Read Dikateny Iombonana Eto Madagasikara Bena-Siràka 38 Bible Online

Bena-Siràka 38 - Dikateny Iombonana Eto Madagasikara bible

Bena-Siràka 38

¹Ny dokotera sy ny aretina Omeo ny haja tandrify azy ny dokotera, satria ilainao izy sady noarin’ny Tompo koa.

²Eny, ilay Avo Indrindra no iavian’ny fahasitranana ary Izy Mpanjaka no ahazoanao io fanomezana io.

³Ny dokotera kosa afa-mirehareha amin’ny fahaizany; ary igagana azy izany eo anatrehan’ireo lehibe.

⁴Ny Tompo no nahary ny fanafody vokatry ny tany, ka tsy manao ireny tsy ho zavatra ny olona misaina.

⁵Tsy tapa-kazo iray ve no nampiasain’i Mosesy hahatonga ny rano ho azon’ny vahoaka sotroina[334], ka hahafantarany ny herin’Andriamanitra?

⁶Notolorany fahaizana koa ny olona mba hanome voninahitra Azy amin’ny asa mahagaga vitany.

⁷Ny mpanamboatra fanafody no mampiasa ireny asa mahagaga vitan’ny Tompo ireny mba hanaovana zavatra mifangaroharo; dia entin’ny dokotera kosa izany hitsaboana sy hanalefahana ny fanaintainana; ka mitohy ny asa faharian’Andriamanitra, sady Izy no iavian’ny fahasalamana eran-tany.

⁹Anaka, raha marary ianao, dia aza manao tsirambina; fa mangataha amin’ny Tompo, dia hositraniny ianao[335].

¹⁰Mitsahara amin’ny fahotanao, ary izay hitsiny no aoka hataonao; aoka hodiovinao ny fonao ho afaka amin’ny heloka isan-karazany!

¹¹Raha zakan’ny fari-panananao izany, dia vovo-javamanitra sy lafarinina tsara indrindra no aoka hoentinao hatolotra ny Tompo mba ho fampahatsiarovana ho Azy[336]; dia andraraho menaka ny fanatitrao.

¹²Avy eo omeo toerana ny dokotera fa noarin’ny Tompo koa izy; ary aoka tsy hohalaviriny ianao, satria misy ilànao azy!

¹³Misy ihany ny fotoanandro izay ahombiazan’ny tanany,

¹⁴satria hivavaka amin’ny Tompo koa izy mba hanome fahombiazana azy hahatonga fitoniana sy fahasitranana ka hanalava ny andro iainan’ny olona.

¹⁵Izay manota eo imason’ny Mpahary azy no aoka ho latsaka eo an-tanan’ny dokotera[337]! Ny fomba fisaonana

¹⁶Anaka, itomanio tokoa ny maty; ary aoka hanao fidradradradrana ianao toy ny olona efa iharan-doza lehibe! Dia ataovy amin’ny nofon’ny maty izay fandevenana tandrify azy ary aza atao tsirambina ny fasany.

¹⁷Mitomania fatratra ary mamoaha sento mafy; manaova fisaonana araka ny sahaza ny maty, indray andro na indroa andro mba tsy hisian’ny vava ratsy; dia mionòna hampisava ny alahelonao.

¹⁸Fa mety hahatonga fahafatesana ny alahelo; ary mampihena ny hery ny alahelon’ny fo[338].

¹⁹Rehefa ory mafy ny tena dia mihombo ny alahelo; ka izay miaina toa olo-mahantra dia toa mahatsapa ho voaozona.

²⁰Aza avela ho difotr’alahelo ny fonao, roahy izy ary hevero ny hiafaranao.

²¹Aza hadinoina izao: ny maty tsy hiverina intsony; ka tsy hahasoa azy ny fahorianao sady hanimba ny tenanao.

²²Tsarovy izay zavatra nihatra taminy, satria toy izany koa no hihatra aminao: ny azy omaly fa ny anao rahampitso.

²³Ao anaty fitsaharana ny maty, ka atsaharo ny fieritreretana azy; ary mionòna ianao ny aminy, satria efa lasana ny fanahiny. Ny lafy ratsin’ny fanaovana asan-tanana

²⁴Ny fahendrena dia azon’ny mpahalala azy noho ny fananany fotoana hisainana; ary izay kely asa herehina no hihahendry.

²⁵Ahoana moa no hahatonga hendry ny mpiasa tany mitana angadinomby? Ny ireharehany dia ny mampandihy lefona fanindronana[339], sy ny miroaka omby ary ny lany andro mampiasa azy; ny hany foto-dresany dia momba ny vantotr’ombalahy.

²⁶Ny hanao vavasa no ifantohan’ny fony; ary ny hampahazo vilona ny vantotr’ombivavy no mba mahatonga azy hiari-tory.

²⁷Toy izany koa ny mpandrafitra hazo sy ny mpanorin-trano izay samy manao ny raharahany andro aman’alina; ohatra ny mpisikotra marika amin’ny tombokase dia tsy sasatry ny manovaova endri-javatra; ny hamoaka ny sary alain-tahaka no ifantohany ary ny hahavitana taozavatra lavorary no mba mahatonga azy hiari-tory.

²⁸Toy izany koa ny mpanefy vy izay mipetraka eo anilan’ny riandriana sy mandinika ny akoram-by hotefeny; mampitsonika hatsembohana azy ny eton’afo ary miaritra ny hafanàn’ny lafaoro izy, mampaharenin-tsofina azy ny fikatrokatroky ny tantanana ary dinihin’ny masony ny fanaka izay alain-tahaka; ny hamitana taozavatra lavorary no ifantohan’ny fony, ka ny mandambolambo izany ho lavorary no mba mahatonga azy hiari-tory.

²⁹Toy izany koa ny mpanefy tanimanga izay mipetraka eo anilan’ny taozavatra ataony sy manodinkodin-kodiarana amin’ny tongony; ny taozavatra tontosainy no ahîny lalandava, ary isa voafetra no tratrarin’ny asany isan-karazany[340];

³⁰ny tanany no amolavolany ny tanimanga izay efa nohosihosen’ny tongony mba halemy; ny mandambolambo ny asany no ifantohan’ny fony ary ny fanadiovana ny lafaoro no mahatonga azy hiari-tory.

³¹Ireo olona rehetra ireo dia mitoky amin’ny tanany ary samy manam-pahaizana amin’ny asany avy.

³²Raha tsy misy azy ny olona, tsy hahorina tanàna na ho afaka honina ao na hivezivezy ao; kanefa tsy mba hakana hevitra izy eo amin’ny antenimieram-bahoaka,

³³na mba homen-kaja eo amin’ny fivoriana, na mba hitoetra eo amin’ny sezan’ny mpitsara; tsy mba hahafantatra na hampamirapiratra ny fotopototry ny fahaizana sy ny rariny izy, ary tsy mba ho hita mihitsy eo anivon’ireo lehibe.

³⁴Kanefa ny zava-boaary no hamafisiny eto amin’izao tontolo izao[341]; ary ny hamitana ny raharahany no anaovany fivavahana.