrena dia hanandratra azy ho ambonin’ireo mpiray fonenana aminy; ary rehefa hiteny eo anivon’ny fivoriambe izy, dia ny fahendrena no hampiloa-bava azy.

⁶Fifaliana sy firavoravoana no ho hitany, ary laza maharitra mandrakizay no ho anjarany.

⁷Ny olona adala kosa tsy mba hahazo ny fahendrena, ary ny mpanota tsy hahita izany na oviana na oviana.

⁸Mihataka lavitry ny mpiavonavona ny fahendrena ary ny olona fandainga tsy hihevitra izany akory.

⁹Tsy sitraka ny fiderana an’Andriamanitra eo am-bavan’ny mpanota, satria tsy mba avy amin’ny Tompo izany fiderana izany:

¹⁰ny fahendrena no mampanonona ny fiderana ary ny Tompo mihitsy no manentana amin’izany[124]. Fahafahana aman’andraikitry ny olona

¹¹Aza manao hoe: «Ny Tompo no nampivoana ahy», satria izay zavatra halany, dia tsy ataony.

¹²Aza manao hoe: «Ny Tompo no nampania ahy», satria tsy mila izay mpanota akory Izy[125].

¹³Ny toetra maharikoriko isan-karazany dia samy ankahalain’ny Tompo; ka ireo olona manaja Azy ihany no tsy mankamamy an’izany.

¹⁴Tany am-piandohana no nahary ny olombelona ny Tompo ary namela azy samy hanaraka ny fisainany avy[126].

¹⁵Raha tianao àry, dia hitandrina ny didiny ianao, miankina amin’ny sitrakao ny hiraiki-po amin’izany.

¹⁶Nataon’ny Tompo eo anoloanao ny afo sy ny rano, ka azonao atsotra amin’izay tianao ny tananao.

¹⁷Eo anoloan’ny olona ny fiainana sy ny fahafatesana, ka izay ironan’ny safidiny no homena azy[127].

¹⁸Lehibe manko ny fahendren’ny Tompo; sady mahery Izy no mahefa ary mahita ny zavatra rehetra;

¹⁹ny masony dia eo amin’izay manaja Azy, ary fantany avokoa ny asan’ny olombelona[128].

²⁰Tsy misy olona notereny hankahala fivavahana ary tsy misy olona nomeny lalana hanota.