Read Dikateny Iombonana Eto Madagasikara Bena-Siràka 37 Bible Online

Bena-Siràka 37 - Dikateny Iombonana Eto Madagasikara bible

Bena-Siràka 37

¹Sakaiza tena izy sy sakaiza manody Olona isan-karazany no milaza hoe: «Izaho koa sakaizanao», kanefa misy ihany ny sakaiza izay anarany fotsiny ihany.

²Alahelo mila hahafaty tokoa, raha namana aman-tsakaiza no mivadika ho fahavalo.

³Ry hevi-dratsy ô, voatefy avy aiza ianao no manarona ny tany amin’ny fitaka?

⁴Misy ny namana finaritra raha faly ianao sakaizany, fa hanohitra anao kosa amin’ny androm-pahoriana.

⁵Misy ny namana miara-sahirana aminao sakaizany, raha vokisanao sakafo ny kibony; kanjo ny ampingany no raisiny, rehefa manoloana ny ady.

⁶Tsarovy ny sakaizanao, rehefa an’ady ianao; ary aza hadinoina izy, raha mahazo babo ianao. Ny amin’ny fakàna hevitra

⁷Ny mpanolotsaina rehetra samy mandoka ny toroheviny, kanefa misy manolotsaina ho tombontsoan’ny tenany.

⁸Tandremo ny amin’ny mpanolotsaina ka fantaro aloha izay zavatra ilainy, fa ny tombontsoan’ny tenany no anoroany hevitra; tandremo sao voafandrika ho rembiny ianao,

⁹ka mody hilazany hoe: «Tsara ny fihetsikao!», nefa hihatakataka izy mba hizaha izay hanjo anao.

¹⁰Aza maka hevitra amin’izay mangarika anao, ary afeno amin’izay mialona anao ny fikasanao.

¹¹Aza ny vehivavy no akàna hevitra ny amin’ny rafivaviny na ny kanosa no akàna hevitra ny amin’ny ady hatao; aza ny mpivarotra no akàna hevitra ny amin’ny teti-bidy, na ny mpividy no akàna hevitra ny amin’ny varotra; aza ny mpitsiriritra no akàna hevitra ny amin’ny fankasitrahana, na ny tsy mangoraka no akàna hevitra ny amin’ny fiantrana; aza ny malaina no akàna hevitra ny amin’ny asa isan-karazany, na ny mpikarama isan-kerintaona no akàna hevitra ny amin’ny famitàn-javatra, na ny mpanompo kamo no akàna hevitra ny amin’ny lahasa be; aza ireo olona ireo no ianteheranao na amin’ny torohevitra iray akory aza.

¹²Fa mahavara mifandray amin’olona tia vavaka, izay fantatrao ho mpitandrina ny didin’Andriamanitra sady manana toe-panahy mitovy amin’ny anao, ka hiaraka ory aminao raha sendra lavo ianao[330].

¹³Aoka hifikiranao koa ny fikasan’ny fonao, satria tsy misy mpanolotsaina mahatoky toa azy;

¹⁴fa mazàna ny fon’olombelona no milaza zavatra betsaka aminy, mihoatra noho ny mpitily fito voapetraka hitily eo ambony havoana.

¹⁵Fa mihoatra noho izany rehetra izany, dia mangataha amin’ny Avo Indrindra mba hitarihany lalana anao amin’ny fahamarinana. Ny amin’ny fahendrena marina

¹⁶Alohan’ny asa rehetra, aoka hiady hevitra; alohan’ny atao rehetra, aoka hisaintsaina!

¹⁷Ao an-tsaina no ifotoran’ny hevitra;

¹⁸ary karazan-tahony efatra no apoitrany: dia ny tsara sy ny ratsy, ary ny fiainana sy ny fahafatesana; kanefa ny lela hatrany hatrany no tompon’ny fanapahan-kevitra farany[331].

¹⁹Misy olona kinga rehefa hananatra ny besinimaro, kanefa tsy vanon-ko inona raha ho an’ny tenany.

²⁰Misy izay mahay mandahateny nefa hàlan’olona, ka tsy hanana hanin-kohanina akory izy;

²¹fa tsy nomen’ny Tompo azy ny hoambinina eo anoloan’ny hafa, satria tsy manana fahendrena akory izy.

²²Misy izay hendry ho tombontsoany manokana ihany, ary ny vokatry ny fahalalànany dia ho an’ny tenany.

²³Misy kosa olon-kendry izay mampianatra mba hanasoavana ny mpiray firenena aminy; ary azo antoka ny vokatry ny fahalalàny.

²⁴Ho henika fitahiana ny olon-kendry toy izany; ary izay rehetra mahita azy hanao azy hoe sambatra.

²⁵Azo isaina ihany ny androm-piainan’ny olona, fa tsy tambo isaina kosa ny andron’i Israely.

²⁶Ny olon-kendry dia tonga mahatoky eo anivon’ny mpiray firenena aminy, ary haharitra mandrakizay ny lazany. Ny fahalalana onony

²⁷Anaka, tsapao toetra ny tenanao raha mbola velona koa ianao; hevero izay maharatsy io tenanao io ka aza omena azy mihitsy izany.

²⁸Tsy sahaza ny besinimaro ny zava-drehetra sady tsy ary ho sitraky ny olon-drehetra[332].

²⁹Aza fatra-pitady ny hanim-py isan-karazany ary aza dia fandrombandrombaka sakafo,

³⁰satria ny hanina be loatra miteraka faharisarisana ary ny fisesehan-tsakafo dia mahatonga areti-mandalo.

³¹Nahafaty olona maro ny fisesehan-tsakafo, fa izay mitandrina kosa ho lava andro iainana[333].