Read Dikateny Iombonana Eto Madagasikara Bena-Siràka 30 Bible Online

Bena-Siràka 30 - Dikateny Iombonana Eto Madagasikara bible

Bena-Siràka 30

¹Ny fanabeazana Izay tia ny zanany no mahavatra mikaravasy azy mba hifaliany aminy kosa any am-parany any[272].

²Izay tsara fanabe ny zanany hahazo fahafaham-po aminy; ary eo afovoan’ny olom-pantany no hireharehany aminy.

³Izay mampianatra ny zanany dia hahatonga ny fahavalo hialona; ary eo anatrehan’ny sakaizany no hahazoany miravoravo ny aminy[273].

⁴Maty ihany ny rainy nefa toy ny tsy maty, satria tahaka azy ilay navelany rehefa lasa izy.

⁵Fony velona ny rainy, dia nahita azy sy nifaly taminy; ary rehefa maty kosa izy, dia tsy nitondra alahelo.

⁶Ny zanany no navelany ho mpamaly ny fahavalony ary haneho fankasitrahana an’ireo sakaizany[274].

⁷Izay mampihanta ny zanaka, dia mbola hamehy fery; ary hangotika ny atiny isaky ny antsoantson-janany.

⁸Tonga maditra ny soavaly tsy voafolaka; ary mikorosy fahana ny zaza nampanaranim-po.

⁹Raha tambatambazanao ny zanakao, dia hampangovitra anao; raha zatra sangisanginao izy, dia hampitomany anao.

¹⁰Aza miara-mihomehy amin-janaka, fandrao hiaraka ory aminy ianao; ary any am-parany any aza dia hikitro-nify foana ianao.

¹¹Aoka ianao tsy hamela zanaka hanao izay saim-pantany, raha mbola tanora izy; ary aza odian-tsy hita ny hadisoany[275].

¹²Ataovy mangan-tehezana ny zanakao, raha mbola anaty fahazazana; fandrao ho tonga maditra izy, ka tsy hanaiky anao intsony[276].

¹³Beazo ny zanakao ary milofosa hitaiza azy, fandrao ho tonga fandatsana anao ny fitondrantena mahamenatra hataony. Ny fahasalamana

¹⁴Aleo ny mahantra izay salama sy matanjaka, toy izay ny mpanankarena izay saozanim-batana.

¹⁵Aleo salama sy finaritra toy izay hanana ny volamena rehetra; aleo vatana mavitrika toy izay harena tsy hita lany.

¹⁶Tsy misy harena tsara noho ny fahasalamàm-batana, ary tsy misy hafinaretana lehibe noho ny hafaliam-po.

¹⁷Aleo maty toy izay velon-dratsy; ary aleo fitsaharana mandrakizay toy izay aretina maharitra[277].

¹⁸Ny hanim-py aroso amin’ny olona malain-komana dia tahaka ny sakafo atao fanatitra eo ambony fasana[278]:

¹⁹inona no soa azon’ny razana amin’izany? Tsy azony hanina na hamboloina akory ilay sakafo[279]. Toy izany koa no manjò ny olona izay tanahin’ny Tompo amin’ny aretina:

²⁰mijery dia mijery izay aroso azy izy sady misento, tahaka ny fisenton’ny lehilahy vositra izay mamihina tovovavy virijiny[280]. Ny hafaliana

²¹Aza avela hianjadian’alahelo ny fonao, ary aza mampahory tena amin’ny eritreritrao.

²²Ny hafaliam-po mampateza aina ny olona ary ny firavoany no mahela ny androny.

²³Ario dia ny fanahinao ka ampaherezo ny fonao, ary roahy lavitra anao ny alahelo; satria efa nahafaty olona maro ny alahelo sady tsy misy soa azo rehefa ianjadiany.

²⁴Ny fialonana amam-pahatezerana no mahafohy andro iainana, ary ny fanahiana no mahatonga fahanterana alohan’ny fotoana.

²⁵Ny fo mirana dia manampy hazoto homana sady mampifantoka tsara amin’ny sakafo.