Read Dikateny Iombonana Eto Madagasikara Bena-Siràka 32 Bible Online

Bena-Siràka 32 - Dikateny Iombonana Eto Madagasikara bible

Bena-Siràka 32

¹Fenitra tokony harahina amin’ny fanasana Raha voatendry hitarika ny fanasana ianao, dia aoka mba tsy hieboebo amin’izany fa ho tahaka ny anankiray amin’ny mpihinana[289]; karakarao aloha ny toeran’ireo, vao mipetraka ianao.

²Eny, rehefa vitanao avokoa ny andraikitrao, dia makà toerana amin’izay ianao mba hifalianao mahita ny mpihinana afa-po ary koa hahazoanao satroboninahitra noho ny fandaharanao tsara ny fanasana.

³Mitenena, ry loholona, satria tandrifinao izany; mitenena araka ny fahalalana marina anananao, kanefa aza sakantsakananao ny mozika.

⁴Rehefa mihaino mozika ny olona, dia aza manao kabary lava ianao ary aza manampatra ny fahendrenao amin’ny fotoana tsy sahaza izany.

⁵Tahaka ny fitomboka vatosoa mena napetraka amina firavaka volamena, toy izany koa ny mozika tsara rindra miaraka amina fanasana itosahan-divay.

⁶Tahaka ny tombokase emeralda napetraka amina tahom-bolamena, toy izany koa ny feo mozika miaraka amina divay matsiro.

⁷Mitenena, ry zatovo, raha tokony hataonao izany, saingy rehefa niangaviana indroa misesy ianao[290].

⁸Fintimpintino ny kabarinao ka hahalaza be amin’ny teny vitsy; aoka ho toy ny mpahalala ianao kanefa koa mahay mahatam-bava!

⁹Rehefa eo ampovoan’ny lehibe ianao, dia aza mihevi-tena ho mitovy aminy; ary amin’ny toerana misy loholona, dia aza manao be filaza loatra ianao.

¹⁰Tselatra no mialoha ny kotrobaratra; toy izany koa fankateleman’ny hafa no mialoha ny olona mandanjalanja.

¹¹Rehefa tonga ny fotoana, dia mitsangàna ary aza milasilasy ho farany eo ianao; modia faingana any an-tranonao ary aza mitaredretra eny an-dalana.

¹²Any ianao no aoka hikorana sy hanao araka izay irînao, kanefa aza manota amin’ny teny be rehaka!

¹³Ary noho izany rehetra izany, misaora an’Ilay nahary anao sady mampitobaka zava-tsoa ho anao[291]. AMBOARAM-PAMPIANARANA FAHEFATRA Ny fanajana an’Andriamanitra

¹⁴Izay manaja ny Tompo no handray anatra; ary izay mitady Azy dieny vao maraina no hahazo ny fanambinana avy aminy.

¹⁵Izay mandinika ny Lalàny no hahazo fahafaham-po, fa ny mpihatsaravelatsihy ho tafintohina aminy.

¹⁶Izay manaja ny Tompo dia hahita ny hitsiny ary hampamirapiratra ny rariny hoatra fanilo.

¹⁷Mandà fananarana ny olona mpanota, fa mahita fialàn-tsiny hanao ny sitrapony[292].

¹⁸Ny olona izay tsara fanome torohevitra dia tsy manadino na oviana na oviana ny handinika; fa ny tsy mpivavaka sy ny mpiavonavona kosa dia tsy misy tahotra hampiahotra azy akory.

¹⁹Aza manao zavatra tsy amim-pandinihana, dia tsy hanenina ianao rehefa vita izany.

²⁰Aza mandeha amin’ny lalana be vato misakantsakana ianao, mba tsy ho tafintohina amin’ny toerana misy azy.

²¹Aza matokitoky foana ny lalana mitovy tantana;

²²ary mitandrema tena ianao ny amin’ny zanakao.

²³Amin’izay rehetra ataonao, dia mitandrema tena satria fitandremana ny didin’Andriamanitra koa izany.

²⁴Izay mitoky amin’ny Lalàna dia miezaka hitandrina ny didy; ary izay matoky ny Tompo dia tsy hiharam-pahavoazana[293].