Read Dikateny Iombonana Eto Madagasikara Bena-Siràka 26 Bible Online

Bena-Siràka 26 - Dikateny Iombonana Eto Madagasikara bible

Bena-Siràka 26

¹Hasambaran’ny lehilahy tsara tokantrano Sambatra ny vadin’ny vehivavy tsara fanahy, ary hampitomboina roa heny ny andro iainany.

²Ny vehivavy mahery fo dia fifalian’ny vadiny, ka hiadana ny lahy mandritra ny taona iainany.

³Anjara soa ny vehivavy tsara fanahy: izany indrindra no anjara homena an’ireo lehilahy manaja ny Tompo;

⁴na manankarena na mahantra ny lehilahy toy izany, dia ho faly fo sy ho mirana endrika mandrakariva. Tandremo ny vehivavy ratsy fanahy

⁵Misy zavatra telo mampanahy ny foko fa misy zavatra fahefatra tena atahorako: dia ny sahoan-dresaka aelin’ny mpiray tanàna sy ny fivorivoriam-bahoaka ary ny fanendrikendrehana; samy ratsy noho ny fahafatesana ireo rehetra ireo.

⁶Fa ny fahoriam-po tena mampiferinaina dia ny mahita vehivavy mialona vehivavy hafa; ka loza no afitsoky ny teniny fa mitsabatsabaka amin’ny zava-drehetra[240].

⁷Ny vehivavy ratsy fanahy dia mitera-doza tahaka ny ziogan’omby mihilangilana; ary izay te hamolapolaka azy dia tahaka ny misambotra maingoka.

⁸Ny vehivavy mpidoroka dia zava-mahatezitra tokoa, fa tsy afaka hanafina ny tokony hahamenatra azy izy.

⁹Ny vehivavy mpijangajanga dia mora fantarina amin’ny fijeriny sahisahy sy amin’ny hodimasony[241].

¹⁰Raha misy zanakavavy maditra dia hamafiso ny fiambenanao azy; fa raha mahita anao manao tsirambina izy, dia hanaram-po amin’ny filibana[242].

¹¹Tandremo koa ny fijeriny tsy mahalala menatra; ary aza gaga raha mamitaka anao izy.

¹²Toy ny ataon’ny mpivahiny mangetaheta misoka-bava ka misotro amin’izay karazan-drano sendra azy, toy izany koa no hipetrahan’ny vehivavy janga eo anoloan’ny tsimaday rehetra sy hanokafany ny fitoeran-jana-tsipîkany amin’ny zana-tsipîka rehetra. Fankalazana ny andefimandry mahafatra-po

¹³Ny hasoan’ny vehivavy no hampifaly ny vadiny, ary ny haitao ananany no hampahery tena azy.

¹⁴Ny vehivavy mahatam-bava dia fanomezan’ny Tompo, sady tsy azo tombanam-bidy izy raha nobeazina tsara.

¹⁵Soa anampy soa ny vehivavy maotina, ary tsy azo tombanana izy raha mahonon-tena[243].

¹⁶Tahaka ny masoandro misandratra ho eny amin’ny habakabaka ambony eny no isehoan’ny bikan’ny vehivavy soa ao an-tranony voaravaka tsara.

¹⁷Tahaka ny jiro mirehitra eo ambonin’ilay fitoeran-jiro masina[244] no isehoan’ny hatsaran-tarehy eo ambonin’ny toe-batana mirindra.

¹⁸Tahaka ny andry volamena eo ambonin’ny fototra volafotsy no fijery ny ranjo tsara tefy eo ambonin’ny faladia tomady[245]. Toe-javatra mahasosotra

²⁸Misy zavatra roa mampalahelo ny foko, ary anankiray fahatelo manetsika ny hatezerako: dia ny mpanankarena nanjary ory satria niharan’ny fahantrana; ny olona mahira-tsaina kanefa tevatevaina; ary indrindra ny miala amin’ny fahamarinana mba hivarilavo amin’ny fahotana: omanin’ny Tompo ho fatin’ny sabatra izy. Ny fakampanahin’ny mpivarotra

²⁹Sarotra ho an’ny mpandranto ny miaro tena tsy hanota; ary tsy ialam-pahotana hatrany ny mpivarotra.