Read Dikateny Iombonana Eto Madagasikara Bena-Siràka 3 Bible Online

Bena-Siràka 3 - Dikateny Iombonana Eto Madagasikara bible

Bena-Siràka 3

¹Adidy amin’ny ray aman-dreny Henoy, rey anaka, ny anatry ny rainareo ary ampiharo izany mba hamonjena anareo[26];

²fa ny Tompo manome voninahitra ny ray eo amin-janany, ary manorina ny fahefàn’ny reny eo amin’ny naterany.

³Izay manaja ny rainy dia manoni-pahotana

⁴ary izay manome voninahitra ny reniny dia tahaka ny olona manangon-karena.

⁵Izay manaja ny rainy dia hampifalîn-janaka ary hohenoina amin’ny andro ivavahany.

⁶izay manaja ny rainy ho lava andro iainana, izay manaiky ny Tompo hahafa-po ny reniny[27];

⁷tahaka ny mpanabe azy no anompoany ray aman-dreny.

⁸Hajao ny rainao, na amin’ny atao na amin’ny teny, mba hirotsahan’ny tsodranony aminao[28];

⁹fa ny tsodranon-dray aman-dreny manamafy ny tranon’ireo zanany, ary ny ozony kosa mampiongotra ny fanorenany[29].

¹⁰Aza atao voninahitra ho anao ny fahafaham-baràkan-drainao, satria tsy ahazoanao voninahitra ny fahafaham-baràka mihatra aminy;

¹¹ny voninahitry ny rainy manko no iavian’ny hajan’ny olona; ary ny reny voatevateva dia henatra ho an’ny zanany.

¹²Karakarao, anaka, ny rainao amin’ny fahanterany ary aza ampalahelovina izy amin’ny andro iainany.

¹³Na dia very saina aza izy, dia anehoy fandeferana; ary aza manatsinontsinona azy ianao izay heni-tanjaka[30].

¹⁴Satria ny fiantrana ataonao amin-drainao dia ho tsaroan’Andriamanitra hatrany; ho solon’ny fahotanao izany sy ho fanambinana ny tranonao.

¹⁵Hotsarovan’Andriamanitra ianao amin’ny andro mahory; ka toy ny ranomandry levon’ny masoandro no indro hahalevonan’ny fahotanao.

¹⁶Izay mahafoy an-drainy dia mpanevateva an’Andriamanitra ary izay mampahatezitra ny reniny dia ho voaozon’ny Tompo[31]. Ny fanetrentena

¹⁷Anaka, ataovy amin-kalemen-panahy ny asanao, dia hotiavina noho ny olona malala-tanana ianao.

¹⁸Arakaraka ny maha lehibe anao no ietreo tena, dia hahita sitraka amin’ny Tompo ianao[32]!

²⁰Na lehibe aza manko ny fahefàn’ny Tompo, dia ny manetry tena no manome voninahitra Azy.

²¹Aoka ianao tsy hitady zava-tsarotra loatra aminao ary tsy hikarokaroka izay tsy tratry ny herinao!

²²ny didy nampitaina taminao no saintsaino, fa tsy ilaina hanadihady ny zava-miafina ianao[33].

²³Aza milofo amin-draharaha tsy tratran’ny eritreritrao, fa ny naseho anao aza efa tsy takatry ny sain’olona.

²⁴Efa nampivoana olona maro ny fahadisoan-keviny, ka ny fisainana ratsy no nampivily eritreritra azy[34]. Ny fiavonavonana

²⁶Hiafara amin’ny fahavoazana ny fo maditra, ary izay mankamamy loza no ho fatin’izany.

²⁷Hivesatra fahoriana ny fo maditra, ary fahotana mifanongoa no havosan’ny mpanota.

²⁸Tsy laitram-panafody ny voina mahazo ny mpiavonavona, satria efa tsara fototra ao aminy ny tsirim-paharatsiana.

²⁹Ny fon’ny olona misaina no hieritreritra ny fanoharana; ny sofina malady no zavatra irîn’ny hendry. Ny asa fiantrana

³⁰Ny rano mamono ny afo midedadeda ary ny asa fiantrana mikosoka ny fahotana.

³¹Izay manao asa soa dia mitsinjo ny ho avy, ka hahita fiankinana fony izy hivembena[35].