Read Dikateny Iombonana Eto Madagasikara Bena-Siràka 24 Bible Online

Bena-Siràka 24 - Dikateny Iombonana Eto Madagasikara bible

Bena-Siràka 24

¹AMBOARAM-PAMPIANARANA FAHATELO Fankalazana ny Fahendrena Hidera ny tenany ny Fahendrena ary hirehareha eo afovoan’i Israely vahoakany.

²Eo amin’ny fiangonan’ilay Avo Indrindra no hitenenany ary eo anoloan’ny tafiky ny Tompo[222] no hireharehany manao hoe:

³«Izaho dia nipoitra avy amin’ny vavan’ilay Avo Indrindra ary nanarona ny tany tahaka ny etona matevina[223].

⁴Izaho dia nonina tany amin’ny toerana avo any ary ny sezafiandrianako dia teo ambonin’ny andry rahona[224].

⁵Izaho irery no nahatety ny faribolan’ny lanitra ary nandehandeha tao amin’ny fanambanin’ny hantsana.

⁶Ny onjan-dranomasina sy ny tany tontolo ary ny vahoaka amam-pirenena isan-karazany dia samy nananako fahefana avokoa.

⁷Tao amin’ireny firenena rehetra ireny no nitadiavako toeram-pitsaharana: Ao amin’ny faritr’iza no hitoerako?

⁸Dia nanome baiko ahy ilay Mpahary ny zava-drehetra ary nampiorim-ponenana ahy Ilay nanao ahy ka niteny hoe: «Monena ao amin’ny taranak’i Jakôba; aoka ho ao amin’i Israely ny zarataninao!»

⁹Talohan’ny nanombohan’ny fotoana manam-petra no efa nanao ahy Ilay Mpahary ny zava-drehetra; ary tsy hitsahatra na oviana na oviana ny hisy aho.

¹⁰Nanao fanompoana teo anatrehany aho tao amin’ny Fonena-masina[225], ka dia tao Tsiôna araka izany no fonenan-draikitra ho ahy.

¹¹Tao amin’ilay tanàna lalainy no nampiorenany ahy ary ao Jerosalema no iharan’ny fahefàko.

¹²Tao amina vahoaka manan-daza no nifotorako, dia tao amin’ny anjaralovan’ny Tompo izany.

¹³Nisandratra tahaka ny sedera any Libano aho ary tahaka ny kipresy ao amin’ny tendrombohitra Hermôna.

¹⁴Nisandratra tahaka ny antrendry tao Haîna-Gedỳ aho ary tahaka ny tahom-bonindraozy novolena tao Jerikao; eny, tahaka ny fototr’ôliva teo amin’ny lemaka ary tahaka ny hazo platana tokoa no nisandratako.

¹⁵Namoaka hanitra tahaka ny kanelina aho, hanitra tahaka ny balsamo mamerovero ary koa tahaka ny miora voafantina, tahaka ny galbanôma sy ôniksa mbamin’ny natafa ary tahaka ny eton’emboka ao amin’ny Fonena-masina[226].

¹⁶Nisandrahaka tahaka ny hazo terebinta aho, ka feno fiandrianana sy hatsarana ny rantsako.

¹⁷Nandefa tsiry mahafinaritra tahaka ny voaloboka aho, ka namokatra voa marevaka sy milonjehitra ny voniko[227].

¹⁹Avia atỳ amiko ianareo izay maniry ahy, ka mivokisa ny vokatra avy amiko ianareo;

²⁰Mamy noho ny tantely ny fahatsiarovana ahy; ary ny fananana ahy dia mahafinaritra mihoatra noho ny mahita toho-tantely.

²¹Izay mihinana ahy mbola te hihinana ahy kokoa; ary izay misotro ahy mbola hangetaheta ahy[228].

²²Izay mihaino ahy tsy mba ho diso fanantenana ary izay miombona asa amiko tsy mba hanota. Ny Fahendrena sy ny Lalàn’Andriamanitra

²³Ireo zavatra rehetra voalaza teo ireo dia raketin’ny bokin’ny fanekempihavanana, izay nataon’Andriamanitra Avo Indrindra, ilay Lalàna izay nampitain’i Mosesy tamintsika mba ho lova ao amin’ny sinagôga izay iangonan’ireo taranak’i Jakôba[229].

²⁵Io Lalàna io no mampihanaka ny fahendrena[230] tahaka ny ony Pisôna na ny ony Tigra amin’ny vaninandro lohataona.

²⁶Io Lalàna io no mahatonga ho tondra-pahalalana tahaka ny ony Eofrata na ny ony Jôrdàna amin’ny vaninandro fijinjàm-bokatra[231].

²⁷Io Lalàna io no mampitosaka ny fananarana tahaka ny ony Neily na ny ony Gihôna amin’ny vaninandro fiotazam-boaloboka.

²⁸Ny olona voalohany nianatra ny fahendrena dia tsy mahatapitra ny fahalalana azy; toy izany koa ny olona farany nianatra azy dia tsy mbola nahatakatra ny halaliny.

²⁹Midadasika noho ny ranomasimbe ny heviny ary lalina noho ny hantsambe ny fisainany.

³⁰Ary izaho dia toy ny tatatra mampiely rano avy amin’ny ony, na tahaka ny lakan-drano mitarika rano hankao anaty saha,

³¹ka hoy aho hoe: «Hotondrahako ny tanimboliko ary hovontosako rano ny zaridainako.» Dia indro aho ilay tatatra fa nanjary ony, ary ilay ony nanovozako nanjary ranomasina.

³²Koa tahaka ny mazavatsinanana. no hampamirapiratako ny fananarako, ary hanapariahako ny fahazavàny ho tafapaka any lavitra any.

³³Tahaka ny hafatry ny mpaminany no mbola hampielezako ny fampianarako ary hamelako izany ho lova ho an’ireo taranaka any aoriana.

³⁴Jereo fa tsy ho ahy irery no nikelezako aina, fa ho an’izay rehetra mitady ny fahendrena.