Read Dikateny Iombonana Eto Madagasikara Bena-Siràka 19 Bible Online

Bena-Siràka 19 - Dikateny Iombonana Eto Madagasikara bible

Bena-Siràka 19

¹Ny mpiasa midoroka tsy mba hanan-karena; izay tsy miraharaha ny fahalalana onony dia hitotongana miandalandalana.

²Ny fisotro mahamamo sy ny vehivavy no mampivoana ny olona, na ny mahira-tsaina aza; ary izay miraikitra amin’ny vehivavy janga dia lehilahy miditra anaty kizo hatrany[170];

³ho rembin’ny olitra sy ny kankana no anjarany, ka ny toetra midi-kizo no hahafongotra azy. Ny loza ateraky ny resadresa-poana

⁴Izay malaky minomino ny lazaina azy dia olona maivan-doha; ary izay manao fahotana toy izany dia mamely ny tenany ihany.

⁵Izay finaritra amin’ny haratsiana dia hiharan’ny fanamelohana[171];

⁶ary izay mankahala ny resadresa-poana dia miaro tena tsy ho voan’ny loza.

⁷Aza mitati-bolana na oviana na oviana, dia tsy hisy loza hahavoa anao;

⁸Aza miresaka olona na sakaiza na fahavalo; ary aza manambara zavatra momba azy, afa-tsy raha hahadiso anao ny tsy miteny.

⁹Raha ren’ilay olona manko ianao, dia hitandrin-tena izy aminao; ary any andro hankahalany anao[172].

¹⁰Raha sendra nisy resaka renao, dia ataovy zavatra hoentinao maty; aza manana ahiahy ianao, fa tsy hampipoaka anao izany[173].

¹¹Ny teny iray tokony hotanany dia mampijalijaly ny olona adala tahaka ny mampanaintaina mafy ny vehivavy mihetsi-jaza.

¹²Mamparary ny zana-tsipîka rehefa tafatsatoka amin’ny fe; mamparary toy izany koa ny teny iray tokony hotanana rehefa latsaka ao am-pon’olona adala. Hamarino ny siosion-dresaka

¹³Fotopotory ny sakaizanao ny amin’izay siosion-dresaka momba azy. Angamba tsy nisy zavatra nataony; ary raha nisy nataony ihany, dia aoka izy tsy hamerina intsony!

¹⁴Fotopotory ny namanao ny amin’ny fanaratsiana iampangana azy. Angamba tsy nisy zavatra nolazainy; ary raha nisy nolazainy ihany, dia aoka izy tsy hamerina intsony!

¹⁵Fotopotory ny sakaizanao: Matetika manko ny endrikendrika; koa aoka ianao tsy hinohino foana izao rehetra lazaina aminao izao!

¹⁶Misy olona diso fiteny, na dia tsy fanahy iniany aza; ary iza moa no tsy nanota tamin’ny teny nataony[174]?

¹⁷Fotopotory ny namanao, alohan’ny handrahonanao azy; ary aoka homenao lanja ny lalànan’Ilay Avo Indrindra[175]! Fahendrena tena izy sy fahendrena sandoka

²⁰Ny vontoatin’ny fahendrena manontolo dia izao; ny manaja ny Tompo sy manatanteraka ny Lalàny[176].

²²Tsy mba ny fahaizana zava-dratsy no fahendrena; tsy mba ny torohevitry ny mpanota no fahamalinana.

²³Misy hakingana izay maharikoriko tokoa; ary izay tsy ampy fahendrena no adala toetra.

²⁴Aleo olona kely fahiratan-tsaina kanefa manaja ny Tompo, toy izay olona be hakingan-tsaina kanefa mandika ny Lalànany.

²⁵Misy toetra kinga sy matsilo tokoa izay enti-mandika ny rariny; ary misy fatra-panodinkodin-javatra mba hampamoaka ny didim-pitsarana irîny[177].

²⁶Misy olon-dratsy manjoko toa azon’ny alahelo, kanefa feno fitaka ny ao anatiny ao;

²⁷manakon-tava izy sady manao be marenina, kanjo nony tsy tandrintandrin’ny olona dia lasa misongona anao indray.

²⁸Misy mifady fahotana satria tsy ampy hery; kanefa hanararaotra hanao zava-dratsy izy raha vantany vao mahita hanaovana izany.

²⁹Ny tarehiny no ahalalana ny olona ary ny endriny no ahitana fa hendry izy.

³⁰Ny fitafin’ny olona sy ny fitsikiny ary ny fandehany no maneho ny toetrany[178].