Read Dikateny Iombonana Eto Madagasikara Bena-Siràka 23 Bible Online

Bena-Siràka 23 - Dikateny Iombonana Eto Madagasikara bible

Bena-Siràka 23

¹Tompo ô, Ray sady Mpiandraikitra ny fiainako Ianao; aoka aho tsy havelanao hanaraka ny fironan’ireo taovam-pitenenako ary aoka tsy havelanao hahalavo ahy ireo[209]!

²Aoka ny fisainako hampiharanao karavasim-pamolahana ary aoka ny foko hampiharanao fifehezam-pahendrena, ka tsy hitsitsy ahy amin’ny hadalàko Ianao ary tsy hamela ahy ho afa-poana ny fahotako[210]!

³Dia tsy hampiavosa ny hadisoako aho ary tsy hampitombo isa hatrany ny fahotako, ka ho afa-mijoro eo anoloan’ny mpanohitra ahy ary koa tsy hifalian’ilay fahavaloko[211].

⁴Tompo ô, Ray sady Andriamanitry ny fiainako Ianao; aza avela hanana fijery tsy maotina aho

⁵ary avilio hiala amiko ny fitsiriritan-dratsy;

⁶tsy ho azon’ny filàm-pijangajangana sy ny fanaranam-pahalotoana anie aho ary tsy havelanao hirona velively amin’ny fiontanam-po mamoafady! Mahay mamehy teny amin’ny teny atao: (a) ny fianianana

⁷Rey anaka, henoy ny fomba fifehezam-bava; izay mitandrina izany tsy mba ho voasingotra[212].

⁸Ny mpanota no ho voafandriky ny teny ataony; eo koa no hahalavo ny mpaniratsira sy mpiavonavona.

⁹Aoka ny vavanao tsy hozarinao hanao fianianana, na koa hanonontonom-poana ny anaran’ilay Masina[213]!

¹⁰Toy ny mpanompo narahi-maso hatrany ka tsy maintsy hitondra diam-kapoka eo aminy, toy izany koa izay manao fianianana sy manonontonon-dava ny anaran’ilay Masina dia tsy hialam-pahotana na oviana na oviana.

¹¹Ny olona fatra-pianiana dia mampitombo hadisoana ka tsy hialan’ny karavasy hamaizana azy ao an-tranony. Raha mianiana tsy nahy izy, dia hianjeran’ny fahotany; raha mianina maivan-doha izy, dia manota roa heny; raha nianiana tsy marina izy, dia hiharam-panamelohana ary ho tototry ny famaizana mafy kosa ny ankohonany[214]. Mahay mamehy tena amin’ny teny atao: (b) ny fomba fiteny

¹²Misy fomba fiteny masiaka tahaka ny fahafatesana: tsy handrenesana izany anie eo amin’ny zaratanin’i Jakôba! Hofadîn’ny olona tia vavaka manko izany rehetra izany ka tsy mba hihosinkosina amin’ireny fahotana ireny izy[215].

¹³Aoka ny vavanao tsy hozarinao amin’ny valavala ratsy fa mahatonga hanota amin’ny fiteny izany!

¹⁴Tsarovy ny rainao sy ny reninao rehefa mitoetra eo amin’ny fivorian’ny lehibe ianao, fandrao tsy mahatsiaro tena ianao eo anoloany ka hoentin’ny fahazaranao hilaza hadalàna; izay vao haniry ny tsy ho nateraka ianao sy hanozona ny andro nahaterahanao.

¹⁵Ny olona zatra amin’ny fiteny tsy mendrika dia tsy laitra anarina velively amin’ny andro rehetra mbola hiainany. Fahalotoana amam-pijangajangana: (a) ny lehilahy mpanaram-batana

¹⁶Maro karazana ny lehilahy manavosa fahotana, fa misy karazany anankiray manokana mihantsy ny fahatezeran’Andriamanitra: dia ny lehilahy entanin’ny fanirian-dratsy izay mirehitra hoatra ny afo midedadeda ka tsy azo vonoina mandra-pahalefy azy; mitolo-batana amin’ny fahalotoana izy ireny ka tsy hijanona mihitsy mandra-pandoron’ny afo azy;

¹⁷mamy avokoa ny vehivavy amin’ny lehilahy mpiliba ka tsy hahatofoka azy izany mandra-pahafatiny[216].

¹⁸Ao koa ny lehilahy mpandao ny fandrian’izy mivady ka manao anakampo hoe: «Iza no hahita ahy? Ny haizina manarona ahy, ny rindrina manakona ahy; tsy misy olona mahatazana ahy, ka inona no ahîko? Ilay Avo Indrindra tsy hahatsiaro ny fahotako akory[217].»

¹⁹Ny mason’ny olombelona no atahorany; ary tsy fantany fa ny mason’ny Tompo dia mahiratra inarivonarivo noho ny masoandro ka voajeriny avokoa ny fomba fiainan’ny olombelona ary tazany hatrany amin’ny toerana faran’izay miafina[218].

²⁰Fantatry ny Tompo izao rehetra izao talohan’ny nahariany azy mihitsy aza; ary mbola fantany hatrany ireny rehefa tontosa ny famitana azy.

²¹Amin’ny fotoana tsy ampoiziny akory no hisamborana ny lehilahy toy izany, ka eny an-dalamben’ny tanàna no hanafaizana azy[219]. Fahalotoana amam-pijangajangana: (b) ny vehivavy mpanitsakitsa-bady

²²Toy izany koa no hanjo ny vehivavy mpandao ny vadiny ka miteraka mpandova tamina lehilahy hafa:

²³voalohany, nandika ny Lalànan’ny Avo Indrindra izy; manaraka izany, meloka tamin’ny vadiny koa ravehivavy; fahatelo, nanao toetra maharikoriko izy tamin’ny nanitsakitsahany ny vadiny ary niteraka zaza tamina lehilahy hafa.

²⁴Hoentina eo anatrehan’ny fivoriam-bahoaka izany vehivavy izany mba hotsaraina; ary ny amin’ireo zanany koa dia hanaovana famotopotorana.

²⁵Ny zanany tsy ho mpiray firenena amin-dravehivavy ary ny zanak’ireo koa tsy hanana izany zo izany[220].

²⁶Ny fahafaham-baràka hanjo ny vehivavy toy izany dia tsy ho voakosoka na oviana na oviana; ary ozona no hiraikitra amin’ny fahatsiarovana azy.

²⁷Dia ho fantatr’izay olona sisa tavela fa tsy misy tsara noho ny fanajana ny Tompo, ary tsy misy mamy noho ny mitandrina ny didiny[221].