Read Dikateny Iombonana Eto Madagasikara Bena-Siràka 33 Bible Online

Bena-Siràka 33 - Dikateny Iombonana Eto Madagasikara bible

Bena-Siràka 33

¹Izay manaja ny Tompo dia tsy hisy ratsy hanjo azy; fa hovonjeny hatrany izy isaka izay fitsapana mihatra[294].

²Ny olon-kendry tsy mba mankahala ny Lalàna; fa izay mihatsaravelatsihy amin’izany kosa dia tahaka ny sambo asian’ny tafio-drivotra.

³Mitoky amin’ny tenin’ny Tompo ny olona mahira-tsaina; ary ho azy ny Lalàna dia mendrika hitokiana tahaka ny valintenin’ny Orîma sy ny Torîma[295]. Ny ketrina sy ny adala

⁴Omany ny teninao, dia hohenoina ianao; angony ny fahalalànao, vao mamaly ianao.

⁵Ny fihetseham-pon’ny olona adala dia mivadibadika toy ny kodiaran-kalesy; ary ny fomba fisainany kosa dia haingam-pihodina toy ny lahin-tangerina[296].

⁶Ny sakaiza mpanamavo namana dia manahaka ny lahin-tsoavaly izay maneno amin’ny olona rehetra mitaingina azy. Toe-javatra samy hafa

⁷Nahoana moa ny andro anankiray no manan-danja kokoa noho ny andro iray hafa, kanefa samy avy amin’ny masoandro ihany ny fahazavàn’ny andro tsirairay mandavantaona?

⁸Tao an-tsain’ny Tompo no nanavahana azy ireo: eny, Izy no nandahatra ny fizaran-taona sy ny fankalazana;

⁹ka ny andro sasany nasandrany sy nohamasininy, fa ny sasany kosa nataony ho anisan’ny andro tsotra[297].

¹⁰Eny, avy amin’ny vovotany ny olombelona rehetra sady avy amin’ny tany rahateo koa no namoronan’Andriamanitra an’i Adama[298];

¹¹kanefa tamim-pahendrena lehibe no nanaovan’ny Tompo azy ireo ho samy hafa sy nampandehanany azy isan-tokony amin’ny lalana samy nalehany avy.

¹²Ny olombelona sasany notahiny sy nasandrany, ny sasany natokany ho afaka manakaiky Azy; fa ny hafa kosa nozoniny sy naetriny ary naongany hiala amin’ny toeran’izy ireo[299].

¹³Tahaka ny tanimanga eo an-tanan’ny mpanefy ka azony volavolaina araka izay itiavana azy; toy izany koa ny olona eo an-tanan’Ilay nanao azy ka hovaliany araka izay heveriny ho mety[300].

¹⁴Eo anatrehan’ny ratsy ny tsara; eo anatrehan’ny fahafatesana ny fiainana; toy izany koa ny olona mpanota dia eo anatrehan’ny olona tia vavaka.

¹⁵Diniho araka izany avokoa àry ny asan’Ilay Avo Indrindra, fa mifanindrana tsiroaroa izy ireo ka ny iray mifanohitra amin’ny iray hafa[301]. Eritreritry ny mpanoratra momba ny asany

¹⁶Izaho kosa no farany niari-tory handinika tahaka ny mpitsimpona voaloboka aorian’ny mpioty;

¹⁷fa noho ny fitahian’ny Tompo dia niroso teo alohan’ny mpioty aho, ka nameno ny famiazam-boaloboko tahaka an’ireo mpioty ireo koa.

¹⁸Hevero fa tsy ho an’ny tenako ihany no nanaovako fikelezana aina fa ho an’izay rehetra mitady fanabeazana[302]. Fitantanana ny ankohonana sy ny fananana

¹⁹Mba henoy aho ary anongilano sofina, ry lehiben’ny vahoaka sy ry filoham-pivoriana[303].

²⁰Na zanaka, na vady, na mpiray tampo, na sakaiza, dia aza misy omem-pahefana aminao, raha mbola velona aina koa ianao; ary aza afoy ho an’ny hafa ny fanananao, fandrao hanenina ianao ka hangataka azy indray.

²¹Raha mbola velona sy manam-pofonaina ianao, dia aza avela hisy olona hanjakazaka aminao;

²²fa aleo ny zanakao no hangataka aminao, toy izay ianao no hanaraka ny baikon-janakao.

²³Amin’ny zavatra rehetra ataonao, dia aoka ianao no ho tompon’andraikitra; ary aza avela ho voatohintohina ny lazanao.

²⁴Rehefa tonga ny andro farany iainanao sy ny fotoana hahafatesanao, vao mizarà fananana amin’ny mpandova. Ny mpanompo

²⁵Ny vilona sy ny kapoka ary ny entana no anjaran’ny boriky; fa ny hanina sy ny famaizana ary ny asa kosa no anjaran’ny mpanompo.

²⁶Ampiasao ny mpanomponao, dia hanam-pitsaharana ianao; fa raha avelanao hanao izay tiany izy, dia hitady fomba handosirana.

²⁷Mampiondrika ny vozom-biby ny zioga sy ny lamboridy; ary mamolaka ny mpanompo ratsy fanahy ny fampijaliana amam-pangirifiriana.

²⁸Iraho hiasa ny mpanomponao mba tsy hipetraka hidonana-poana,

²⁹satria ny fidonanaham-poana dia mampianatra haratsiana maro.

³⁰Ampanaovy raharaha izy araka izay sahaza azy[304]; ary raha tsy manaiky izy, dia vesaro gadra. Kanefa aza mitaky mihoatra ny mety, na amin’iza na amin’iza, ary aza manao na inona na inona mifanohitra amin’ny rariny.

³¹Raha mpanompo iray ihany no anananao, dia ento tahaka ny tenanao izy, fa herim-ponao no nahazoanao azy; raha io iray io ihany no anananao, dia ento tahaka ny rahalahinao izy[305], fa tahaka ny ainao no hilànao azy.

³²Raha ratsy fitondra azy ianao, ka lasa mitsoaka mandositra izy,

³³dia aiza no lalan-kalehanao hitady azy[306]?