Read Dikateny Iombonana Eto Madagasikara Bena-Siràka 28 Bible Online

Bena-Siràka 28 - Dikateny Iombonana Eto Madagasikara bible

Bena-Siràka 28

¹Izay mamaly ratsy ny hafa dia hahita famaliana avy amin’ny Tompo, fa hosarotsarotiny tokoa Izy amin’ny fahotan’izany olona izany[256].

²Avelao ny tsy rariny nataon’ny namanao; dia havela heloka ianao, rehefa mivavaka[257].

³Akory ity olona mitahiry fahatezerana amin’olon-kafa, nefa mangataka amin’ny Tompo fanasitranana ho an’ny tenany;

⁴tsy mba mamindrafo amin’ny olombelona tahaka azy izy, ka ahoana no mivavaka hamelàn-keloka ny tenany[258]?

⁵Izy nofo osa sy malemy aza mitahiry lolom-po, ka iza indray no hahazoany famelan-keloka?

⁶Tsarovy ny hiafaranao ka atsaharo ny fankahalana; tsarovy ny fahafatesana amam-pahalòvana ary dia tandremo ny didin’Andriamanitra.

⁷Tsarovy ny didy ka aza manao lolom-po amin’ny namana; tsarovy ny fanekempihavanan’ilay Avo Indrindra, ary ataovy odian-tsy hita ny hadisoan’olona taminao. Ny fifandirana

⁸Halaviro ny fifandirana, dia hihavitsy ny fahotanao, satria ny olona saro-po no hampirehitra ny fifandirana;

⁹mampikorontana ny mpisakaiza kosa ny mpanota sady mampisy saritaka eo anivon’ny mpihavana.

¹⁰Arakaraka ny kitay amelomana azy no hirehetan’ny afo; ary arakaraka ny ikirîna mafy hifanditra no hirehetan’ny fifandirana[259]. Arakaraka ny fahatanjahan’ny olona no hahatezerany, ary arakaraka ny harena ananany no hahavinirany.

¹¹Fifanolanana tsy ampoizina no mampirehitra ny afo; ary fifandirana tampoka no mampandriaka ny ra[260].

¹²Raha tsofinao ny vainafo dia hirehitra, ary raha rorànao kosa izy dia ho faty, kanefa samy nivoaka avy tao am-bavanao izany. Ny mpanao vava ratsy

¹³Ho voaozona anie ny mpitakoritsika sy mpiroa lela, fa maro ny mpihavana izay efa simbany[261]!

¹⁴Efa nampihozongozona olona maro tokoa ny sahoan-dresaka naely momba azy sady efa nandroaka azy hifindrafindra firenena; efa nandoza tanàna mimanda koa izany ary efa nampikorontana ny ankohonan’ireo lehibe.

¹⁵Efa nampandroaka vehivavy mahery fo ny sahoan-dresaka naely momba azy, sady efa nahafoana ny vokatry ny asany.

¹⁶Izay mihaino ny sahoan-dresaka dia tsy mba hahita ny fitsaharana ary tsy hitoetra hombàm-piadanana intsony.

¹⁷Mampisy mangana ny famelezan’ny karavasy, fa manapa-taolana[262] ny famelezan’ny sahoan-dresaka.

¹⁸Maro no efa lavon’ny lelan-tsabatra, kanefa vitsy noho ny efa lavon’ny sahoan-dresaka[263].

¹⁹Sambatra izay voaaro tsy tratry ny sahoan-dresaka, dia izay tsy voatolotra hiharan’ny fisafoahany sady tsy mitondra ny ziogany no tsy voagejan’ny fatorany.

²⁰Zioga vy tokoa ny ziogan’ny sahoan-dresaka. ary fatorana varahina ny fatorany;

²¹fahafatesana mahatsiravina ny fahafatesana afitsony, ka aleo ny toeran’ny maty noho ny sahoan-dresaka.

²²Tsy mba voafehin’ny sahoan-dresaka ny olona tia vavaka ary tsy mba handoro azy ny firedaredan’ny afony.

²³Izay mahafoy ny Tompo no ho lavo amin’ny famelezan’ny sahoan-dresaka hirehitra tsy mety maty eo aminy; fa halefa hamely azy tahaka ny liona izany ary hamiravira azy tahaka ny biby leôparda.

²⁴Jereo fa hodidininao fefy tsilo ny taninao, ary fehezinao mafy ny volafotsinao sy volamenanao;

²⁵toy izany koa asio varavarana voahidy tsara ny vavanao, ary imasoy fatratra ny handanjalanjanao ny teninao.

²⁶Tandremo mba tsy ho diso amin’ny teny ianao, fandrao ho potraka eo anoloan’izay mitily anao.