Read Dikateny Iombonana Eto Madagasikara Bena-Siràka 16 Bible Online

Bena-Siràka 16 - Dikateny Iombonana Eto Madagasikara bible

Bena-Siràka 16

¹Tsara fo sady fatra-pitandro ny rariny Andriamanitra Aza maniry zaza maro tsy mahasoa, ary aza ifalianao ny zanaka tsy tia vavaka.

²Na dia maro aza ireo, aza ifalianao ny aminy raha tsy momba azy ny fanajana ny Tompo.

³Aza ianteherana ny fiainan’ireo zaza ireo, aza itokiana akory ny hamaroan’isany; aleo manko anankiray marin-toetra[129] toy izay arivo amin’ireo tsy mahasoa ireo; aleo mihitsy aza maty tsy niteraka toy izay mamela zanaka tsy tia vavaka.

⁴Ny olona iray mahira-tsaina dia hahabe mponina ny tanàna iray; fa ny andian’olon-dratsy kosa hahatonga azy ho tanàna aolo.

⁵Maro ny zavatra mitovy amin’izany, efa hitan’ny masoko; ary mbola misy aza manaitra noho izany efa ren’ny sofiko.

⁶Eo amin’ny fivorian’ny mpanota no mirehitra ny afon’Andriamanitra; ary eo amin’ny vahoaka mpikomy no hiredaredan’ny fahatezerany[130].

⁷Ny Tompo tsy namela heloka an’ireo rapeto fahiny, izay natoky ny herin’ny tenany ka nikomy taminy[131].

⁸Ilay tanàna nonenan’i Lôta dia tsy notsitsîn’ny Tompo, satria naharikoriko Azy ny fiavonavonany sahy loatra[132].

⁹Tsy nananan’ny Tompo indrafo ireo Kanahanita izay vahoaka voatolotra haringana ka nofongorana noho ny fahotany[133].

¹⁰Tsy nananany indrafo toy izany koa ireo vahoaka israelita andiany eninjato, izay samy maty noho ny ditram-pony avy[134].

¹¹Na anankiray ihany aza no mafy hatoka, dia mahagaga loatra raha ho afa-maina izy, satria samy ao amin’ny Tompo avokoa na ny indrafo na ny fahatezerana: mahery mamela heloka Izy fa mandraraka ny fahatezerany koa.

¹²Araka ny haben’ny indrafony no hamafin’ny famaizany; hotsarainy araka ny asany avy ny olombelona[135].

¹³Ny mpanota tsy ho afa-mandositra miaraka amin’ny remby azony; ny fahari-pon’ny olona tia vavaka kosa dia tsy ho diso fanantenana.

¹⁴Ny Tompo dia hanome sehatra hatrany hanaovana asa fiantrana isan-karazany; ka samy araka ny asa nataony avy no hahazoan’ny tsirairay valiny[136]. Tsy misy takona amin’Andriamanitra

¹⁷Aza manao hoe: «Hiafina lavitra ny Tompo aho; iza moa, avy any ambony any, no hahatsiaro ahy? Ho hadino ao anaty vahoaka marobe ao aho; satria zinona moa izao tenako izao ao anatin’ny voaary tsy hita lany?

¹⁸Indro ny lanitra sy ny faritra ambony lavitra any mbamin’ny tany sy ny hantsan-dranomasina fa mihozongozona rehefa tsidihin’ny Tompo[137];

¹⁹ny tendrombohitra sy ny fanambanin’ny tany dia indray mihorohoro rehefa jereny[138].

²⁰Koa tsy raharahain’Andriamanitra akory aho ary tsy mampiraika Azy ny fitondrantenako.

²¹Raha manao ratsy aho, tsy misy hahita ahy; ary raha mandainga miafina aho, tsy misy hahalala.

²²Iza no hanambara amin’Andriamanitra ny zavatra tsara mba nataoko? Ary inona no azoko andrandraina amin’ny fitandremana ny didiny[139]?»

²³Izany no fihevitry ny olona tsy ampy fisainana; hadalana no hany eritreretin’ny ketrina maniasia[140]. AMBOARAM-PAMPIANARANA FAHAROA Ny fahendren’Andriamanitra eo amin’ny fahariana

²⁴Mba mihainoa ahy, anaka, ary raiso ny fahaizako; ka aoka hifantohan’ny fonao ny lahateniko!

²⁵Fanabeazana voalanjalanja no hasehoko, ary fahaizana marim-pototra no hambarako.

²⁶Tamin’ny naharian’ny Tompo azy no nisian’ireo asany hatrany am-piandohana; ary hatramin’izany nanaovany azy izany no nanavahany ny zavatra ho isan-tokony[141].

²⁷Nataony hirindra maharitra mandrakizay ireo planeta hatrany am-piandohany ka hatramin’ny hoaviny elabe any; tsy mahatsiaro sasatra na noana ireo ary tsy mba mandao ny anjara asany[142].

²⁸Tsy mbola nifandona na oviana na oviana ireo ary tsy mbola nisy nitsipaka ny baikon’Andriamanitra.

²⁹Avy eo ny Tompo dia nitsinjo ny tany ka nanome azy ny zava-tsoany mitafotafo;

³⁰nofenoiny biby isan-karazany ny vohony, ka amin’ny tany no tsy maintsy hiverenan’ireny[143].