Read Dikateny Iombonana Eto Madagasikara Bena-Siràka 25 Bible Online

Bena-Siràka 25 - Dikateny Iombonana Eto Madagasikara bible

Bena-Siràka 25

¹Zavatra telo tsara sy zavatra telo ratsy Misy zavatra telo izay tiako fatratra tokoa sady tsara eo imason’Andriamanitra sy ny olona; dia ny mpiray tampo mifankatia sy ny mpiara-monina mahay mihavana ary ny mpivady mahay mifanaraka.

²Olona telo karazana kosa no ankahalaiko, sady tsy tiako mihitsy ny toe-piainany: dia ny mahantra miavonavona sy ny mpanankarena manambaka ary ny anti-dahy tsy misy saina ka miliba manitsakitsa-bady[232]. Zokiolona havana-mananatra

³Raha tsy nihary harena ianao fony mbola tanora, dia hataonao ahoana no fananana rehefa antitra?

⁴Sahaza tokoa ho an’ny fotsy volo ny fahaiza-mitsara ara-drariny, ary ho an’ny loholona ny mahay manoro hevitra.

⁵Tandrify tokoa ho an’ny anti-panahy ny fahendrena ary ho an’ny manankaja ny fandinihana amam-pisainana.

⁶Satroboninahitra ho an’ny anti-panahy ny efa nisedrany toe-javatra maro fa ny tena reharehany dia ny fanajana ny Tompo. Hasambarana mihoatra ny hafa

⁷Misy zavatra sivy heveriko ho fahasambarana fa mbola misy anankiray fahafolo izay hambarako: Sambatra ny lehilahy mifaly amin’ny zanany ary koa izay mbola velona aina no mahita ny fahapotrahan’ireo fahavalony.

⁸Eny, sambatra ny lehilahy miara-mitoetra amina vady mahira-tsaina; ary koa izay tsara rindra amin’ny vadiny mihoatra noho ny firindran’ny omby sy ny boriky[233]. Sambatra ny lehilahy tsy nanota tamin’ny teniny ary koa izay tsy nanompo olona bado noho ny tenany.

⁹Sambatra ny lehilahy nahazo famalinana ary koa izay havanana amin’ny lahateny ka mahalian-tsofina an’ireo mpihaino.

¹⁰Lehibe tokoa ny lehilahy nahazo fahendrena; kanefa tsy misy mihoatra noho izay manaja ny Tompo[234]!

¹¹Ny fanajana ny Tompo dia mihoatra noho ny zava-drehetra, ka iza moa no hampitahaina amin’izay manana izany[235]? Ny vehivavy ratsy fanahy

¹³Aleo ratra hafa isan-karazany toy izay ny ratram-po; aleo haratsiam-panahy hafa isan-karazany toy izay ny haratsiam-panahin’ny vehivavy.

¹⁴Aleo voina hafa isan-karazany toy izay ny voina afitsok’ireo mpankahala; aleo famaizana hafa isan-karazany toy izay ny famaizana ataon’ireo fahavalo.

¹⁵Tsy misy poizina ratsy noho ny poizina menarana, ary tsy misy fahatezerana ratsy noho ny fahatezeram-behivavy.

¹⁶Aleoko miara-monina amin’ny liona na ny dragona toy izay miara-monina amina vehivavy ratsy fanahy[236].

¹⁷Ny faharatsiam-panahin’ny vehivavy no mampiova endrika azy ka mampanjombona ny tarehiny ho tahaka ny an’ny orsa.

¹⁸Mba mandeha ny lahy haka toerana eo afovoan’ireo mpifanila trano aminy, ary dia hisento fatratra mandre izany.

¹⁹Maivan-danja ny haratsian-toetra hafa isan-karazany, miolotra amin’ny haratsian-toetran’ny vehivavy; aoka ny anjaran’ny mpanota no hiantefa aminy!

²⁰Manahirana ho an’ny tongotry ny antitra ny fiakarana mandrevo fasika; manahirana toy izany koa ny vehivavy vavana ho an’ny vadiny bonaika.

²¹Aza mety sodokan’ny vehivavy bikana, ary aza mitsiriritra azy noho izy manan-karena[237].

²²Fahatezerana sy fahafaham-baràka ary henatra goavana no hihatra amin’ny lehilahy velomin’ny vadiny.

²³Ny vehivavy ratsy fanahy dia mandrera-po sy mampalahelo endrika ary mandratra fo; ny vehivavy izay tsy mahasambatra ny vadiny dia mampiraviravy tanana sy mampalemy lohalika azy.

²⁴Vehivavy iray no niandohan’ny fahotana sady anton’ny ahafatesantsika rehetra[238].

²⁵Aoka ny rano tsy havela ho very fotsiny, ary aoka ny vehivavy ratsy fanahy tsy homem-pahefana hiteny akory!

²⁶Raha tsy mandeha araka ny itondranao azy izy, dia aoka hisarahanao sy horoahinao[239]!