Read Dikateny Iombonana Eto Madagasikara Bena-Siràka 31 Bible Online

Bena-Siràka 31 - Dikateny Iombonana Eto Madagasikara bible

Bena-Siràka 31

¹Fandriky ny harena[281] Mampahia olona ny tsy fahitàn-tory ateraky ny harena; ary manala torimaso rahateo koa ny fanahiana azy.

²Na dia ny ho rendremana fotsiny aza dia sakanan’ny ahiahim-piambenana mova tsy ny aretina mafy mampandositra torimaso.

³Milofo hampiavosa fananana ny mpanankarena; ary, rehefa miala sasatra izy, dia mivoky fahafinaretana[282].

⁴Milofo hiaina mitsitsy foana ny mahantra; ary, rehefa miala sasatra izy, dia manjary sahirana.

⁵Izay tia volamena dia tsy ialam-pahotana; ary izay fatra-pitady tombony dia hoentin’izany ho amin’ny lala-mania[283].

⁶Betsaka no efa natolotra ho rava noho ny fankamamiam-bolamena, ary tonga teo anoloan’ireo ny fahaverezana[284];

⁷satria fandrika tokoa ny volamena ho an’ireo olona fatra-pitady azy ary ny tsy misaina rehetra dia voaringany.

⁸Sambatra ny mpanankarena izay hita tsy manan-tsiny ary tsy mba nidodododo nitady volamena:

⁹Iza moa izy mba hankalazantsika azy hoe sambatra? Fa nanao fitondrantena mahagaga izy teo anivon’ireo olona iray karazana aminy.

¹⁰Iza no efa nozahan-toetra ny amin’izany ka nahatozo hatramin’ny farany? Ho foto-pireharehana ho azy tokoa izany! Iza no afa-nandika ny lalànan’Andriamanitra na koa afa-nanao ratsy, kanefa tsy nanao?

¹¹Dia ho voaorina mafy ny fananany, ary hotanisaina eo am-pivoriana ny fiantràny[285]. Ny fanasam-be

¹²Raha tafapetraka anoloan’ny latabatra be zava-tsoa, dia aza mitanatana vava ny amin’izany ianao ka ho loa-bolana hoe: «Sakafo be tokoa ireto!»

¹³Aza hadinoina fa toe-dratsy ny manana maso liana. Fa inona moa no zava-boaary ratsy kokoa noho ny maso? Izany no itomaniany amin’ny toe-javatra isan-karazany.

¹⁴Aoka ny tananao tsy hatsotranao amin’izay sakafo efa voatilin’ny mpifanila aminao, fandrao hifandona ao amin’ny loviabe ny tananareo!

¹⁵Aoka ho hainao vinanîna ny fanirian’ny namanao; ka amim-pisainana no anaovy ny fihetsikao rehetra.

¹⁶Hano amim-pahalalam-pomba ny zavatra aroso eo anoloanao; ary aza misamontsamona ianao, fandrao dia hamparikoriko ny olona.

¹⁷Aoka hitsahatra voalohany ianao noho ny maha tsara taiza anao; ary aza dia miseho ho tsy afa-po, fandrao mahasosotra olona ianao.

¹⁸Raha tafapetraka hisakafo miaraka amin’ny maro ianao, dia aoka tsy hanatsotra tanana handray alohan’ny hafa!

¹⁹Zavatra kely monja dia ampy ho an’ny olona tsara taiza: izany no tsy mahasempotsempotra azy eo am-pandriany.

²⁰Izay misakafo mahalala onony dia ombàn’ny torimaso mahasoa; mifoha maraina izy sady mavitri-tsaina. fa an’izay tsy mahalala voky kosa ny fijaliana vokatry ny tsy fahitàn-tory, ary koa ny fandoavana sy ny areti-mandalo[286].

²¹Raha noterena hihinam-be loatra ianao, dia mitsangàna ka mandehana mandoa, ary hahazo fahamaivamaivanana ianao.

²²Anaka, henoy ange aho ary aza vingavingainao, dia ho hitanao any amparany any fa marina ny teniko: mahalalà onony amin’izay rehetra ataonao, dia tsy hisy aretina hianjady aminao.

²³Izay malala-tanana amin’ny fanasana ataony dia hodokafan’ny vavan’ny olona rehetra, ka izany no porofo azo antoka fa nahafoy be izy.

²⁴Izay mahihitra amin’ny fanasana ataony dia himonomononan’ny iray tanàna, ka izany no porofo mitombina fa mahihitra izy. Ny divay

²⁵Aza manao dontolahy amin’ny divay, satria efa nahavery olona maro izy io.

²⁶Ny lafaoro no isedrana ny hamafin’ny vy haofana[287]; toy izany koa ny divay no izahan-toetra ny fo, rehefa mifanditra ny samy mpiavonavona.

²⁷Tahaka ny aina ho an’ny olona ny divay, raha sotroiny araka ny tokony ho fatrany. Fiainana inona moa no an’izay tsy manan-divay? Satria ny hifalian’ny olona no nahariana azy.

²⁸Maharavo ny fo sy mahafaly ny fanahy ny divay, raha sotroina amin’ny fotoana mety sy amin’ny antonony.

²⁹Toetra masiaka kosa no ateraky ny divay nosotroina tafahoatra, fa sady mampitabataba olona no mampivembena azy.

³⁰Ny fihetseham-pon’ny olona tsy misaina dia ampitomboin’ny hamamoana haningotra azy; sady mampihena ny heriny izany no mahatonga fandratrana azy[288].

³¹Amin’ny fanasana itosahan’ny divay, dia aza mandevilevy namana ianao na mamingavinga azy ao anatin’ny fifaliany; aza anaovanao teny fanalàm-baràka izy ary aza terenao amin’ny fitakian-trosa.