Read Dikateny Iombonana Eto Madagasikara Bena-Siràka 34 Bible Online

Bena-Siràka 34 - Dikateny Iombonana Eto Madagasikara bible

Bena-Siràka 34

¹Aza ianteherana loatra ny nofy Fanantenam-poana sy mamitaka no andrandrain’ny olona tsy misaina; ary ny nofy no mampisidina ny ketrina.

²Toy ny misambotra aloka na manenjika rivotra ny olona manao ny nofy ho zavatra.

³Tandindon-javatra no hitan’ny olona amin’ny nofy; tahaka ny sarin-tavany eo anoloan’ny tena tavany.

⁴Inona no madio mety hipoitra avy amin’ny maloto, ary inona no marina mety hipoitra avy amin’ny lainga[307]?

⁵Zava-poana ny sikidy sy ny fanandroana ary ny nofy; zava-poana toy izany koa ny anjoanjon’eritreritra izay ataon’ny vehivavy manaintaina mihetsi-jaza[308].

⁶Raha tsy hoe nofy avy amin’ilay Avo Indrindra no nirahina mba hizahana toetra anao, dia aza avela hifantohan’ny fonao izany;

⁷satria efa namitaka olona maro ny nofy ary lavo izay nanankim-panantenana taminy.

⁸Lavorary ny Lalàn’Andriamanitra ka tsy misy fisolokiana toy ireny; ary lavorary koa ny fahendrena izay aloaky ny vava mahatoky. Mahasoa ny dia fitetezan-tany

⁹Mahalala zavatra maro ny olona nitety tany; ary ny efa voasedra no miteny amim-pisainana.

¹⁰Izay olona tsy mbola voasedra dia ho kely fahalalana,

¹¹fa izay efa nitety tany no manavosa haren-tsaina.

¹²Betsaka ny zavatra hitako fony aho nitety tany; ary mihoatra noho izay azoko lazaina ny fahalalàko.

¹³Matetika no efa nananontanona ahy ny fahafatesana, kanefa voavonjy aho satria efa ela nihetezana toy izany. Ny fanajana an’Andriamanitra

¹⁴Ho ela velona izay manaja ny Tompo,

¹⁵satria eo amin’ilay Mpamonjy azy no iorenan’ny fanantenany.

¹⁶Izay manaja ny Tompo dia tsy matahotra na inona na inona; tsy manahy na oviana na oviana izy satria ny Tompo no fanantenany[309].

¹⁷Sambatra ny fanahin’izay manaja ny Tompo!

¹⁸Iza no ianteherany? Ary iza no fiankinany?

¹⁹Ny mason’ny Tompo dia eo amin’izay tia Azy; fiarovana mahery sy fiankinana mafy Izy, fialofana amin’ny rivotra mahamay, fialofana amin’ny hafanana mandoro; ambenany tsy ho tafintohina ireo ary sakanany mba tsy ho potraka.

²⁰Mampahery fanahy sy mampahazava fijery Izy sady manome fahasitranana sy fiainana amam-pitahiana. Ny fivavahana izay sitrak’Andriamanitra

²¹Raha biby azo tsy an-drariny no atao sorona, dia fanatitra misy kilema izany;

²²ary tsy ankasitrahin’Andriamanitra ny fanomezan’ireo mpandika ny lalànany[310].

²³Tsy ankasitrahin’ilay Avo Indrindra ny fanatitr’ireo tsy mpivavaka; ary tsy araka ny hamaroan’ny sorona atao no amelàny ny fahotana.

²⁴Tahaka ny mamono zanaka eo imason-drainy ny manatitra sorona nalaina tamin’ny fananan’ny mahantra.

²⁵Mofo kely nisasarany no iveloman’ny mahantra, ka mpandatsa-dra izay maka izany aminy.

²⁶Mamono mahafaty namana izay manaisotra ny fivelomany;

²⁷ary mandatsa-dra izay manaisotra ny karaman’ny mpikarama[311].

²⁸Raha ny anankiray manorina ary ny anankiray mandrodana, inona no soa azon’izy roa tonta afa-tsy ny fisahiranana ihany?

²⁹Raha ny anankiray mirary soa ary ny anankiray manozona, feon’iza no hohenoin’ny Tompo?

³⁰Raha misy mandro avy nanendry faty kanefa mbola manendry azy indray, inona no soa azony tamin’ny fandroany[312]?

³¹Toy izany koa raha misy mifady hanina mba hahazoany famelana ny fahotany, kanefa mbola mamerina ireny fahotana ireny ihany, inona no soa azony tamin’ny fietreny tena[313]?