Read Dikateny Iombonana Eto Madagasikara Bena-Siràka 18 Bible Online

Bena-Siràka 18 - Dikateny Iombonana Eto Madagasikara bible

Bena-Siràka 18

¹Lehibe Andriamanitra Ilay velona mandrakizay no nahary ny zavatra rehetra tsy an-kanavaka.

²Ny Tompo irery no hambara fa marina[158].

⁴Tsy misy olona notendreny hilaza ny asa hataony; zovy àry no hahita ny zava-dehibe hoefainy?

⁵Iza no hahatombana ny herin’ny fiandrianany? Zovy no hahavisavisa ny indrafo nasehony?

⁶Tsy misy hanalana tsy misy hampiana sady tsy azo takarina velively ny zava-mahagaga ataon’ny Tompo[159].

⁷Rehefa tapitra mikaroka ny olombelona, dia vao eo amin’ny manomboka ihany; ary nony mijanona izy, dia mbola sahiran-kevitra ihany[160]. Bitika ny olombelona

⁸Inona moa ny olombelona? Ary inona no ilana azy? Midika inona moa ny soa vitany na ny ratsy ataony[161]?

⁹Ny isan’ny andro iainan’ny olombelona dia zato taona raha betsaka indrindra[162].

¹⁰Rano indray mitete avy amin’ny ranomasina na koa fasika madinika anankiray monja: toy izany ireo taona vitsivitsy iainany raha miolotra amin’ny mandrakizay.

¹¹Izany no andeferan’ny Tompo amin’ny olombelona sy andefasany famindrampo hitosaka aminy.

¹²Hitan’ny Tompo sady fantany tsara fa mahonena ny fiafaran’ny olombelona; izany no amelany heloka azy amin-kalalaham-po tokoa.

¹³Ny olombelona mamindrafo amin’ny namany akaiky, fa ny Tompo kosa mamindrafo amin’ny olona rehetra; manafay Izy sady manabe sy mampianatra, ary manao tahaka ny mpiandry ondry Izy ka mamerina ao am-bala ny andian’ondriny[163].

¹⁴Amindrany fo izay manaiky hobeaziny sy izay dodona manatanteraka ny didiny. Ny fomba fanome

¹⁵Anaka, ny soa ataonao aoka tsy harahin-datsa; ary ny fanomezanao isan-karazany aoka tsy harahin-dromoromo!

¹⁶Ny teny anankiray tononina dia mety ho tsara kokoa noho ny fanomezana; toy ny ando mamelombelona aorian’ny hafanana manko izany.

¹⁷Eny tokoa fa ny teny anankiray dia mety zava-tsoa kokoa noho ny fanomezana. Ny olona izay be fitiavana dia manambatra azy roroa. Ny fahamalinan’ny olon-kendry

¹⁹Aoka hamotopototra ianao alohan’ny hitenenanao; ary karakarao tsara ny tenanao alohan’ny hahatonga ny aretina.

²⁰Aoka hanao fandinihan-tena ianao alohan’ny fitsaran’Andriamanitra; ary amin’ny fotoana hanadihadiany anao, dia hahazo famelan-keloka aminy ianao[164].

²¹Aza miandry harary vao manetry tena ianao; asehoy fa miverina amin’Andriamanitra ianao, raha sendra tafalatsaka tamin’ny fahotana[165].

²²Aza avela hisy zavatra manankantsakana anao tsy hanefa ny voadinao amin’ny fotoanandrony; ary aza miandry antomotra ho faty ianao vao hanefa izany voadinao izany.

²³Alohan’ny hanao voady, dia aoka ho vonona ianao; fa aza manao toy ny olona maka fanahy ny Tompo[166].

²⁴Hevero fa amin’ny andro farany ianao dia mety hiharan’ny fahatezeran’Andriamanitra; ary hevero koa ny fotoana hamaizany ka hihodinany tava tsy hijery anao.

²⁵Amin’ny fotoana ananam-be dia hevero ny fotoana mosarena mety ho tonga; amin’ny fotoana ananan-karena dia hevero ny fahantrana sy fihafiana mety hidona.

²⁶Hatramin’ny maraina ka hatramin’ny hariva dia mety mivadibadika eo ny toetr’andro; mety hiova faingana toy izany koa ny zava-drehetra eo anatrehan’ny Tompo.

²⁷Mitandrin-tena hatraiza hatraiza ny olon-kendry; ary amin’ny andro itaoman’ny fahotana azy, dia miaro tena tsy hanao tsirambina izy.

²⁸Ny olona mahira-tsaina rehetra dia mahalala ny fahendrena sady manome haja an’izay nahita azy.

²⁹Ny olona nisaina tsara ny tenin’ireo dia nanjary mahazo fahendrena koa, ary namafy toy ny ranonorana ireo oha-pitenenana tsara rindra[167]. Fifehezan-tena

³⁰Aza mety hoentin’ny fitsiriritanao ary asio fifehezana ny fanirianao[168].

³¹Raha ny fitsiriritanao no hanarananao fo, dia hataony fihomehezan’ny fahavalonao ianao.

³²Aza atao foto-pifalianao ny filibana isan-karazany ary aoka ianao tsy hamato-tena hanefa ny saran’izany!

³³Aza mampahantra tena misambo-bola mba hanaovana fihinanam-be, kanefa tsy misy na inona na inona ao anatin’ny kitapom-bolanao[169].