Read Dikateny Iombonana Eto Madagasikara Bena-Siràka 27 Bible Online

Bena-Siràka 27 - Dikateny Iombonana Eto Madagasikara bible

Bena-Siràka 27

¹Maro no nanota mba hahazoana tombony; ary izay maniry hangoron-karena dia tsy te hahalala zavatra hafa[246].

²Tahaka ny itsofohan’ny tsimaday eo anelanelan’ny vato anankiroa no isisihan’ny fahotana eo anelanelan’ny mpivarotra sy mpividy.

³Izay olona tsy mifahatra mafy amin’ny fanajana ny Tompo dia ho rava faingana ny tranony. Ny tenin’ny olona no manambara ny ao am-pony

⁴Rehefa misy zavatra tantavanina, dia tavela ny faikany; toy izany koa no isehoan’ny kileman’olona, rehefa misy famelaran-kevitra ataony.

⁵Ny fatana no isedrana ny tefin’ny mpanao vilany; ary ny fiadian-kevitra no izahan-toetra ny olona[247].

⁶Ny voa vokariny no mampiseho izay fomba nanolokoloana ny hazo; toy izany koa ny lahatenin’ny olona no mampiseho ny hevitry ny fony[248].

⁷Aza mba midera olona ianao alohan’ny famelaran-kevitra ataony, satria izany no izahan-toetra ny olona. Ny fahamarinana

⁸Raha zohînao ny fahamarinana, dia hahatratra azy tokoa ianao ka hitafy azy toy ny akanjom-boninahitra[249].

⁹Ny vorona mitovy karazana no miray akany; toy izany koa ny toetra mahatoky no hasetry an’ireo olona mahatoky.

¹⁰Manotrika mikendry remby ny liona; toy izany koa no ikendren’ny fahotana an’ireo olona mampihatra ny tsy rariny[250].

¹¹Fahendrena mandrakariva no resaky ny olona tia vavaka; fa miovaova hoatra ny volana kosa ny olona adala.

¹²Lanjalanjao ny fotoana mety raha hankeo anivon’ny tsy manan-tsaina ianao; fa mijanòna maharitra kosa raha eo anivon’ny olona mpandinika ianao.

¹³Maharikoriko ny resaky ny olona adala ary fanaranam-po amin’ny fahotana ny hehiny.

¹⁴Mampitsangam-bolo ny fitenin’izay fatra-mpingoso ary mampanentsin-tadîny ny fifandirany[251].

¹⁵Fandatsahan-dra no iafaran’ny fifandiran’ny mpiavonavona; ary mankararirary ny mihaino ny fifanebatebahany. Ny tsiambaratelo

¹⁶Izay manambara ny tsiambaratelo dia tsy azo itokiana ary tsy mba hahita sakaiza mahafa-po azy intsony[252].

¹⁷Tiavo ny sakaizanao ary anehoy toetra mahatoky; fa raha manambara ny tsiambaratelony ianao, dia aza mba midodododo any aminy intsony.

¹⁸Tahaka ny olona namoy hava-maty no namoizanao ny fitiavan’ilay namanao[253];

¹⁹ary tahaka ny nandefasanao ny vorona efa teo an-tananao no namelanao ny sakaizanao handeha, ka tsy hahatratra azy intsony ianao.

²⁰Aza manjohy azy intsony, fa efa lasa lavitra izy sady mandositra tahaka ny gazela afa-pandrika.

²¹Azo asiana fehim-pery ny ratra ary azo ampihavanina ny mpifanaratsy; fa tsy misy fanafana antenaina intsony ho an’izay nanambara ny tsiambaratelo. Ny fihatsarambelatsihy

²²Izay manakimpikimpy maso dia mamoron-teti-dratsy; fa izay mahalala azy kosa hanalavitra azy[254].

²³Eo imasonao izy hanao resaka mamy sady ho talanjona amin’ny teninao; fa ao ambadika kosa dia hivadi-bolana izy ka hampiasa ny teninao hamandrihana anao.

²⁴Misy zavatra maro ankahalaiko fa indrindra io karazan-toetra io; ary ny Tompo koa dia hankahala azy. Ny ratsy atao no miverina

²⁵Izay manipy vato savoan-danitra dia hitoraka ny lohany ihany; toy izany koa ny famelezana am-pitaka dia handratra ny nanao azy.

²⁶Izay mihady lavaka no hilatsaka ao; ary izay mamela-pandrika no ho voan’izany[255].

²⁷Izay manao ratsy no hifoterany ka tsy ho fantany akory izay fiavian-doza.

²⁸Ny mpiavonavona dia mananihany sy manesoeso; fa toy ny liona manotrika mikendry remby kosa no iandrasan’ny famalian-dratsy azy.

²⁹Ho voa ao anatin’ny vela-pandrika ireo mifaly amin’ny fahavoazan’ny mpivavaka; ka hokikisan’ny fijaliana izy alohan’ny hahafatesany. Lolom-po sy famelana

³⁰Zavatra maharikoriko ihany koa ny lolom-po amam-pahatezerana, ka ny mpanota no anjakazakany.