Read Dikateny Iombonana Eto Madagasikara Bena-Siràka 29 Bible Online

Bena-Siràka 29 - Dikateny Iombonana Eto Madagasikara bible

Bena-Siràka 29

¹Ny mampisambotra Izay mampisambotra amin’ny namany dia manao asa fiantrana; ary izay manohana azy amin’ny fanampiana dia mitandrina ny didin’Andriamanitra[264].

²Ampisambory vola ny namanao amin’ny fotoam-pahasahiranany; kanefa avereno amin’ny fotoana nifanarahanareo ny vola nampisamboriny anao[265].

³Tano ny teninao ary aoka hahatoky azy ianao, dia ho hitanao mandrakariva izay ilainao.

⁴Heverin’olona maro ho toy ny zavatra hitany sy azony tahirizina ho fananany ny zavatra izay nampisamborina azy; ka miteraka fahasahiranana izany ho an’ireo nanampy azy.

⁵Hanoroka ny tananao ny mpitrosa ary hanao teny malefaka ny amin’ny fanananao ambara-pahazony ny volanao; kanjo amin’ny fotoana famerenany, dia manao hataka andro izy ka teny fitarainana hatrany no havaliny ary ny andro sarotra no homeny tsiny.

⁶Raha mba manan-kaloa ihany ny mpitrosa, dia zara raha ny antsasaky ny nosamboriny no azo ka hataon’ny mpampisambotra ho vintana tsara izany. Fa raha tsy manan-kaloa ny mpitrosa, dia very maina ny fananan’ny mpampisambotra ary tonga fahavalony kosa ity mpitrosa izay hamaly azy ozona sy ompa ary fanesoana ho solon-boninahitra.

⁷Koa maro no mandà tsy hampisambotra noho izany faharatsian’ny olona izany, fa matahotra izy sao very maina ny volany[266]. Ny fiantrana

⁸Kanefa aoka ianao hahari-po amin’ny ory, ary aza mangataka andro amin’ny fiantrana azy!

⁹Aoka ny didin’Andriamanitra no hamonjenao ny sahirana, ary aza ampialanao maina izy noho ny fahantrany[267]!

¹⁰Aoka ianao ho vonona ho very vola hanasoavanao ny mpiray tampo aman-tsakaiza, toy izay hamela vola ho very foana hoharafesina ao ambanin’ny vato!

¹¹Ampiasao araka ny didin’ilay Avo Indrindra ny harenao[268], dia hahasoa anao bebe kokoa noho ny volamena izany.

¹²Aoka ianao hanidy ny fiantrana vitanao ho ao anatin’ny fitahirizan-drakitrao, fa hanafaka anao amin’ny loza isan-karazany izany[269];

¹³mihoatra noho ny ampinga mafy sy ny lefona mahery no hiadiany hiaro anao eo anoloan’ny fahavalo. Ny mitolo-tena ho mpiantoka

¹⁴Ny olona tsara fo dia ho mpiantoka ny namany, fa izay efa lany henatra ihany no handao azy.

¹⁵Aza manadino ny soa nataon’ny mpiantoka, fa ny ainy no efa nomeny hisolo anao.

¹⁶Ny mpanota no handany foana ny haren’ny mpiantoka azy

¹⁷ary ny tsy mpankasitraka no handao izay namonjy azy.

¹⁸Ny mitolo-tena ho mpiantoka dia efa nahavery olona maro izay niadana tsara, ary efa nampivembena azy ireo tahaka ny onjan-dranomasina; nahalao monina olona manampahefana izany ary nampirenireny azy tany amin’ny firenen-kafa.

¹⁹Dodona ny mpanota hilatsaka ho mpiantoka, saingy fatra-pitady tombom-barotra loatra izy ka hiharan’ny famelezana any am-pitsarana.

²⁰Vonjeo ny namanao araka izay zakanao, kanefa tandremo sao mamandri-tena ianao. Aza miankina amin’ny hafa

²¹Ny lohalaharana amin’ny tohan’aina dia ny rano sy ny sakafo ary ny fitafiana mbamin’ny trano hitandroana ny haja[270].

²²Aleo miaina mahantrahantra ao an-tranon’ny tena toy izay sakafo mandany be any an-tranon’olon-kafa.

²³Aoka hianina ianao, na be na kely anananao[271], dia tsy handre ny tenanao esoina ho vahiny!

²⁴Fiainana mampiferinaina ny mitety trano, sady atao vahiny ianao ka tsy mahazo miloa-bava.

²⁵Hanome hanina amam-pisotro ny tompon-trano ianao, kanefa tsy hahazoanao fankasitrahana akory izany; ary fanampin’izany aza ianao handre teny mangidy hoe:

²⁶«Avia, ry vahiny, amboary ny sakafo; ary raha manan-javatra ianao, omeo ahy hohaniko.»

²⁷Na hoe: «Mandehana any, ry vahiny, omeo ny mendrika azy kokoa ny toerana; hiara-mitoetra amiko ny rahalahiko ka mila ny tranoko aho.»

²⁸Mafy amin’ny olona manan-tsaina ireto zavatra ireto: dia ny fandatsana ataon’ny mpampiantrano sy ny fanalàm-baràka ataon’ny mpampisambotra.